ဇူလိုင် ၇ ၊ ဗန်းမောက်
ဗန်းမောက် – ဟုမ္မလင်း ရဲ့အဓိကကုန်စည်နှင့် စက်သုံးဆီများ ကူးသန်းရောင်းဝယ်ရေးအတွက် အရေးပါတဲ့ ချောင်းကြီးချောင်းရေဟာ ဇူလိုင် ၇ ညပိုင်းကစလို့ ရေကြီးရေလျှံမှုတွေဖြစ်ပွားနေတယ်လို့ သိရပါတယ်။
“ ပစ္စည်းတွေ တန်းထိုးပြီး အမိုးပေါ်တင်ထားတယ် ။ ခေါင်အမိုး ထုတ်တန်းပေါ်တင်ထားတာ။ အရင်က ကုန်တင်ကုန်ချကားကြီးဝင်းပဲ အဲ့ဒါ ခု လှေတွေပြည့်နေပြီ။ စက်လှေ ညက သုံးစီးရေမြှုပ်တယ်။ ရေတက်တာ မသိလိုက်ကြဘူး ။ တောင်ကြရေဆိုတာ အတက်မြန်လို့” လို့ စက်လှေပိုင်ရှင်တစ်ဦးက ပြောပါတယ်။
ရေကြီးရေလျှံမှုကြောင့် စက်လှေဂိတ်တွေကို ရှမ်းနီအမျိုးသားများတပ်မတော် SNA တပ်မဟာ ၆၁၄ က ပိတ်လိုက်ပြီး စက်လှေဂိတ်၊ ရွှေတော်စျေးတန်းနဲ့ မြစ်ကမ်းနားနေထိုင်သူတွေကိုအရေးပေါ် ရွေ့ပြောင်းမှုတွေပြုလုပ်ခဲ့တယ်လို့သိရပါတယ်။
ဒီလိုရေကြီးရေလျှံမှုတွေကြောင့် စက်လှေသုံးစီးနှစ်မြှုပ်ထားသလို ကမ်းဘေးမှာရှိတဲ့ ကုန်စည်တွေကို အရေးပေါ်ရွေ့ပြောင်းနေရတယ်လို့ စက်လှေပိုင်ရှင်တွေက ပြောပါတယ်။
ရေကြီးမှုကြောင့် စက်လှေပြေးဆွဲမှု ပိတ်ပင်လိုက်တာကြောင့် ကုန်စည်စီးဆင်းမှုတွေ ခေတ္တရပ်တန့်နေတာလည်းဖြစ်တယ်လို့ သိရပါတယ်။
ချောင်းကြီးချောင်းကို ၂၀၂၂ ခုနှစ်မှစပြီး မိုးရာသီမှာ ကုန်စည်တွေနဲ့ ခရီးသွားတွေအတွက် တွင်တွင်ကျယ်ကျယ်အသုံးပြုလာနေရတဲ့ချောင်းတစ်ခုဖြစ်ပါတယ်။
ချောင်းကြီးချောင်းနည်းတူ ဟုမ္မလင်းမြို့နယ်အတွင်းက ဥရုမြစ်နဲ့ ချင်းတွင်းမြစ်တို့လည်း စိုးရိမ်ရေအမတ်တွေနားကပ်နေပြီဖြစ်တယ်လို့ ဒေသခံတွေကပြောဆိုပါတယ်။