ဩဂုတ် ၂ ၊ ထမံသီ
ယခုနှစ်နှစ်ပိုင်းအတွင်း ဆန်စပါးစျေးနှုန်းကြီးမြင့်လာမှုတွေကြောင့် ဟုမ္မလင်းမြို့နယ် ထမံသီကျေးရွာအုပ်စုက ရှမ်းနီတောင်သူတွေဟာ လယ်ယာစိုက်ပျိုးရေး လုပ်ငန်းတွေကို ပြန်လုပ်လာကြတယ်လို့ တောင်သူတွေဆီကနေ သိရပါတယ်။
“ အခုနောက်ပိုင်းဆိုရင် ဆန်စပါးစျေးနှုန်းတွေလည်း ကြီးလာတဲ့အခါကျတော့ မူလလယ်ပိုင်ရှင်တွေပြန်ဝင်လာတာများတယ်။ တချို့လည်း ၁၀ နှစ်ခြားပြီးမှ တချို့လည်း လေးငါးခြောက်နှစ်ခုနှစ်နှစ် ဆက်တိုက်မလုပ်တဲ့ဟာ ပြီးတော့မှ ပြန်ဝင်လာတာအဲ့လိုမျိုးတွေလေ” လို့ ထမံသီကျေးရွာ ရှမ်းနီတောင်သူတစ်ဦးက ပြောပြပါတယ်။
၁၉၉၆-၉၇ ခုနှစ်တွင် ချင်းတွင်းမြစ်ရေကြီးပြီး ထမံသီကျေးရွာရှိ လယ်ယာများကို ရွံနွံဖုံးလွှမ်းပြီး စိုက်ပျိုးမြေပျက်စီးမှုများနှင့် စပါးအထွက်နှုန်းများစွာလျော့ခဲ့ခြင်းကြောင့် လယ်ယာစိုက်ပျိုးရေးလုပ်ငန်းကို စွန့်လွတ်ခဲ့ကြတာဖြစ်တယ်လို့ ထမံသီကျေးရွာ ရှမ်းနီစာပေနှင့်ယဉ်ကျေးမှုအသင်း တာဝန်ရှိသူတစ်ဦးက ပြောပြပါတယ်။
လက်ရှိ ထမံသီကွင်းအတွင်းမှာ စပါးစိုက်ပျိုးဧက ၃၀၀ ကျော်သာရှိပြီး အထွက်နှုန်းအနေဖြင့်လည်း မြေဆီလွှာပျက်စီးမှုကြောင့် တစ်ဧက တင်း ၂၅ မှ ၃၀ အထိသာရကြတာလို့ သိရပါတယ်။
“ ထမံသီလိုမျိုးက မြေဆီနည်းနည်းခမ်းခြောက်လာပြီဆိုတော့ အထွက်နှုန်းတွေကျဆင်းလာခဲ့လိုက်ပြီ မြေဩဇာတော့မထည်ရဲကြဘူး။ တစ်ဧက အစိတ် သုံးဆယ်လောက်ပဲလိုက်တယ်” လို့ ထမံသီကျေးရွာ ရှမ်းနီတောင်သူတစ်ဦးက ဆက်ပြောပြပါတယ်။
တောင်သူတွေဟာ စိုက်ပျိုးရေးနဲ့ ပတ်သက်တဲ့ အသိပညာပေးမှုများ၊ မြေဩဇာနဲ့ ပတ်သတ်တဲ့ ဗဟုသုတများ လိုအပ်နေပြီး လက်ရှိတိုင်လယ်အားလုံးက မည်သည့်မြေဩဇာမှ ထည့်ထားခြင်းမရှိကြောင်းသိရပါတယ်။
ဟုမ္မလင်းမြို့နယ်မှာ စပါးစိုက်ပျိုးနိုင်သည့် လယ်ဧက ခုနှစ်သောင်းကျော်ရှိပေမယ့်လည်း နှစ်စဉ်စိုက်ပျိုးမှုဟာ ၆ သောင်းနီးပါးသာရှိကြောင်း ဒေသစီးပွားရေးဆိုင်ရာအချက်အလက်များအရ သိရပါတယ်။