ဟုမ္မလင်းမြို့နယ်ထုံမာတဲကျေးရွာအနီးချင်းတွင်းမြစ်ထဲရွှေမျှောတူးဖော်မှုကိုဒေသခံတွေကန့်ကွက် 

ထုံမာတဲကျေးရွာအနီး ချင်းတွင်းမြစ်အတွင်း ရွှေမျှောတိုက်ဖို့ ပြင်ဆင်နေမှုများ

မေ ၁၀ ၊ ဟုမ္မလင်း 

ဟုမ္မလင်းမြို့နယ် ထုံမာတဲကျေးရွာအနီးရှိ ချင်းတွင်းမြစ်ထဲမှာ ရွှေမျှောတူးဖော်မှုကို ဒေသခံတွေက ကန့်ကွက်နေကြတယ်လို့ဆိုပါတယ်။ 

“ အခုဆိုရင်ကျွန်တော်တို့တွေ ၁၂ ရာသီလောက်စိုက်ပျိုးလုပ်ကိုင်စားသောက်နေတာဗျ။ အဲ့မှာမျှောတိုက်လိုက်လို့ရင် ကမ်းပါးပြိုပြီးတော့မှ သဲဖို့သွားရင် ကျွန်တော်တို့တောင်သူလယ်သမားတွေက အခက်အခဲဖြစ်ကုန်မှာစိုးလို့ တောင်သူလယ်သမားတွေရဲ့ ကန့်ကွက်လွှာနဲ့တကွ တင်ပြရခြင်းဖြစ်ပါတယ်ခင်ဗျာ” ဒီကန့်ကွက်မှုနဲ့ ပတ်သက်ပြီး ဦးဆောင်သူ ဒေသခံတစ်ဦးက ပြောပါတယ်။  

လက်ရှိအချိန်မှာ မျှောတွေက လေးဖောင်လောက် စမ်းသပ်တူးဖော်မှုတွေကို မေလ (၆) ရက်ကစတင် ပြုလုပ်နေတာဖြစ်တယ်လို့လည်းသိရပါတယ်။

ဒီမျှောလုပ်ငန်းအတွက် ဟုမ္မလင်းမြို့နယ် အုပ်ချုပ်ရေးဌာန နဲ့  သက်ဆိုင်ရာတွေက ချထားပေးတာဖြစ်တယ်လို့ စုံစမ်းသိရှိရပါတယ်။ 

ရွှေမျှောတွေကြောင့် အနီးနားက လယ်ဧက နှစ်ရာဝန်းကျင်ထိခိုက်ပျက်စီးမှာဖြစ်ပြီးတော့ ရေရှည်ဆိုရင် ထောင်နဲ့ချီပျက်စီးနိုင်တဲ့အနေအထားမှာရှိနေတယ်လို့ သိရပါတယ်။ 

ရွှေမျှောလုပ်ကိုင်နေတဲ့နေရာကလည်း ကမ်းပါးပြိုမှုကြောင့် နှစ်စဉ်ကမ်းထိန်းနံရံတွေပြုလုပ်ရတဲ့နေရာနဲ့ ပေတစ်ရာအကွာမှာသာရှိတယ်လို့လည်း ပြောပါတယ်။ 

“ တင်ပြီးတဲ့နောက်ပိုင်းက ဘာမှထူးခြားမှုမရှိဘူး ၊ မျှောတန်းလို့ တိုက်နေတော့တာဗျာ့ ။ ကျွန်တော်တို့လည်း ဒီအတိုင်းကြည့်နေတော့တာ ။ ဘာမှလုပ်လို့မရတဲ့အဆင့်လိုဖြစ်နေတော့ ကျွန်တော်တို့လည်းဘာမှမတတ်နိုင်။ တတ်နိုင်တဲ့အဆင့်ထိတော့လုပ်ပေးတာပေါ့။ ကျွန်တော်တို့အခြေခံတောင်သူတွေကတော့ ရွှေမျှောလာမတိုက်ခိုင်းစေချင်ဘူးဆိုတဲ့ ဆန္ဒရှိကြတယ်” ဒေသခံတစ်ဦးကပြောပါတယ်။ 

ဒေသခံတွေက  ရွှေမျှောမတိုက်ဖို့အတွက် လက်မှတ်ရေးထိုးကန့်ကွက်စာကို ဧပြီလမှာတစ်ကြိမ် မေလမှာတစ်ကြိမ် မြို့နယ်စစ်ကောင်စီကိုတင်ပြခဲ့တယ်လို့ သိရပါတယ်။ 

Leave a Reply

Your email address will not be published. Required fields are marked *