မေ ၆ ၊ တောင်ကြီး
ရှမ်းနီရှေးဟောင်းစာပေ ပုရပိုက် သုံးဆူကို ရှမ်းပြည်နယ် ဗုဒ္ဓတက္ကသိုလ်(Shan State Buddhist University)ထံ ရှမ်းနီစာပေယဉ်ကျေးမှုအဖွဲ့တွေက ဦးဣန္ဒာစာရမှတစ်ဆင့် အပ်နှံလှူဒါန်းလိုက်တယ်လို့သိရပါတယ်။
၎င်းပုရပိုဒ် သုံးဆူကို မေလ (၁) ရက်နေ့က ဟုမ္မလင်းမြို့မှာ သက်ဆိုင်ရာ ရှမ်းနီစာပေယဉ်ကျေးမှုများကိုယ်စား စိုင်းသိန်းဝင်းမှ ရှမ်းပြည်ဗုဒ္ဓတက္ကသိုလ် (SSBU) ထံ လှူဒါန်းလိုက်တာလည်းဖြစ်ပါတယ်။
“ပူဖုန်းဆာ” ရေးသည့် ဝေဿန္တရာဇာတ်တော်ပုရပိုက် ဗုဒ္ဓဝင် ပုရပိုက်၊ မြန်မာသက္ကရာဇ် ၁၂၆၉ခုနှစ် ပြာသိုလဆန်း(၂)ရက်နေ့ နေ့လွဲနှစ်ချက်တီးအချိန်မှာ “ပူစိန်” ရေးသားသည့် အဘိဓမ္မာ(၇)ကျမ်းပုရပိုက် တို့ကို လှူဒါန်းလိုက်တာဖြစ်တယ်လို့လည်း သိရပါတယ်။
“ နိုင်ငံတကာ ဒေသအသီးသီးက စာတမ်းပြုစုရေးသားလိုတဲ့ ပုဂ္ဂိုလ်တွေ၊ အဲ့ရှမ်းဗုဒ္ဓတက္ကသိုလ်မှာ အခြားသောရှမ်းစာတွေရဲ့ ပုရပိုက်တွေရှိပေမယ့် ရှမ်းနီတိုင်းရင်းသားစာပေပုရပိုက်မရှိသေးတာက တစ်ကြောင်းပေါ့နော့်” လို့ ရှမ်းနီစာပေ ပုရပိုဒ်လှူဒါန်းသူ စိုင်းသိန်းဝင်းက ပြောပါတယ်။
ရှမ်းပြည်နယ် ဗုဒ္ဓတက္ကသိုလ်ကလည်း ပြီးခဲ့တဲ့ ၂၀၁၉ ခုနှစ် ဇန်နဝါရီလက နိုင်ငံတကာ ရှေးဟောင်းစာပေတွေကို ထိန်းသိမ်းစောင့်ရှောက်ရေးလုပ်ငန်းကျွမ်းကျင်သူ ဒေါက်တာဒေးဗစ်ဝါတန် (Dr. David Whorton) ရဲ့အကူညီဖြင့် ရှမ်းနီရှေးဟောင်းပုရပိုက် စာပေတွေကို ဒီဂျစ်တယ်လိုက်ဇေးရှင်း မှတ်တမ်းပြုစုရာမှာ ပါဝင်ကူညီပေးခဲ့တယ်လို့လည်း သိရှိရပါတယ်။
လက်ရှိချိန်မှာ ရှေးဟောင်းရှမ်းနီစာပေ ဖတ်တတ်သူနှင့် ပုရပိုက်ရွတ်တတ်သူ အလွန်းနည်းပါးလာပြီး လက်ဆင့်ကမ်းသင်ယူဖို့လိုအပ်နေတယ်လို့ ၎င်းက ဆက်ပြောပြပါတယ်။
အဆိုပါလှူဒါန်းလိုက်သည့် ရှေးဟောင်းရှမ်းနီစာပေ ပုရပိုက် သုံးဆူကို ရှမ်းပြည်နယ် ဗုဒ္ဓတက္ကသိုလ် စာကြည့်တိုက်ဌာနမှာ ဆက်လက်ထိန်းသိမ်းထားရှိကြမှာဖြစ်တယ်လို့ ကနဦးသိထားရပြီး နိုင်ငံတကာနှင့် ဒေသအသီးသီးမှ စာပေလေ့လာလိုသည့် ပညာရှင်များ လေ့လာနိုင်ဖို့အတွက် ရည်ရွယ်ထားတယ်လို့သိရပါတယ်။