ငလျင် ကယ်ဆယ်ရေးလာကူညီကြသည့် နိုင်ငံတကာအဖွဲ့တချို့ နေရပ်ပြန်

ဧပြီ ၉ ၊ မန္တလေး

မန္တလေး ၊ နေပြည်တော် နဲ့ စစ်ကိုင်းမြို့တွေမှာ ငလျင်ကယ်ဆယ်ရေး လာရောက်ကူညီကယ်ဆယ်ကြတဲ့ နိုင်ငံတကာအဖွဲ့တချို့က ရှာဖွေရေးလုပ်ငန်း တချို့ပြီးဆုံးသွားတာကြောင့် နေရပ်ပြန်ကြပြီဖြစ်တယ်လို့သိရပါတယ်။

ဧပြီလ ၈ ရက်နေ့မှာ တရုတ်နိုင်ငံက လာရောက်ကူညီတဲ့ ကူညီကယ်ဆယ်ရေးအဖွဲ့ ၄ ဖွဲ့ဟာ နေရပ်ပြန်သွားခဲ့ပြီလို့ စစ်ကောင်စီက ထုတ်ပြန်ပါတယ်။

ငလျပ်လှုပ်ခတ်ပြီး တစ်ရက်ကျော်အကြာမှာ တရုတ်နိုင်ငံက ကူညီကယ်ဆယ်ရေးအဖွဲ့ China International Search and Resuce team (CISAR) ၊ Blue Sky Rescue (BSR) ၊ Hong Kong China Search and Rescue Team စတဲ့ လေးဖွဲ့မှ လူအင်အား ၂၆၅ ဦးက ပါဝင်ကူညီခဲ့ကြတာလည်းဖြစ်ပါတယ်။

ဒါ့အပြင် တခြားသော အာဆီယံနိုင်ငံတွေ ၊ အာရှနိုင်ငံတွေက ကူညီကယ်ဆယ်ရေးတပ်ဖွဲ့တွေ စေလွှတ်ခဲ့ပြီး နိုင်ငံ ၁၃ နိုင်ငံက ရှာဖွေကယ်ဆယ်ရေးအဖွဲ့ ၁၃ ဖွဲ့ကျော် လာရောက်ကူညီခဲ့ပါတယ်။

ကုလသမဂ္ဂကတော့ နိုင်ငံတကာ ကူညီကယ်ဆယ်ရေးအဖွဲ့တွေရဲ့ ကျွမ်းကျင်မှုတွေကြောင့် အသက်ရှင်ကျန်နေသေးသူတွေကိုကယ်ထုတ်ရေးနဲ့ ဘေးဒဏ်သင့်သူတွေ ရဲ့ ဒုက္ခအရောက်ဆုံး နာရီပိုင်းအတွင်း ကယ်ဆယ်ရေးအတွက် အရေးပါခဲ့တယ်လို့ ထုတ်ပြောထားပါတယ်။

ပြည်တွင်းက ကူညီကယ်ဆယ်ရေးအဖွဲ့တွေရဲ့ပြောဆိုမှုတွေမှာ နိုင်ငံတကာရဲ့ နည်းပညာအကူအညီများစွာ နဲ့ ကျွမ်းကျင်မှုတွေဟာ အားသာချက်ရှိတယ်လို့ မှတ်ချက်ပြုကြပါတယ်။

“ သူတို့ဆီမှာ နည်းပညာနဲ့လာတာဆိုတော့လေ။ သူတို့ကျတော့ အလွယ်တကူပြောရမယ်ဆိုရင် တိုက်ပိနေတဲ့အလောင်းတွေဆိုရင် စက်ကိရိယာတွေနဲ့ စမ်းတာဆိုတော့ အလောင်းတွေဘယ်နားမှာဘယ်နှစ်လောင်းရှိတယ် သူတို့ရဲ့အားသာချက်က အဲ့လောက်ပါပဲ။ ကျန်တာကတော့ တိုက်ဖြိုတာကအစ ကယ်ထုတ်တာက သူတို့နဲ့ ကိုယ်တွေက တူတူပဲ။ ကွာခြားမှုတော့မရှိပါဘူး။ သူတို့က ထွေထွေထူးထူးပြောစရာမရှိဘူးလေနော်။ ဒို့ဗမာပြည်မှာက စက်ကိရိယာ နဲ့ နည်းပညာအပိုင်း ထွန်းကားမှုအားနည်းတယ်လေနော်။ သူတို့ကစက်ကိရိယာ နည်းပညာနဲ့လာတာဆိုတော့ အလောင်းတွေရှာတဲ့နေရာမှာ အားသာတာပေါ့”​လို့ တရုတ်၊ ဘယ်လာရုစ်နိုင်ငံက ကယ်ဆယ်ရေးအဖွဲ့တွေနဲ့ တွဲလုပ်ကိုင်နေတဲ့ ပြည်တွင်းကယ်ဆယ်ရေးသမားတစ်ဦးက ဆိုပါတယ်။

စစ်ကောင်စီရဲ့အဆိုအရ နိုင်ငံတကာ ကူညီကယ်ဆယ်ရေးအဖွဲ့တွေက အသက်ရှင်လျက် ၆၅၃ ဦး ၊ အသက်သေဆုံးသူ ၇၀၀ ဦးကို ရှာဖွေခဲ့တယ်လို့ ဧပြီလ ၇ ရက်နေ့မှာ ပြောဆိုခဲ့ပါတယ်။

လက်ရှိအချိန်မှာတော့ တရုတ် ၊ အိန္ဒိယ ၊ ဗီယက်နမ် နိုင်ငံက ရှာဖွေကူညီကယ်ဆယ်ရေးအဖွဲ့တွေ ပြန်လည်ထွက်ခွာသွားပေမယ့် ငလျင်ဘေးဒဏ်သင့်သူတွေအတွက် ဆေးရုံများ ၊ တခြားအကူအညီများကို ဆက်လက် လုပ်ကိုင်ပေးနေဆဲလည်းဖြစ်ပါတယ်။

ငလျင်ကြောင့် နောက်ဆုံးရရှိထားတဲ့စာရင်းတွေအရ သေဆုံးသူ ၃၅၅၀ ဦး ၊ ဒဏ်ရရှိသူ ၄၈၁၄ ဦး ၊ ပျောက်ဆုံးနေသူ ၁၆၀ ဦးရှိနေပြီလည်းဖြစ်ပါတယ်။

ပြိုပျက်စီးနေတဲ့စာရင်းမှာတော့ လူနေအိမ်ပေါင်း ၄၈၈၃၄ အိမ် ၊ ဘုန်းကြီးကျောင်းနဲ့ သီလရှင်ကျောင်း ၃၀၉၄ ကျောင်း ၊ စာသင်ကျောင်း ၂၀၄၅ ကျောင်း ၊ ရုံး နှင့်အဆောက်အဦး ၂၁၇၁ လုံး ၊ တံတား ၁၄၈ စင်း ၊ ဘုရား၊စေတီ ၅၂၇၅ ခု ထိခိုက်ပျက်စီးခဲ့ပါတယ်။