မတ်လ ၃၊ ရန်ကုန်
အကြမ်းဖက်မှုပုဒ်မတွေနဲ့ လွတ်ပေးသူ ၇ ထောင်ကျော်အနက် ၂၀၀ ကျော်ခန့်သာစာရင်းရရှိသေးလို့ နိုင်ငံရေးအကျဉ်းသားများ ကူညီစောင့်ရှောင့်ရေးအသင်း (AAPP )က ဆိုပါတယ်။
အကြမ်းဖက်တိုက်ဖျက်ရေးဥပဒေပုဒ်မ ၅၀ (ည) နဲ့ ပုဒ်မ ၅၂ (က) တို့ အကျဉ်းချခံထားရသူ အကျဉ်းသား (၇၃၃၇ ) ဦးကို မနေ့က မတ်လ (၂ )ရက်နေ့ တောင်သူလယ်သမားနေ့မှာ လွတ်ပေးခဲ့ပြီး လွတ်မြောက်သူစာရင်းများအရ အကျဉ်းထောင် (၉) ထောင်မှ (၂၄၆) ဦးရဲ့ စာရင်းသာရရှိထားကြောင်းဆိုပါတယ်။
မနေ့က ညနေ (၄ ) နာရီ အထိ ကောက်ယူထားတဲ့ စာရင်းဖြစ်တယ်လို့သိရပြီး အဲဒီထဲမှာမှ (၁၀၄) ဦး ရဲ့ အမည်စာရင်းကိုသာ အတည်ပြုနိုင်ခဲ့တယ်လို့ သိရပါတယ်။
အလားတူ ဒီကနေ့ မတ်လ ၃ ရက်နေ့ နေ့ခင်း(၁) နာရီအတွင်း အကျဉ်းထောင် (၃၁ ) ခုမှ အကျဉ်းသား (၃ )ထောင်ကျော်ဝန်းကျင် ကိုလည်း ထပ်မံလွတ်ပေးခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) က ထုတ်ပြန်ထားတာဖြစ်ပါတယ်။
AAPP ကတော့ လွတ်ငြိမ်းစာရင်းတွေကိုအတည်ပြုနေဆဲဖြစ်ပြီး ဒီအပတ်အတွင်း ထပ်လွတ်ဖို့ရှိအုံးမလားဆိုတာ စောင့်ကြည့်နေဆဲဖြစ်တယ်လို့ ဆိုထားပါတယ်။
၂၀၂၁ ခုနှစ်ကစလို့ လက်ရှိအချိန်အထိ ဖမ်းဆီးခံရပြီး သေဆုံးခဲ့သူ စုစုပေါင်း ( ၂၂၃၅ ) ဦးရှိပြီး ဒီအရေအတွက်ထဲတွင် အကျဉ်းထောင်များအတွင်း သေဆုံးသူ (၁၉၇) ဦး ရှိခဲ့တယ်လို့ သိရပါတယ်။