ဖေဖော်ဝါရီ ၂၀ ၊ မံစီ
မံစီမြို့နယ်၊ စီခမ်းကြီးကျေးရွာအတွင်းဖြစ်ပွားခဲ့တဲ့ တိုက်ပွဲကြောင့် ကလေးငယ်နှစ်ဦးအပါအဝင် ဒေသခံ(၈)ဦး သေဆုံးခဲ့တယ်လို့ ကျေးရွာဒေသခံများထံမှ သိရပါတယ်။
လက်နက်ထိမှန်သေဆုံးခဲ့သူတွေက အလယ်တန်းကျောင်းသူ (၂)ဦး၊ အမျိုးသမီး(၃)ဦးနှင့် အသက်(၄၀)ဝန်းကျင်အရွယ် အမျိုးသား(၃)ဦးတို့ စုစုပေါင်း(၈)ဦး သေဆုံးခဲ့တာဖြစ်တယ်လို့ ဆိုပါတယ်။“အလောင်းတွေတော့ မယူရသေးဘူး ရွာမှာပဲ ဒီတိုင်းကျန်ထားတာ ရွာမှာက တစ်ယောက်မှမကျန်တော့ဘူးလေ အကုန်ပြေးခဲ့ကြပြီ သူတို့(KIA+PDFပူးပေါင်းတပ်ဖွဲ့) ထွက်ခွင့်ပေးလို့ ထွက်ခဲ့ရပြီ” ဟု စီခမ်းကြီးကျေးရွာသားတစ်ဦးက ပြောပြပါတယ်။
ကျေးရွာတွင်း သေဆုံးတာတွေဟာ သိရှိရတဲ့ အရေအတွက်ထက် ပို၍များကောင်းများနေနိုင်သေးတယ်လို့လည်း ၎င်းကဆိုပါတယ်။
ပြီးခဲ့သည့် ဖေဖော်ဝါရီလ(၁၆)ရက်နေ့ညကနေစပြီး ပူးပေါင်းတပ်ဖွဲ့များဘက်မှ စီခမ်းကြီးကျေးရွာရှိ စစ်ကောင်စီတပ်စခန်းကို စတင်ထိုးစစ်ဆင်တိုက်ခိုက်ခဲ့ပြီး (၁၉)ရက်နေ့မှာ စခန်းကိုသိမ်းပိုက်နိုင်ခဲ့တယ်လို့လည်း ပြောဆိုမှုတွေ ရှိနေပါတယ်။
အဆိုပါကျေးရွာကို စစ်ကောင်စီဘက်မှ လေကြောင်းဖြင့် ဗုံးကြဲတိုက်ခိုက်မှုတွေ ရှိခဲ့တာကြောင့် ပျက်စီးထိခိုက်မှုများ များပြားနေကြောင်း နီးစပ်သူများထံမှ သိရပါတယ်။