စက်သုံးဆီစျေးမြင့်တက်လာမှုကြောင့် မိုးစပါးစိုက်ပျိုးဖို့ ဒေသခံတွေအခက်အခဲဖြစ်နေ 

ဇွန် ၂၀ ၊ ဟုမ္မလင်း 

စစ်ကိုင်းတိုင်းဒေသကြီး၊ ဟုမ္မလင်းမြို့နယ် ဥရုချောင်းဒေသမှာရှိတဲ့  လယ်သမားအများစုဟာ စက်သုံးဆီစျေးမြင့်တက်မှုကြောင့် မိုးရာသီစပါး စိုက်ပျိူးရန်အတွက် အခက်အခဲဖြစ်ပွားနေကြောင်း တောင်သူတွေက ပြောပါတယ်။ 

ဇွန်လအတွင်းမှာ စက်သုံးဆီတွေ ဝင်ရောက်မှုနည်းပါးလာတဲ့အတွက်ကြောင့် စက်သုံးဆီစျေးနှုန်းဟာ  တစ်ပေပါ ကျပ်သိန်းနှစ်ဆယ်ကျော်အထိ ဆက်တိုက်မြင့်တက်လာနေတာလည်းဖြစ်ပါတယ်။ 

လယ်ယာစိုက်ပျိုးရေးမှာ စက်ယန္တရားတွေကိုသာ အဓိကထားပြီးအသုံးပြုလာတဲ့နောက် အခုလို စက်သုံးဆီတွေ စျေးမြင့်တက်လာတာဟာ အခက်အခဲတွေဖြစ်စေတယ်လို့ သိရပါတယ်။ 

ဒီနှစ်ကမလွယ်ဘူး စပါးစိုက်ဖို့မလွယ်ဘူးမောင်။ ဒီဇယ်ဈေးကလည်း တက်နေတော့ လယ်လုပ်ဖို့ရာတောင်မလွယ်ဘူး” လို့ တောင်သူတစ်ဦးကပြောပါတယ်။ 

ယခင်က  ကျွဲ၊ နွား များဖြင့် အသုံးပြုခဲ့ကြပြီး ကျွဲ၊ နွား များရှားပါးလာတာကြောင့် ထွန်စက်များဖြင့်အသုံးပြုတာအပြင် ရေတင်စက်များလည်းအသုံးပြုရတာကြောင့် ကုန်ကျမှုများတယ်လို့ဆိုပါတယ်။

ရေစက်လည်းမောင်းပြီးရေသွင်းရတယ် ထွန်စက်လည်းထွန်ရတယ်ဆိုတော့ တစ်ရက်ကို ဒီဇယ် ငါးဂါလံပုံးတစ်ပုံးကုန်တယ်။ အခုဆီဈေးနဲ့ဆိုရင်တော့ မလွယ်ဘူး လယ်တောင်ဘယ်လိုလုပ်ရမလဲမသိဘူး” လို့ မာလုံကျေးရွာ လယ်သမားတစ်ဦးကအခုလိုပြောပြပါတယ်။

ဟုမ္မလင်းမြို့နယ်အတွင်းမှာ နှစ်စဉ်မိုးစပါးစိုက်ပျိုးဧက ခြောက်သောင်းကျော်ရှိပြီး စပါးထွက်နှုန်းကလည်း တစ်နှစ်ကို စပါးတင်းပေါင်း ငါးသန်း ထွက်ရှိတယ်လို့ ဒေသအုပ်ချုပ်ရေးအချက်အလက်တွေအရသိရပါတယ်။ 

ဟုမ္မလင်းမြို့နယ်ရှိ လက်ရှိစိုက်ပျိုးရေး ဧရိယာဟာ မြို့နယ်ဧရိယာရဲ့ ရာခိုင်နှုန်းအနည်းငယ်ကိုသာ စိုက်ပျိုးနေတာဖြစ်ပါတယ်။ 

ဟုမ္မလင်းဒေသထွက် စပါးတွေဟာ လုံလောက်မှုမရှိတာကြောင့် ဖောင်းပြင်၊ ပင်လည်ဘူး ၊ ကောလင်း စတဲ့မြို့နယ်တွေကနေ ဆန်စပါးတွေကို တင်သွင်းရတဲ့အခြေအနေတစ်ရပ်လည်းဖြစ်ပါတယ်။

Leave a Reply

Your email address will not be published. Required fields are marked *