ဩဂုတ် ၈ ၊ မြစ်ကြီးနား
မြစ်ကြီးနားမြို့ရှိ ရှမ်းမျိုးနွယ်စုစစ်ဘေးရှောင်စခန်းကို ယခုအပတ် ရက်ပိုင်းအတွင်း ကချင်ပြည်နယ်ဝန်ကြီးချုပ် ဦးခက်ထိန်နန်က အစိုးရဌာနပေါင်းစုံ ဝန်ထမ်းများနဲ့အတူ ကိုယ်တိုင်ကွင်းဆင်းလာရောက်မှာဖြစ်ကြောင်း ရှမ်းစစ်ဘေးရှောင်ကူညီနေသူတာဝန်ခံကို ကတိပေးခဲ့တယ်လို့ သိရပါတယ်။
“ရေလွတ်ကင်းတဲ့နေရာမှာ ယာယီတဲလေးတွေပြန်ပြီးတည်ဆောက်ခွင့်ပေးဖို့အတွက်ရယ် သီးပင်စားပင်လေးတွေစိုက်ပျိုးခွင့်ရဖို့အတွက်ပေါ့လေနော့ ဝန်ကြီးကိုယ်တိုင်ကွင်းဆင်းပြီးတော့ စီစဉ်ဆောင်ရွက်ပေးပါမယ်လို့ ကတိတော့ပေးလာတယ်’ လို့ စခန်းတာဝန်ခံက ပြောပြပါတယ်။
မကြာသေးမီရက်ပိုင်း သြဂုတ်လ(၃)ရက်နေ့ကနေ မိုးသည်းထန်ပြီး အဆိုပါစစ်ဘေးရှောင်စခန်းရေနစ်မြှုပ်မှုဖြစ်ပေါ်ခဲ့ကာ ယနေ့အထိ ရေဝပ်နေပြီး လျော့ကျသွားခြင်းမရှိနေတာလည်းဖြစ်ပါတယ်။
ဒါကြောင့် ကွင်းဆင်းလာရောက်ပြီး လိုအပ်မှုများကို စီစဉ်ဆောင်ရွက်ပေးသွားမယ်လို့ ဝန်ကြီးချုပ်က ကတိပေးထားကြောင်း သိရပါတယ်။
ယခုစစ်ဘေးရှောင်စခန်းတည်ဆောက်ထားတဲ့ မြေနေရာကို ယခုနှစ်ကနေ လာမယ့်နှစ်၂၀၂၆ နှစ်ကုန်အထိ နှစ်နှစ်စာသာ နေထိုင်ခွင့်ပြုပေးထားတာဖြစ်ပြီး ပြီးခဲ့တဲ့လပိုင်းက အမိုးအကာထောက်ပံ့ပေးမှုများ အနည်းငယ်ရှိခဲ့ပါတယ်။
သို့သော် အိမ်ထောင်စုပေါင်း (၇၀၀)နီးပါးခိုလှုံနေတဲ့ ဒီစခန်းအတွက် လုံလောက်တဲ့အကူအညီနဲ့ထောက်ပံ့စရိတ်များရရှိဖို့ အကြိမ်ပေါင်းများစွာ တင်ပြတောင်းဆိုခဲ့မှုများပြုလုပ်ခဲ့ပေမယ့် တစ်စုံတစ်ရာ ထိထိရောက်ရောက်ဆောင်ရွက်ပေးခဲ့ခြင်းတော့ မရှိဘူးလို့ သိရပါတယ်။ #မြစ်ကြီးနား #မြစ်ကြီးနား
“ သူဝန်ကြီးချုပ်ဖြစ်နေတဲ့အချိန်ကာလမှာတော့ သူအားလုံးကြည့်ပြီးဆောင်ရွက်ပေးသွားမယ်လို့တော့ ကတိပေးခဲ့ဖူးပါတယ် တောင်းဆိုခဲ့တာတော့ အကြိမ်ပေါင်းများစွာတောင်းဆိုခဲ့ဖူးပါတယ် ဒါပေမယ့်လည်းရရှိခဲ့ဖူးတာတွေတော့မရှိပါဘူး ထွေထွေထူးထူးမရှိသေးပါဘူးခင်ဗျ’ဟု သူကဆိုပါတယ်။
ဒီစစ်ဘေးရှောင်စခန်းမှာ ၂၀၂၄ ခုနှစ် မတ်လစပြီး စစ်ကောင်စီတပ်နဲ့ KIA တို့ရဲ့ တိုက်ပွဲတွေကြောင့် ဆင်ဘိုမြို့ ၊ တာလောကြီးတိုက်နယ်အတွင်းက ဒေသခံတွေလည်းခိုလှုံနေသလို ဝိုင်းမော်မြို့နယ် နဲ့ ဗန်းမော်မြို့နယ်မှာ ဖြစ်ပွားနေတဲ့ တိုက်ပွဲတွေကြောင့်လည်း စစ်ဘေးတိမ်းရှောင်ခဲ့ကြတဲ့ ရှမ်းတိုင်းရင်းသားတွေလည်း ရှိနေပါတယ်။