မတ်လ ၂၇၊ ရန်ကုန်
နေ့စဉ်ဆီတန်းစီစရာမလိုတော့ဘဲ စက်စွမ်းအားအလိုက်ဝယ်ယူခွင့်ပမာဏအတွက် အကြိမ်ရေနဲ့ ဝယ်ယူနိုင်မယ့်စနစ်ကို ဒီကနေ့ မတ်လ (၂၇) ရက်နေ့မှာ စတင်လိုက်ပြီဖြစ်တယ်လို့ စစ်ကော်မရှင်ရဲ့ စွမ်းအင်ဝန်ကြီးဌာန ကထုတ်ပြန်ခဲ့ပါတယ်။
နေပြည်တော်၊ ရန်ကုန်၊ မန္တလေးနဲ့ တောင်ကြီးမြို့များတွင် ဒီကနေ့ကစ ရောင်းချနေတာဖြစ်ပြီး ကျန်မြို့တွေမှာလည်း ဆက်လက်လုပ်ဆောင်သွားမှာဖြစ်တယ်လို့သိရပါတယ်။
စနစ်အားအသုံးပြုရာတွင် မော်တော်ယာဉ်သက်သေခံလက်မှတ်(ဝှီးတက်) အာမခံ အမှတ်အသား ဟိုလိုဂရမ်ပါရှိမှသာ စက်သုံးဆီ အရောင်းဆိုင်ဝန်ထမ်းက Scan (စကန်)ဖတ်ရောင်းချမှာဖြစ်ပြီး ယာဉ်နံပါတ်၊ တစ်ပတ်အတွင်း ဝယ်ယူခွင့်ပမာဏ၊ ဝယ်ယူပြီးတဲ့ ပမာဏ၊ ကျန်တဲ့ ပမာဏများ ပေါ်လာမှာဖြစ်တယ်လို့ ဆိုထားပါတယ်။
တစ်ပတ်အတွင်းမှာ ဆိုင်ကယ်ဆိုရင် ၂ ကြိမ်နှုန်းနဲ့ ၈ လီတာ၊ သုံးဘီးဆိုရင် ၂၅ လီတာကို ၃ကြိမ်ခွဲရောင်းမှာဖြစ်ပြီး အိမ်စီးကားနဲ့ ဌာနဆိုင်ရာကားတွေဆိုရင် စက်အင်ဂျင်စွမ်းအားအလိုက် (၂၀၀၀) စီစီ (၃၀၀၀) စီစီအထက်နဲ့ ၃၅ လီတာကနေ ၄၅ လီတာအထိ တစ်ပတ်အတွင်း ၂ ကြိမ်ခွဲပြီးဝယ်ယူခွင့်ရရှိမှာ ဖြစ်ပါတယ်။
လူမှုကူညီရေးယာဉ်၊ လူနာတင်ယာဉ်၊ နိဗ္ဗာန်ယာဉ်၊ စည်ပင်အမှိုက်သိမ်းယာဉ်၊ ရေပုပ်စုတ်ယာဉ်တွေကတော့ ခွဲတမ်း(Quota) သတ်မှတ်ထားတာ မရှိဘဲ လိုအပ်တဲ့ ပမာဏအတိုင်း ရောင်းချပေးသွားမယ်လို့ ဆိုပါတယ်။
ဒါ့အပြင် တစ်ပတ်အတွင်း သတ်မှတ်ထားတဲ့ ခွဲတမ်းကျကို အပြီးအပြတ်ဝယ်ယူရမှာဖြစ်ပါတယ်။
ခရီးထွက်ခွာရင် မူလဝယ်ယူထားတဲ့ ငွေရှင်းပြေစာကိုပြသပြီး ရောက်ရှိရာ စက်သုံးဆီ အရောင်းဆိုင်များတွင် Scan ဖတ်ကာထပ်မံဝယ်ယူနိုင်တယ်လို့သိရပြီး ဒီစနစ်ကို Online Monitoring(အွန်လိုင်းစောင့်ကြည့်စနစ်) ဖြင့် ကြပ်မတ်သွားမှာဖြစ်တယ်လို့ သိရပါတယ်။
စစ်ကော်မရှင်က စက်သုံးဆီရက် ၅၀ စာကျန်ရှိပြီး လုံလောက်နိုင်တဲ့ အခြေအနေရှိတယ်လို့ ပြောထားပေမဲ့ စျေးနှုန်းတွေမြင့်တက်လာသလို ဆီဝယ်ယူမှု အကန့်အသတ်တွေရှိလာနေဆဲလည်း ဖြစ်ပါတယ်။
စက်သုံးဆီစျေးနှုန်းတွေဟာလည်း ယခင်က စျေးနှုန်းတွေထက် ၄၀ ရာခိုင်နှုန်းမြင့်တက်လာနေတာဖြစ်ပါတယ်။
တန်းစီစရာမလိုအပ်ပဲ ဝယ်ယူလို့ရမယ်ဆိုပေမယ့် စက်သုံးဆီဆိုင်တွေရှေ့မှာ အနည်းဆုံး ၄ နာရီကြာ တန်းစီဝယ်ယူနေဆဲဖြစ်ပြီး သတ်မှတ်ထားတဲ့ရောင်းချပမာဏအတိုင်းမရရှိကြောင်း သိရပါတယ်။