ဒီဇင်ဘာ ၂၆၊ မြစ်ကြီးနား
ကချင်ပြည်နယ်၊ မြစ်ကြီးနားမြို့မှာ ရစ်ချက်တာစကေး ၄.၃ အင်အားအတင့်အသင့်ရှိတဲ့ ငလျင်တစ်ခု မနေ့ည ဒီဇင်ဘာ (၂၅)ရက်မှာ လှုပ်ခတ်ခဲ့တယ်လို့ မြို့ပေါ်ဒေသခံများထံမှ သိရပါတယ်။
“လှုပ်သွားတယ်ဟုတ်တယ် ည ၉ နာရီ ၅၀မိနစ် မှာလှုပ်သွားတာ အိမ်တောင်ခါသွားတာပဲ ခေါင်းတောင်မူးသွား တယ် တော်တော်ဆိုးတယ်” လို့ မြစ်ကြီးနားမြို့ပေါ် ဒေသခံတစ်ဦးက ဆိုပါတယ်။
ယခု လှုပ်ခတ်သွားသော ရစ်ချက်တာစကေး 4.3 အဆင့်ရှိတဲ့ ငလျင်ဟာ အိန္ဒိယငလျင်ဌာန( NCS ) တိုင်းတာချက်များအရ မြစ်ကြီးနား မြို့ရဲ့ အရှေ့ဘက် မြန်မာ-တရုတ်နယ်စပ်မှာ ဗဟိုပြုခဲ့တယ်လို့ သိရပါတယ်။
ဒါ့အပြင် ပြန်လည်ဆောက်လုပ်ဖို့အတွက် ပြင်ဆင်နေတဲ့ မြစ်ဆုံစီမံကိန်း ပတ်ဝန်းကျင်နဲ့ ကီလိုမီတာအနည်းငယ်သာ ကွာဝေးပြီး Hightly Active (အလွန်တက်ကြွ) တဲ့ ငလျင်ဇုန်ဖြစ်လိမ့်မယ်လို့ ယူဆနေကြပါတယ်။
ပြီးခဲ့တဲ့ ရက်သတ္တပတ်အတွင်း တစ်နိုင်ငံလုံးမှာ ငလျင်လှုပ်ခတ်မှု ရက်ဆက်ဖြစ်ပေါ်နေပြီး မြစ်ကြီးနားအပါအဝင် မြန်မာပြည် တောင်ပိုင်းနဲ့ အလယ်ပိုင်းမှာ ရစ်ချက်တာစကေး 3.8 မက်ဂနီကျူ့ ၊ ကျိုင်းတုံ အရှေ့ပိုင်းမှာ 4.3 မက်ဂနီကျူ့ ၊ နေပြည်တော် နဲ့ တောင်ငူ အနီးတစ်ဝိုက်မှာ 4 မက်ဂနီကျူ့ တို့လှုပ်ခတ်ခဲ့တယ်လို့ သိရပါတယ်။
မြန်မာနိုင်ငံမှာ မတ်လကစပြီး ဒီဇင်ဘာလအထိ ငလျင်လှုပ်ခတ်မှုပေါင်း အကြိမ်ရေလေးရာဝန်းကျင်ခန့်ရှိနေကြောင်း ငလျင်စောင့်ကြည့်လေ့လာရေးအဖွဲ့အစည်းများက ဆိုထားကြပါတယ်။