ဟိုပင်မြို့နယ်ခွဲတွင်းရှိ ရှမ်းနီပါတီဆိုင်းဘုတ်များပြန်လည်စိုက်ထူခြင်းနှင့် လူထုတွေ့ဆုံပွဲ ပြုလုပ်

Shan- Ni ( Tai Leng ) National Development Party / Photo- Myint Lwin (Shanni Voice

ဇန်နဝါရီ ၁၉ ၊ မိုးညှင်း

ကချင်ပြည်နယ် မိုးညှင်းမြို့နယ် ဟိုပင်မြို့နယ်ခွဲ အတွင်းရှိ တကွင်းကျေးရွာ ၊ မြိုသစ်ကလေးကျေးရွာ ၊ အင်းလေးကျေးရွာတို့၌ တိုင်းလိုင်(ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီမှ ဇန်နဝါရီလ (၁၉)ရက် တွင် ဆိုင်းဘုတ်တင်ပွဲနှင့် လူထုတွေ့ဆုံပွဲ ပြုလုပ်ခဲ့သည်။ 

အဆိုပါပွဲမှ ရှမ်းနီလူမျိုးများ ရှမ်းနီလူမျိုး သတ်မှတ်နိုင်ရေး၊ နိုင်ငံသား စီစစ်ရေးကတ်ပြားများတွင် ရှမ်းနီအမည်ထည့်တွင်းနိုင်ရေး စသည့်၎င်းတို့ပါတီ၏ လုပ်ငန်းစဉ်များပြောကြားခဲ့ပြီး ရှမ်းနီလူမျိုးများ အကြောက်တရား ကင်းစွာ နိုင်ငံရေးလုပ်ငန်းများ ဆောင်ရွက်စေလိုကြောင်း ပါတီ ဥက္ကဌဦးစိုင်းဌေးအောင်ကပြောသည်။

“မြန်မာနိုင်ငံရေး အရွေ့ကို ငါတို့တွေ ပါသွားကြဖို့ပါ ဟိုတုန်းက မပါခဲ့လို့ နောက်ကျခဲ့ပြီးပြီ။ ကျွန်တော်တို့ လုပ်ဆောင်နေတာလည်း ရှမ်းနီတစ်မျိုးသားတစ်ခုတည်းအတွက် လုပ်ဆောင်နေတာမဟုတ်ပါဘူး အတူနေတိုင်းရင်းသား အားလုံးအတွက်ဆောင်ရွက်နေကြောင်း”ဟု ၎င်းကဆက်ပြောသည်။

လွန်ခဲ့သော နှစ်ပေါင်းများစွာမှ မလုပ်ခဲ့သည့် အလုပ်ဖြစ်သောကြောင့် အဆိုပါဆိုင်းပုဒ်တင်ပွဲသည် အလွန်ဂုဏ်ယူမိကြောင်း မြို့သစ်ကလေးကျေးရွာမှ ပါတီဝင် ဦးစိုင်းစံဝင်းကပြောသည်။

“အောင်အောင်မြင်မြင်နဲ့လျှောက်လမ်းသွားနိုင်ရင် ကျွန်တော်တို့ ရှမ်းမျိုးနွယ်ရိုးရာ၊ ပါတီ၊ မြို့နယ်ကောင်းစားသွားရင်တောင် လူမျိုး မခွဲမခြားဘဲ ဝိုင်းဝန်းလုပ်ဆောင်သွားရင် ပိုလို့ကောင်းလိမ့်မယ်” ဟု အင်းလေးကျေးရွာမှ ဦးအောင်ထူးပြောသည်။

တိုင်းလိုင်(ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီမှ ကချင်ပြည်နယ်အတွင်း မြို့နယ်ကိုးမြို့နယ်တွင် ပါတီဆိုင်းဘုတ်များ စိုက်ထူထားပြီးဖြစ်ကြောင်း ၎င်းပါတီမှ သိရသည်။ 

၂၀၂၀ ခုနှစ် နှစ်ဦးပိုင်းတွင် မိုးညှင်းမြို့နယ် အင်းတော်ကြီးဒေသ ကျေးရွာများရှိ ပါတီဆိုင်းဘုတ်များကို ပြန်လည်တင်ခဲ့ပြီး လူထုတွေ့ဆုံပွဲများလည်း ပြုလုပ်ခဲ့ကြောင်း သိရသည်။

Leave a Reply

Your email address will not be published. Required fields are marked *

ဆက်စပ်သတင်းများ