ဇွန် ၁၀ ၊ အင်းတော်ကြီး
အင်းတော်ကြီးဒေသ မမုန်ကိုင်ကျေးရွာရဲ့ ရွာပိုင် စာသင်ကျောင်းနဲ့ ဘောလုံးကွင်းမှာ ရွှေတူးဖော်မှုတွေ စတင်လာတာကြောင့် ကျေးရွာခံတွေက လုပ်ငန်းရှင်တွေနဲ့ လုပ်ခွင့်ပေးတဲ့သူတွေကို ဆန္ဒထုတ်ဖော်မှုတစ်ခု ပြုလုပ်ခဲ့ပါတယ်။
ဇွန်လ ၈ ရက်နေ့ မနက်ပိုင်းမှာ ကျေးရွာအတွင်းက ဘောလုံးကွင်းမှာ ရွာသားများစုဝေးပြီး သာသနာနယ်မြေမကျူးကျော်ရေး၊ ကျေးရွာပိုင်မြေတွေ မကျူးကျော်ရေး စတဲ့ ကြွေးကြော်သံတွေနဲ့ ဆန္ဒထုတ်ဖော်ခဲ့ကြပါတယ်။
၂၀၂၅ ခုနှစ် ဖေဖော်ဝါရီလာမှာ ရွှေတူးဖော်ဖို့အတွက် KIA တပ်မဟာ (၉) နဲ့ လုပ်ငန်းရှင်တွေက ညှိနှိုင်းပြီး ရွှေတူးဖော်နိုင်ရေး အကွက်ရိုက်ထားမှုတွေရှိထားပြီး လေးလအကြာမှ စတင်ပြီးလုပ်ကိုင်လာတာဖြစ်တယ်လို့ ဒေသခံတွေဆီကနေ သိရပါတယ်။
“ ညှိတာအကွက်တွေဆွဲတာကတော့ နှစ်လပိုင်းလောက်ကကြီးနဲ့၊ မထိသေးမလုပ်သေးတော့မအော်ကြသေးဘူး။ အခုကကြတော့ စလုပ်လာလို့။ ဦးဆောင်တဲ့သူကိုလည်း KIA က လိုက်နေတယ်။ တစ်ရွာလုံးလုပ်ကြ( ဆန္ဒပြ)တော့ ဦးဆောင်သူရှာမရဖြစ်နေတာပေါ့”လို့ ဆန္ဒပြပြီးနောက်ပိုင်း အခြေအနေကို ရွာသားတစ်ဦးက ပြောပါတယ်။
မမုန်ကိုင်ကျေးရွာအတွင်းက လယ်ကွက်များ၊ အိမ်ယာဝင်းများ နှင့် နေအိမ်များကို လုပ်ငန်းရှင်များက စျေးအဆမတန်ပေးဝယ်ပြီး ရွှေလုပ်ငန်းလုပ်ကိုင်နေကြတာလည်းဖြစ်ပါတယ်။
လက်ရှိမှာ မမုန်ကိုင်ကျေးရွာနဲ့ အနီးပတ်ဝန်းကျင်မှာပါ ရွှေတူးဖော်မှုကြောင့် ဆိုးဆိုးရွားရွားပျက်စီးနေပြီး ထိန်းသိမ်းမှုတွေ လုပ်ကိုင်ခွင့်မရကြောင်း တက်ကြွတဲ့ ရှမ်းနီလူငယ်တစ်ဦးက ပြောပါတယ်။
“ တော်တော်ပျက်စီးနေပြီ။ အခုကလည်း ညှိကြတယ်။ ဘောလုံးကွင်း၊စာသင်ကျောင်းကို ပတ်ကားပြန်လုပ်ပေးမယ်ပေါ့၊ ဒါပေမယ့်ရွာသားတွေက လက်မခံတာ၊ လက်ရှိလုပ်ကြတဲ့ လုပ်ငန်းရှင်တွေက ဝယ်လုပ်ကြတာရွားနားက လယ်ဆိုလဲပိုင်ရှင်တွေရှိတော့ အိမ်တွေလည်းဆိုပိုင်ရှင်နဲ့ညှိဝယ်ကြတာလုပ်ကြတာပြဿနာမရှိဘူး။ အခုက ရွာပိုင်မြေဖြစ်လို့ ဘယ်သူမှမပိုင်ဘူး” လို့ သူက ဆိုပါတယ်။
မမုန်ကိုင်ကျေးရွာအနီးတဝိုက်မှာ ရွှေတူးဖော်မှုတွေဟာ ၂၀၂၂ ခုနှစ်မှစပြီး လမ်းများ၊ လယ်ကွက်များအတွင်းထိပါ တူးဖော်ကြပြီး ဒေသအာဏာပိုင်များ၊ လက်နက်ကိုင်တပ်ဖွဲ့များက ထိန်းကွပ်နိုင်ခြင်းမရှိတဲ့ အခြေအနေတစ်ရပ်ဖြစ်တယ်လို့ သိရပါတယ်။
အင်းတော်ကြီးဒေသဟာ ၂၀၁၆ ခုနှစ်မှာ ယူနက်စကိုလ် စာရင်းဝင်ခဲ့တာဖြစ်ပြီး သဘာဝပတ်ဝန်းကျင်ထိန်းသိမ်းမှုလုပ်ငန်းတွေဟာ ၂၀၂၁ ခုနှစ်နောက်ပိုင်းကစလို ဆုတ်ယုတ်လာခဲ့တယ်လို့ ဒေသခံတွေက ပြောဆိုနေကြပါတယ်။