ဇွန် ၅ ၊ မိုးကောင်း
လိုင်စင်မဲ့ယာဉ်များဖမ်းဆီးသွားမှာဖြစ်ကြောင်း စစ်ကောင်စီထုတ်ပြန်ပြီးနောက် ကချင်ပြည်နယ်အတွင်း ဝစ်တောက်ယာဉ်များအား စစ်ဆေးတင်းကြပ်ရာတွင် မော်ဒယ်မြင့်ယာဉ်များကိုသာ ပိုမိုဖမ်းဆီးနေကြောင်း ဒေသခံများထံမှ သိရပါတယ်။
“ ပင်းဘောမှာတော့ ရဲတွေဖမ်းတာပါ့ ဝစ်တောက်ကားဖမ်းတဲ့ဟာလည်း မော်ဒယ်နိမ့်တဲ့ကားတွေမမြင်ပါဘူး မော်ဒယ်မြင့်တဲ့ကားတွေပဲဖမ်းတာ အခုက’ဟု အဖမ်းအဆီးတင်းကြပ်နေတဲ့ မိုးကောင်းမြို့နယ် ပင်းဘောကျေးရွာနေသူတစ်ဦးက အခုလိုပြောပြပါတယ်။
မကြာသေးမီ ရက်ပိုင်းဖြစ်တဲ့ ဇွန်(၃)ရက်နေ့မှာ မြစ်ကြီးနားမြို့အတွင်းက Landcruiser (လင့်ခရူဆာ) ကား(၁)စီး၊ Harrier ကား(၁)စီး၊ Honda fit တစ်စီးနဲ့ Crown တစ်စီး စုစုပေါင်းလိုင်စင်မဲ့(၄)စီးတို့ကို မောင်းနှင်သူလူငယ်များနှင့်အတူ ဖမ်းဆီးခဲ့ကြောင်း စစ်ကောင်စီက ထုတ်ပြန်ထားပါတယ်။
လူငယ်အမျိုးသားများဖြစ်ကြတဲ့ ဆိုင်းတူးမိုင်၊ဂွမ်လတ်ဒူ၊ကျန်းဘောမ်နဲ့သီဟတို့လေးဦးနဲ့ ဝစ်တောက်ယာဉ်များကို တပ်ကုန်းရပ်ကွက်၊ပမ္မတီးရပ်ကွက်၊စီတာပူရပ်ကွက်တွေကနေ တွေ့ရှိဖမ်းဆီးခဲ့တာလို့ သိရပါတယ်။
“ အကောင်းဆုံးကတော့ ကချင်ပြည်နယ်ဆို ကချင်ပြည်နယ်အတွင်းမောင်းလို့ရတဲ့လိုင်စင်လေးတွေထုတ်ပေးရင်တော့ ကောင်းတာပါ့အေး လိုင်စင်ကားတွေကို စျေးလျှော့ပေးမယ်လို့တော့ပြောတာပဲ အခုကဖြင့်ကားတွေပါမကဘူး ဆိုင်ကယ်တွေလည်းဖမ်းမယ်ဆိုတော့ ဒီမှာစျေးရောင်းစျေးဝယ်တဲ့သူတွေ အခြေခံလူတန်းစားတွေက ဘယ်လိုလုပ်တော့မှာတုန်း’ဟု လိုင်စင်ယာဉ်များကို စျေးနှူန်းသက်သာစွာ ရောင်းချပေးသွားမယ်လို့ ပြောဆိုမှုတွေရှိကြောင်း မြစ်ကြီးနားမြို့သားတစ်ဦးက ဆိုပါတယ်။
စစ်ကောင်စီက နိုင်ငံအနှံ့က လိုင်စင်မဲ့ယာဉ်များကို သတင်းအတိအကျရရှိပါက အိမ်တိုင်ရာရောက် ဝင်ရောက်ဖမ်းဆီးမှာဖြစ်ကြောင်း သတိပေးပြောဆိုထားသော်လည်း ကချင်ပြည်နယ်မှာယနေ့ထိတော့ လမ်းမပေါ်များတွင်သာ ဖမ်းဆီးမှုရှိနေသေးကြောင်း မိုးကောင်းဒေသခံများထံမှ သိရပါတယ်။