ဇန်နဝါရီ ၁၆ ၊ ဟုမ္မလင်း
စစ်ကိုင်းတိုင်းဒေသကြီးအတွင်းမှာ ကျင်းပပြီးစီးခဲ့တဲ့ အပိုင်း(၁) နဲ့ အပိုင်း (၂)ရွေးကောက်ပွဲတွေဆီကနေ အချိုးကျကိုယ်စားပြုစနစ် (PR) အရ ရွေးချယ်ခံရသူ (၄၁) ဦးရှိတယ်လို့ ရွေးကောက်ပွဲကော်မရှင်ရဲ့ စာရင်းအရ သိရပါတယ်။
PR စနစ်အရ ရွေးချယ်ခံရတဲ့ ပါတီဟာလည်း ကြံ့ခိုင်ရေးနဲ့ဖွံ့ဖြိုးတိုးတက်ရေးပါတီ (USDP) က (၂၁) ဦးနဲ့ အများဆုံးဖြစ်ပြီး ဒုတိယအနေနဲ့ တိုင်းရင်းသားစည်းလုံးညီညွတ်ရေးပါတီ (တစည) က (၁၀) ဦးရရှိခဲ့တာဖြစ်ပါတယ်။
တိုင်းရင်းသားပါတီတွေထဲက ရှမ်းနီပါတီဖြစ်တဲ့ (SSP) ပါတီက ကိုယ်စားလှယ် (၂ )ဦး ၊ ကျားဖြူပါတီက (၃) ဦး ၊ နာဂအမျိုးသားပါတီက ( ၃) ဦး နဲ့ ပြည်သူ့ပါတီက (၁) ဦးစီ ရရှိထားတာလည်းဖြစ်ပါတယ်။
PR စနစ်ကို အမျိုးသားလွှတ်တော် မဲဆန္ဒနယ်မြေ နဲဲ့ တိုင်းဒေသကြီးလွှတ်တော် မဲဆန္ဒနယ်မြေတွေမှာ ကျင်းပခဲ့တာလည်းဖြစ်ပါတယ်။
အပိုင်း (၁) မှာ စစ်ကိုင်းတိုင်းဒေသကြီးထဲက မြို့ကြီးတွေဖြစ်တဲ့ စစ်ကိုင်း၊ မုံရွာ ၊ကလေး နဲ့ စစ်ကိုင်းတိုင်းအထက်ပိုင်းဒေသက ခန္တီး၊ ဟုမ္မလင်း ၊ ကသာ ၊ နာဂကိုယ်ပိုင်အုပ်ချုပ်ခွင့်ရဒေသက မြို့တွေမှာ ကျင်းပခဲ့တာပါ။
အပိုင်း (၂)မှာတော့ ကျေးလက်ဒေသတွေမှာ တိုက်ပွဲတွေပြင်းထန်ပြီး စစ်တပ်က နယ်မြေစိုးမိုးမှုနည်းလာတဲ့ မြို့တွေဖြစ်တဲ့ ဝန်းသို၊ဖောင်းပြင် ၊ ကလေးဝ ၊ မင်းကင်း ၊ ရေဦး၊ ကျွန်းလှ စတဲ့မြို့တွေပါဝင်ခဲ့တာလည်းဖြစ်ပါတယ်။
ကျင်းပပြီးစီးခဲ့တဲ့ ရွေးကောက်ပွဲတွေမှာလည်း ကြံ့ခိုင်ရေးပါတီက လွှတ်တော်ကိုယ်စားလှယ်လောင်း အများဆုံးအနိုင်ရရှိနေခဲ့ပြီး တိုင်းရင်းသားဒေသတချို့သာ အနိုင်မရရှိခဲ့တာလည်းဖြစ်ပါတယ်။
ရွေးကောက်ပွဲရဲ့ နောက်ဆုံးအပိုင်းကိုလည်း လာမယ့် ဇန်နဝါရီ (၂၅) ရက်နေ့မှာ ကျင်းပသွားမှာဖြစ်ပြီး စစ်ကိုင်းတိုင်းထဲက ကနီမြို့နယ်နဲ့ ဆားလင်းကြီးမြို့နယ်တွေမှာသာကျင်းပသွားမှာဖြစ်ပါတယ်။
စစ်ကိုင်းတိုင်းထဲက NUG ထိန်းချုပ်မြို့နယ်တွေဖြစ်တဲ့ ပင်လည်ဘူး၊ အင်းတော် ၊ ဗန်းမောက် နဲ့ စစ်ရေးတင်းမာနေဆဲမြို့တွေဖြစ်တဲ့ ကောလင်း ၊ ထီးချိုင့် ၊မြောင် မြို့နယ်တွေမှာ ရွေးကောက်ပွဲ ကျင်းပနိုင်ခြင်းမရှိဘူးလို့သိရပါတယ်။