မေ ၇ ၊ ဗန်းမောက်
စစ်ကိုင်းတိုင်းဒေသကြီး အနောက်ဘက်ဒေသမှာ တစ်လအတွင်း ငှက်ဖျားပိုးကူးစက်သူ သုံးဆယ်ကျော်ရှိလာပြီဖြစ်တယ်လို့ မံစီကြီးဒေသစိတ်ဆေးရုံကနေ စုံစမ်းသိရှိရပါတယ်။
ဗန်းမောက်မြို့နယ်အနောက်ဘက်ဒေသ မီစီဒေသစိတ်အတွင်းက နမ့်အော့ကျေးရွာမှာ ကူးစက်မှုအများဆုံးဖြစ်ပွားခဲ့ပြီး အနီးကျေးရွာတွေဖြစ်တဲ့ နမ့်ခင့် ၊ နမ့်မားကျေးရွာတွေမှာလည်း ဖြစ်ပွားတာတွေရှိခဲ့တယ်လို့သိရပါတယ်။
“ ငှက်ဖျားပိုးကမိုးတစ်ကြိမ်ကျပြီး မိုးအစကတည်းက တစ်လအတောအတွင်းမှာ လူပေါင်း(၃၀)လောက်ရှိပါပြီ ပိုးတွေ့ရှိထားတဲ့လူတွေပေါ့လေ ကုသပေးနေတာကတော့ ကျွန်တော်တို့ဒီကကိုယ့်အစီအစဉ်နဲ့ကိုယ်ပဲ” လို့ မံစီကြီးဒေသစိတ်ရှိ SNA ရဲ့ ကျန်းမာရေးဌာနမှူး ဆရာကျော်က ပြောပါတယ်။
ငှက်ဖျားပိုးကတော့ ပြင်းထန်တဲ့ ပိုးမဟုတ်ဘဲ PV လို့ခေါ်တဲ့ (Plasmodiam vivax) ငှက်ဖျားရောဂါအပျော့စားဖြစ်ပြီး ကလေးငယ်တွေကစလို အသက်ရွယ်ကြီးတဲ့အထိ ဖြစ်ပွားမှုတွေရှိနေတယ်လို့ဆိုပါတယ်။
လက်ရှိမှာ ဗန်းမောက်နယ်ထဲ ငှက်ဖျားရောဂါကို ကာကွယ်ဆေးတွေ ဝယ်ရခက်ခဲနေပြီး ရောဂါဖြစ်ပွားသူတွေကိုသာ ကုသပေးနေရာတာဖြစ်တယ်လို့သိရပါတယ်။
“ ကျန်းမာရေးအသိပညာပေးတွေ လုပ်ဖို့ရှိတယ် ပြီးတော့ ငှက်ဖျားကာကွယ်ဖို့ ဆေးကုသဖို့အချက်လေးတွေ ဆွေးနွေးတင်ပြလုပ်ဖို့အစီစဉ်တွေရှိပါတယ် လက်ရှိတော့မလုပ်ရသေးဘူး ရောဂါဖြစ်နေတဲ့သူတွေကိုပဲ ကုသပေးနေတာပါ” လို့ သူက ဆက်ပြောပါတယ်။
ဗန်းမောက်မြို့နယ်ရဲ့ အနောက်ပိုင်းဒေသအတွင်းမှာ တစ်လအတွင်း စာရင်းသာဖြစ်ပြီး တခြားသော ကျေးရွာရဲ့ စာရင်းတွေနဲ့ ပေါင်းရင် ပိုများပြားနိုင်တယ်လို့ သိရပါတယ်။
ဗန်းမောက်မြို့မှာ ငှက်ဖျားရောဂါအမျိုးအစားထဲက လူကိုသေစေနိုင်တဲ့ ပလစ်တီမိုဒီယမ် နဲ့ ဗိုင်းရက်စ် တွေကိုအတွေ့များနေပြီး ဒီရောဂါကုသနိုင်ဖို့အတွက် ဆေးဝါးမရှိဘူးလို့ ကျန်းမာရေးဆရာဝန်တွေက ပြီးခဲ့တဲ့နှစ်မှာပြောဆိုထားပါတယ်။
မြန်မာနိုင်ငံအထက်ပိုင်းမှာ ဗန်းမောက်မြို့နယ်ဟာ ငှက်ဖျားကူးစက်မှုအမြင့်ဆုံးစာရင်းထဲမှာပါဝင်နေပြီး ၂၀၁၅ ခုနှစ် စတင်ပြီး စစ်ဆေးရာမှာ ၂၀၁၆ တွင် ငှက်ဖျားပိုးတွေ့ရှိသူ (၃၀၀၀)ကျော်၊၂၀၁၇တွင် (၂၀၀၀) ကျော်၊၂၀၁၈တွင်(၁၇၀၀) ကျော်၊ ၂၀၁၉တွင်(၈၀၀)ကျော်၊ ၂၀၂၀တွင် (၆၀၀)ကျော်နှင့် ၂၀၂၁ ဇွန်လ၁၀ရက်အထိ ငှက်ဖျားပိုးစစ်ဆေးကုသပေးခဲ့ရာ(၃၀၀)ကျော်ရှိတယ်လို့ ပြည်သူ့ကျန်းမာရေးဝန်ဆောင်မှုအဖွဲ့ရဲ့ စာရင်းအရ သိရပါတယ်။
၂၀၂၂ ခုနှစ်မှ ၂၀၂၃ ခုနှစ်မှာ ဗန်းမောက်မြို့နယ်တိုက်ပွဲအခြေအနေများကြောင့် ပြည်သူ့ကျန်းမာရေးဝန်ဆောင်အဖွဲ့က စာရင်းပြုစုနိုင်ခြင်းမရှိသေးပေမယ့် အခုနှစ်မှာတော့ စတင်အကောင်အထည်ဖော်နေပြီလို့သိရပါတယ်။