ဧပြီ ၁၂ ၊ ပင်လည်ဘူး
ဧပြီလ ပထမအပတ်ထဲက ပင်လည်ဘူးမြို့နဲ့အနီးတဝိုက်မှာ ဒေသခံကာကွယ်ရေးတပ်တွေနဲ့ စစ်ကောင်စီတပ်တို့တိုက်ပွဲတွေကြောင့် လက်နက်ကြီးတွေ ရွှေကျောင်းပရိယတ္တိစာသင်တိုက်ဝင်းအတွင်း လက်နက်ကြီးကျပြီး ထိခိုက်ပျက်စီးခဲ့တယ်လို့ သိရပါတယ်။
“ နှစ်ရက်သုံးရက်ပါ့တိုက်ပွဲဖြစ်တာရှိအုံးမှာ ၊ အဲ့မှာကျောင်းမကြီးရှိတယ်။ ၁၃ပင် ၁၄ပင်လောက်တော့ရှိမယ်။ ၇၀ ၈၀ပေါ့လေကျောင်းအကြီးကြီးပေါ့လေ။ ခေါင်မိုးပေါ်ကနေလက်နက်ကြီးမှန်ပြီးတော့အောက်ထပ်အထိအကုန်ပွင့်သွားတယ်အဲ့တာတော့တိကျတယ်သတင်းက၊ ရွှေကျောင်းဆရာတော်က အဲ့တာဖြစ်ပြီးထွက်ပြေးခဲ့ရတာကိုး ၊ အသေးစိတ်တွေကတော့ နေအိမ်တွေကလည်းမီးလောင်တယ်။ဘယ်အိမ်ဘယ်နှစ်အိမ်ဆိုတာအတိအကျမသိသေးဘူး” လို့ ရွှေကျောင်းပရိယတ္တိမှာ ပညာဆည်းကပ်ခဲ့ဖူးတဲ့ ဆရာတော်တစ်ပါးမိန့်ကြားပါတယ်။
ဒီလက်နက်ကြီးတွေ ကျောင်းတိုက်အတွင်းကျပြီးတဲ့နောက် ကျောင်းထိုင်ဆရာတော်လည်း ထိုကျောင်းကနေ ထွက်ပြေးတိမ်းရှောင်လာခဲ့ရတယ်လို့သိရပါတယ်။
ပင်လည်ဘူးရွှေကျောင်းအပါအဝင် တခြားနေအိမ်တွေလည်း ပျက်စီးမှုတွေရှိတယ်လို့ သိရပေမယ့် အတိအကျတော့မသိရှိရပါဘူး။
ပင်လည်ဘူးမြို့နယ်တိုက်ပွဲအတွင်းမှာ ဒေသခံကာကွယ်ရေးတပ်ဘက်ကနေ KIA က ပါဝင်တိုက်ခိုက်ပေးခဲ့တယ်လို့ သိရပါတယ်။
ဒီတိုက်ပွဲကြောင့် ဒေသခံ ထောင်နဲ့ချီလည်း ဘေးလွတ်ရာကျေးရွာတွေကို ထွက်ပြေးတိမ်းရှောင်နေကြရပါတယ်။
တိုက်ပွဲနဲ့ ပတ်သက်ပြီး စစ်ကောင်စီဘက်က ထုတ်ပြန်ချက်မှာ KIA/PDF ဘက်က စုစုပေါင်း အလောင်း ရှစ်လောင်း၊ M-22 သေနတ် ငါးလက်၊ AK-47 သေနတ် နှစ်လက်၊ KIA ထုတ် ၄ဝ မမ ဆုံလည် တစ်လက်၊ ၇.၆၂ မမ စနိုက်ပါ တစ်လက်၊ M-22 ကျည်အိမ် ၂၂ ခု၊ M-22 ကျည် ၁၃၄၅ တောင့်၊ ၇.၆၂ မမ စနိုက်ပါကျည် ၁၁၅ တောင့်၊ ၄ဝ မမ ဗုံးသီး ကိုးလုံး၊ KIA ကြိုးဆွဲလက်ပစ်ဗုံး ၁၉ လုံး၊ ၆၀ မမ ဗုံးသီး ၁၇ လုံး၊ လက်ပစ်ဗုံးတစ်လုံးတို့ သိမ်းဆည်းရမိခဲ့တယ်လို့ ဖော်ပြထားပါတယ်။
PDF တွေရဲ့ ပြောဆိုမှုတွေမှာလည်း စစ်ကောင်စီဘက်က အရာရှိတွေအပါအဝင် ၄၀ ဦးကျဆုံးတယ်လို့ဆိုပါတယ်။
စစ်ကောင်စီတပ်ဘက်က ဒီတိုက်ပွဲမှာ တိုက်ခိုက်ရေးဂျက်လေယာဉ်တွေကိုလည်း အသုံးပြုခဲ့ကြောင်း ဒေသခံတွေကအတည်ပြုပါတယ်။
လက်ရှိ ပင်လည်ဘူးမြို့နယ်မှာ မနေ့ ဧပြီလ ၁၁ ရက်က စတင်ပြီး တိုက်ပွဲရပ်တန့်သွားပြီဖြစ်ကြောင်း သိရပါတယ်။