ဖေဖော်ဝါရီ (၂၄)၊ မြစ်ကြီးနား
တိုက်ခိုက်ခံရမှုတွေကြောင့် လေယာဉ်နဲ့ ရပ်နားနေရာတချို့ပျက်စီးခဲ့တဲ့ မြစ်ကြီးနားလေဆိပ်ကို ပြန်ဖွင့်နိုင်ဖို့ အတွက် အမြန်ပြုပြင်နေတယ်လို့ ကာလုံက မနေ့က ဖေဖော်ဝါရီ(၂၃)မှာ အသိပေးစာထုတ်ပြန်ခဲ့ပါတယ်။
မြစ်ကြီးနားလေဆိပ်မှာ ဖေဖော်ဝါရီ (၂၀) ရက်နေ့ည (၈) နာရီခွဲအချိန်က ခရီးသည်တင်လေယာဉ်တစ်စင်း FPV suicide drone ထိမှန်ခဲ့ပြီး လေယာဉ်ရပ်နားနေရာပျက်စီးခဲ့မှုကြောင့် ပျံသန်းမှုခေတ္တရပ်နားထားတာလည်းဖြစ်ပါတယ်။
မြေပြင်မှာတော့ လေဆိပ်ကို သုံးလကြာပိတ်ထားမယ်လို့ တိုက်ခိုက်ခံရပြီး တစ်ရက်အကြာမှာ သတင်းတွေထွက်ပေါ်ခဲ့ပါတယ်။
အခုရက်ပိုင်းမှာတော့ လေကြောင်းလိုင်းတွေက လက်မှတ်ရောင်းချမှုတွေကို ပြန်လည်စတင်မှုတွေရှိနေပြီး လကုန်ပိုင်းမှာ စတင်ပြေးဆွဲသွားမယ်လို့ ပြောဆိုနေကြပါတယ်။
မြစ်ကြီးနားလေဆိပ်ပိတ်ထားရတာကြောင့်လည်း လေကြောင်းမှ သယ်ယူနေရတဲ့ ကုန်စည်ပြတ်လပ်မှုတွေ ဖြစ်ပေါ်လာပြီး စျေးနှုန်းကြီးမြင့်မှုတွေလည်း ဖြစ်ပေါ်လာနေတယ်လို့ ဒေသခံတွေက ပြောဆိုကြပါတယ်။
ခရီးသည် (၇၀) ကျော်လိုက်ပါမယ့် မြန်မာအမျိုးသားလေကြောင်းလိုင်း(MNA) ART-72-600 ဟာ မြစ်ကြီးနားကနေ မန္တလေးကို ထွက်ခွာမယ့်အချိန် ပြေးလမ်းပေါ်မှာ တိုက်ခိုက်ခံရတာဖြစ်ပြီး ခေါင်းပိုင်းနဲ့ နောက်မြှီးပိုင်းများတွင် ဗုံးစများထိမှန်ကာ ထိခိုက်ပျက်စီးခဲ့တာပါ။
မြစ်ကြီးနားမြို့ အပါအဝင် ကချင်ပြည်နယ်အတွက် ဒီလေဆိပ်က ခရီးသွားလာရေးနဲ့ ကုန်စည်သယ်ယူပို့ဆောင်ရေးမှာ ( ၂၀၂၃ )ခုနှစ် နောက်ပိုင်း ပိုမိုအရေးပါလာတာလည်းဖြစ်ပါတယ်။
မြေပြင်လမ်းပိုင်းအနေနဲ့ ကချင်ပြည်နယ်အတွက် တင်ပို့တဲ့ ကုန်စည်တင်ကားတွေအားလုံးဟာ စစ်ရေးပဋိပက္ခပြင်းထန်နေတဲ့ စစ်ကိုင်းတိုင်းထဲကို ဖြတ်သန်းရပြီး ကွင်းလမ်း နဲ့ တိုက်ပွဲတွေကြောင့် ခရီးစဉ်တစ်ခုကို တစ်လနီးပါးကြာမြင့်တာလို့ ကုန်တင်ယာဉ်မောင်းတွေက ရှမ်းနီအသံကို ပြောဆိုခဲ့ဖူးပါတယ်။