အောက်တိုဘာ ၁၀ ၊ ဗန်းမောက်
ဗန်းမောက်မြို့ပေါ်မှာ နှစ်ပတ်အတွင်း စစ်ဘေးရှောင်တွေရဲ့ နေအိမ်၊ စျေးဆိုင်ခန်းတွေ ဖောက်ထွင်းခံရမှု များပြားနေကြောင်း သိရပါတယ်။
“ ဆိုင်တွေဘယ််သူတွေဖောက်မှန်းမသိ၊ နောက်ထပ်အများကြီးဖောက်ခံထားရသေးတယ်။ ။ပထမဖောက်တာ အစ်ကိုတို့ဆိုင်ပါတယ်။ အရီးတင်ထားတဲ့ပစ္စည်းတွေတင် သိန်းတစ်ရာဖိုး၊ ညီမ တင်ထားတာပါပေါင်းရင် ထောင်ကျော်မယ်။ တင်ထားတဲ့ပစ္စည်းတွေက သူတို့အကြိုက်တွေချည်းပဲ၊ ဆိုလာ၊ ဘက်ထရီ၊ မီးထွန်းတာတွေ” လို့ စျေးဆိုင်ခန်းဖောက်ခံရသူတစ်ဦးက ရှမ်းနီအသံကိုပြောဆိုပါတယ်။
အောက်တိုဘာ ၁၅ ရက်နေ့အတွင်း မြို့အတွင်းကို ပစ္စည်းဝင်ရောက်သယ်ယူဖို့ KIA+PDF တွေက မြို့ထဲဝင်ရောက်ခွင့်ပြုလိုက်ပေမယ့် တန်ဖိုးကြီးပစ္စည်းတွေဟာ ခိုးယူခံရတယ်လို့ ဒေသခံတွေက ဆိုကြပါတယ်။
ရှမ်းနီအသံကို ဆက်သွယ်ပြောဆိုမှုတွေထဲမှာ ဖုန်းဆိုင် ၊ ကုန်မာ နဲ့ ဆောက်လုပ်ရေးပစ္စည်း၊ လျှပ်စစ်ပစ္စည်းဆိုင် ၊ ရွှေဆိုင်များနဲ့ နေအိမ်တချို့ဖောက်ထွင်းခံခဲ့ရပြီး ကျပ်သိန်း ထောင်နှင့်ချီတန်ဖိုးရှိတယ်လို့ပြောဆိုကြပါတယ်။
ဗန်းမောက်မြို့ကို စက်တင်ဘာလ ၂၁ ရက်နေ့မှာ NUG ရဲ့ဒေသကာကွယ်ရေးတပ် PDF တွေနဲ့ KIA တို့ပူးပေါင်းပြီး မြို့ကိုအပြီးသတ်သိမ်းပိုက်ခဲ့တာဖြစ်ပါတယ်။
မြို့သိမ်းတိုက်ပွဲကာလအတွင်းမှာ ဒေသခံထောင်နဲ့ချီဟာ ဗန်းမောက်မြို့နယ် အနောက်ဘက်ခြမ်းနဲ့ မြောက်ဘက်ခြမ်းကို တိမ်းရှောင်ကြတာဖြစ်ပါတယ်။
“ ပြန်ရမယ်ဆိုရင်တော့ သေသေချာချာပြန်စစ်ကြည့်ရအုံးမယ် ဘာတွေမရှိတော့ဘူးဆိုတာ။ ဘာမှမရှိတော့ဘူးဆိုပြီးလာပြောကြတာလည်းရှိတယ်။ SNA ရှိတုန်းကတော့ ဒီလိုမရှိဘူး။ အဝတ်တစ်ထည်ကိုယ်တစ်ခုနဲ့ ပြေးခဲ့ရတော့” လို့ စစ်ဘေးရှောင်နေတဲ့ စားသောက်ဆိုင်ပိုင်ရှင် တစ်ဦးကပြောပါတယ်။
လက်ရှိမှာ ဗန်းမောက်မြို့အနီးမှာ စစ်ရေးတင်းမာနေဆဲဖြစ်ပြီး မြို့ပြန်လည်ရရှိရေးအတွက် SNA က တန်ပြန်ထိုးစစ်ဆင်နေတယ်လို့ဆိုပါတယ်။
ဒါ့အပြင် ဗန်းမောက်မြို့ရဲ့ အနောက်ဘက်ဒေသ ကြောင်လည်ကျေးရွာအနီးမှာလည်း တိုက်ပွဲတွေ ဆက်လက်ဖြစ်ပွားနေတယ်လို့ ဒေသခံတွေဆီကနေ သိရှိရပါတယ်။