မေ ၁ ၊ ဖားကန့်
ကချင်ပြည်နယ် ၊ဖားကန့်မြို့နယ်အတွင်း နေထိုင်သူဒေသခံတွေကို စစ်ကောင်စီရဲ့ လျှပ်စစ်ဝန်ကြီးဌာနအား မီတာခမပေးဆောင်ကြဖို့ သပိတ်အင်အားစုများက သတိပေးစာစောင်များ လိုက်လံကပ်ထားတယ်လို့ ဒေသခံများထံမှ သိရပါတယ်။
“ တကယ်တော့ရှင်းရှင်းပြောရမယ်ဆိုရင် အဲ့ဒါတွေက အားပေးအားမြှောက်လုပ်တဲ့သူတွေပဲကပ်တာပါ အဖွဲ့အစည်း(လက်နက်ကိုင်)ကကပ်တာမဟုတ်ဘူး။ သပိတ်စစ်ကြောင်းအဖွဲ့တွေ အဲ့ဒါက လက်နက်ကိုင်အဖွဲ့ကပါပြောပြီးကောက်နေတာခုက” ဟု လုံးခင်းဒေသခံတစ်ဦးက ဆိုပါတယ်။
သတိပေးစာစောင်တွေကို သကြင်္န်မတိုင်ခင်ကာလ ဧပြီလအစောပိုင်းကတည်းက လိုက်လံကပ်ထားတာဖြစ်ပြီး မီတာခငွေကြေးတွေက စစ်ကောင်စီအတွက် သွေးစွန်းငွေများဖြစ်ကာ အကြမ်းဖက်လုပ်ငန်းများလုပ်ရာမှာ အသုံးပြုရန်အတွက်သာ ဖြစ်တယ်လို့ ပြောဆိုထားတာပါ။
လျှပ်စစ်မီတာခများကောက်ခံဖို့အတွက် သက်ဆိုင်ရာအဖွဲ့အစည်းများ ၊ ဒေသတွင်းလက်နက်ကိုင်အဖွဲ့အစည်းများဖြင့် ညှိနှိုင်းပြောဆိုထားကာ သဘောတူခွင့်ပြုချက်များရယူထားပြီး KTV၊ဟော်တယ်၊စားသောက်ဆိုင်၊အနှိပ်ခန်း တို့တွင်သာ သွားရောက်ကောက်ခံတာဖြစ်တယ်လို့ ဖားကန့်မြို့နယ် လျှပ်စစ်ဝန်ထမ်းတစ်ဦးက ဆိုပါတယ်။
“ အိမ်ရှင်တွေကိုမကောက်ဘူး အဲ့လိုအလိုက်သိစွာလာဆောင်ကြတာပဲရှိတာ တာဝန်သိပြည်သူတွေကနေပြီးမှ သီးသန့်လာဆောင်ကြတာ နောက်လည်းဆောင်ရမယ် ခုလည်းဆောင်ရမယ်ဆိုပြီးသိတတ်ပြီးတော့ လာဆောင်ကြတာလည်းရှိတယ် ပြီးတော့မီတာက အခွန်မဟုတ်ဘူးလေ အခကိုး” ဟု သူကကပြောပါတယ်။
ဖားကန့်မြို့နယ်ဆိုင်ရာ သပိတ်အင်အားစုကတော့ လျှပ်စစ်မီတာခကောက်ခံမှုနှင့်ပတ်သက်ပြီး တိုက်ရိုက်ဖြစ်စေ ၊သွယ်ဝိုက်ဖြစ်စေ ပါဝင်ပတ်သက်နေသူလူပုဂ္ဂိုလ် ၊အဖွဲ့အစည်း ထိရောက်စွာအရေးယူသွားမည်ဖြစ်တယ်လို့ သတိပေးစာမှာ အသိပေးပြောဆိုပါရှိထားပါတယ်။
ဖားကန့်မြို့နယ်အတွင်းမှာ လျှပ်စစ်မီးသုံးစွဲတဲ့ မီတာအလုံးရေပေါင်း ၁,၇၅၀၀ လုံးက မီတာခကြွေးကျန် ကျပ် ၅ ဘီလီယံ(ကျပ်သိန်းငါးထောင်) ရှိတယ်လို့ သိရပါတယ်။