မတ် ၅ ၊ မိုးမောက်
ဗန်းမော်ခရိုင်အတွင်းမှာ စစ်ကောင်စီတပ်နဲ့ ကချင်လွတ်မြောက်ရေးတပ် KIA ၊ KPDF ပူးပေါင်းတပ်တို့ကြား စစ်ရေးတင်းမာမှုတွေကြောင့် ကျေးလက်ဒေသနေသူတွေဟာ မြို့ပေါ်ကို ရွေ့ပြောင်းနေကြတယ်လို့ စုံစမ်းသိရရှိရပါတယ်။
ဗန်းမော်ခရိုင် မိုးမောက်မြို့နယ် မြို့သစ်မြို့၊ ကုန်းနှော၊ စီဟဲ စတဲ့ ကျေးရွာက သက်ကြီးရွယ်အိုနှင့် ကလေးတွေက ဗန်းမော်မြို့ပေါ်ကို ပြောင်းရွေ့မှုတွေ ပြုလုပ်နေကြတယ်လို့ဆိုပါတယ်။
“ လောလောဆယ် ရွေ့နေကြတယ်၊ စပါးတွေရောင်းနေကြတယ်၊ အသက်ကြီးတဲ့သူတွေနှင့် ကလေးတွေကို အရင်လာထားတယ်” လို့ ဗန်းမော်ဒေသခံတစ်ဦးက ပြောပါတယ်။
ခမရ ၃၆၇ စခန်းနဲ့နီးတဲ့ မြို့သစ်၊ကုန်းနှော၊ စီဟက် စတဲ့ကျေးရွာတွေက မိသားစုပိုင် စပါးတွေရောင်းပြီး တိမ်းရှောင်ကြတာတွေလဲ ရှိနေတယ်လို့လဲ သိရပါတယ်။
KIA တပ်က စစ်ကောင်စီကို မတ်လ ၃ ရက်နေ့ နောက်ဆုံးထားပြီး အလံဖြူထောင်ဖို့ သတိပေးထားပြီး လက်ရှိချိန်ထိ ၎င်းစစ်တပ်က အလံဖြူထောင်ခြင်းမရှိသေးတာကြောင့် တိုက်ပွဲဖြစ်ပွားလာမှာကို ဒေသခံတွေ စိုးရိမ်ကာ ရွေ့ပြောင်းတာဖြစ်တယ်လို့ ဆိုပါတယ်။
“ သုံးရက်နေ့မှာ မင်းတို့လက်နက်ချ အလံဖြူထောင်၊ မထောင်ရင်တိုက်မယ်၊ ဆိုတော့ ရွာတွေကျတော့ စစ်တပ်နှင့်နီးတဲ့ရွာတွေကတော့ ရှောင်ကြပီ ကြားညှပ်မှာစိုးလို့” လို့ ဒေသခံတစ်ဦးပြောပြပါတယ်။
၂၀၂၁ ခုနှစ်မှာလည်း ကုန်းနှော၊ မြို့သစ်၊ စီဟက် စတဲ့ဒေသက ဒေသခံတွေဟာ စစ်ကောင်စီနှင့် KIA တို့ရဲ့ တိုက်ပွဲကြောင့် လနှင့်ချီကြာ စစ်ဘေးတိမ်းရှောင်ခဲ့ကြရတာလည်းဖြစ်ပါတယ်။
ဗန်းမော်ခရိုင်အတွင်းက မံစီ၊ ရွှေကူ ၊ မိုးမောက်မြို့နယ်အတွင်းမှာ စစ်ကောင်စီတပ်နှင့် KIA+PDF ပူးပေါင်းတပ်တို့ကြား တိုက်ပွဲမကြာခဏဖြစ်ပွားနေပြီး စစ်ကောင်စီရဲ့တပ်စခန်း လေးခုထက်မနည်း သိမ်းပိုက်ခံခဲ့ရတာလည်းဖြစ်ပါတယ်။