နိုဝင်ဘာ ၁၈ ၊ စစ်ကိုင်း
စစ်ကိုင်းတိုင်း ဖက်ဒရယ်ယူနစ်ရဲ့ ဝန်ကြီးချုပ်အဖြစ် ဦးစိုးဦးကို ခန့်အပ်လိုက်တယ်လို့ စစ်ကိုင်းဖက်ဒရယ်ယူနစ်လွှတ်တော်က ထုတ်ပြန်လာပါတယ်။
ဦးစိုးဦးဟာ ၂၀၁၅ နဲ့ ၂၀၂၀ ခုနှစ် ရွေးကောက်ပွဲတွေမှာ အနိုင်ရရှိခဲ့တဲ့သူဖြစ်သလို စစ်ကိုင်းတိုင်းဒေသကြီးရဲ့ စီမံဘဏ္ဍန်ရေးဝန်ကြီး အဖြစ်လည်း တာဝန်ယူခဲ့သူတစ်ဦးဖြစ်တယ်လို့သိရပါတယ်။
ဒီလိုဆောင်ရွက်မှုဟာ ပထမဦးဆုံးသော ဖက်ဒရယ်ယူနစ်အစိုးရယန္တရားတစ်ခု စနစ်တကျ စတင်ပေါ်ပေါက်လာခြင်းလည်း ဖြစ်တယ်လို့ NUG ရဲ့ပြည်ထောင်စုဝန်ကြီး မန်းဝင်းခိုင်သန်းက ပြောပါတယ်။
“ ဒါဟာ တော်လှန်ရေးကာလအတွင်း ပထမဦးဆုံး ဖက်ဒရယ်ယူနစ်အစိုးရယန္တရားတစ်ခု စနစ်တကျ စတင်ပေါ်ပေါက်လာခြင်းလည်း ဖြစ်ပါတယ်။” လို့သူကပြောပါတယ်။
၆ ကြိမ်မြောက် စစ်ကိုင်းဖက်ဒရယ်ယူနစ်လွှတ်တော်အစည်းအဝေးကနေ ကြားကာလဖွဲ့စည်းပုံအခြေခံဥပဒေပုဒ်မ (၆၈)အရ ခန့်အပ်လိုက်တာလို့ ဆိုပါတယ်။
ကြားကာလအစိုးရအဖွဲ့ကို ဖွဲ့စည်းနိုင်ဖို့အတွက် စိစစ်ရွေးချယ်ရေးကော်မရှင်တစ်ရပ်ဖွဲ့စည်းရာမှာလည်း စစ်ကိုင်းတိုင်းထဲက နာဂ၊ ရှမ်းနီ၊ ကတူး၊ ကနန်း၊ ချင်း တိုင်းရင်းသားတို့ရဲ့ သဘောထားဆန္ဒတွေကိုလည်း ရယူစုစည်းခဲ့တာဖြစ်တယ်လို့သိရပါတယ်။
ဒီဖက်ဒရယ်ယူနစ်လွတ်တော်မှာ အဖွဲ့ဝင် ၂၉ ဦးပါဝင်ပြီး ရှမ်းတိုင်းရင်းသားနဲ့ ချင်းတိုင်းရင်းသား ကိုယ်စားလှယ် ၂ ဦးပါဝင်တယ်လို့သိရပါတယ်။
စစ်ကိုင်းတိုင်းဒေသကြီးဟာ PDF တပ်ဖွဲ့တွေက ဗန်းမောက် ၊ အင်းတော်မြို့ ၊ ခမ်းပတ်မြို့ ၊ မော်လူးမြို့၊ပင်လည်ဘူးမြို့တို့ကို ထိန်းချုပ်စိုးမိုးထားတာဖြစ်ပြီး တခြားသောမြို့နယ်က ကျေးလက်ဒေသတွေကို ထိန်းချုပ်ထားတာလည်းဖြစ်ပါတယ်။