ဧပြီ ၂၆ ၊ ဗန်းမောက်
စစ်ကိုင်းတိုင်းဒေသကြီး အထက်ပိုင်း ဗန်းမောက်မြို့အဝင် ကိုဗစ်ကာကွယ်ဆေးထိုးပေးနေတဲ့ ဂိတ်အနီးမှာ လုံခြုံရေးယူနေတဲ့ ရဲတပ်ဖွဲ့ဝင်တွေကို ဒေသခံကာကွယ်ရေးတပ် (အင်းတော်) ကလာရောက်ပစ်ခတ်မှုကြောင့် တိုက်ပွဲဖြစ်ပွားခဲ့တယ်လို့ဆိုပါတယ်။
ဒီနေ့ ဧပြီလ ၂၆ ရက်နေ့ နေ့လည် ၃ နာရီဝန်းကျင်မှာ စတင်ဖြစ်ပွားခဲ့ပြီး နာရီဝက်ကျော်ကြာတဲ့ ဒီတိုက်ပွဲမှာ ရဲတပ်ဖွဲ့ဝင် (၂) ဦး ၊ မီးသတ် (၁) ဦးသေဆုံးခဲ့သလို အနီးနားက ဓာတ်ဆီဆိုင်(၄) ဆိုင်လည်း မီးလောင်ပြာကျခဲ့တာဖြစ်တယ်လို့ ဒေသခံတွေဆီကနေ သိရပါတယ်။
သေဆုံးသွားတဲ့ ရဲတပ်ဖွဲ့ဝင် (၂) ဦးမှာ တစ်ဦးက နယ်ထိန်း ဒုရဲအုပ် ဖြစ်ပြီး တစ်ဦးက ဒုတပ်ကြပ်ဖြစ်တယ်လို့ဆိုပါတယ် ။ မီးသတ်က ဒုတပ်ကြပ်ကြီးတာဝန်ထမ်းဆောင်နေတာဖြစ်ပြီး ဦးခေါင်းကျည်ထိမှန်ပြီး သေဆုံးသွားတာဖြစ်တယ်လို့ဆိုပါတယ်။
“ သုံးယောက်သေတယ်။ ရဲက နှစ်ယောက်သေတယ်။ မီးသတ်က တစ်ယောက်သေတယ်။ ဆီဆိုင်တွေက အားလုံးပေါင်းလေးဆိုင်လောင်သွားတယ်ဟေ့ ၊ အောင်သာကုန်းစာသင်ကျောင်းကနေလည်းပစ်တယ်၊ အနောက်ကနေလည်းပစ်တယ် မြို့အဝင်ငါတို့ဘုရားကုန်းသိတယ်မလား ဆိုင်းဘုတ်အဝင်က ပထမဆုံးညောင်ပင်အောက်ကဆိုင်ကမီးမလောင်ဘူး။ တစ်ဆိုင်ပဲကျန်ခဲ့တာ လေးဆိုင်လောင်သွားတယ်” လို့ဒေသခံတစ်ဦးကဆိုပါတယ်။
ပစ်ခတ်မှုတွေကြောင့် အနီးက ဓာတ်ဆီဆိုင်ကို ၄၀မမ လက်နက်ကြီးကျည် ထိပြီး မီးလောင်ခဲ့တာဖြစ်ပြီး တိုက်ပွဲငြိမ်သွားပြီးတဲ့နောက်မှ မီးသတ်ကားတွေ မီးလာရောက်ငြိမ်းသတ်နိုင်ခဲ့တာဖြစ်ကြောင်း သိရပါတယ်။
ဗန်းမောက်မြို့ပေါ်မှာ ဒေသခံကာကွယ်ရေးတပ်နဲ့ စစ်ကောင်စီတပ်တို့ရဲ့ ထိတွေ့တိုက်ပွဲဖြစ်ပွားမှုက ပထမဆုံးအကြိမ်လည်းဖြစ်ပါတယ်။
ဗန်းမောက်မြို့မှာရှိတဲ့ စည်ပင်သာယာရုံး ၊ အထွေထွေအုပ်ချုပ်ရေးမှူးရုံး ၊ မိုင်တဲတာဝါတိုင် တွေမိုင်းတွေနဲ့ မတ်လ နဲ့ ဧပြီလ ထဲမှာ တိုက်ခိုက်ခံခဲ့ရတာလည်းဖြစ်ပါတယ်။