ရှမ်းနီတိုင်းရင်းသားတို့၏ အမျိုးသားနေ့သတ်မှတ်နိုင်ရေးအတွက် ဦးဆောင်ကော်မတီတစ်ရပ်ကို ဇူလိုင်လ ၂၆ ရက်နေ့မှာ ဖွဲ့စည်းလိုက်တယ်လို့ သိရပါတယ်။
တိုင်းရင်းသားအခွင့်အရေးများ ကာကွယ်စောင့်ရှောက်ရေးဦးစီးဌာနက ကချင်ပြည်နယ်ထဲမှာရှိတဲ့ တိုင်းရင်းသားလူမျိုးစုတွေရဲ့ အမျိုးသားနေ့သတ်မှတ်ဖို့ ရှမ်းနဲ့ ရှမ်းနီ စာပေယဉ်ကျေးမှုကော်မတီတွေဆီကို ညွှန်ကြားထားပြီးတဲ့နောက် အခုလိုဖွဲ့စည်းလိုက်တာလည်းဖြစ်ပါတယ်။
“ ဒီကနေ့က ဦးဆောင်ကော်မတီဖွဲ့လိုက်တာပေါ့ ၊ အဲ့ဒီဦးဆောင်ကော်မတီကနေ ခရိုင်အဆင့် ၊မြို့နယ်အဆင့် ပြန်ပြီးတော့မှ သဘောထားတွေကို စုစည်းပြီးတော့မှ ကော်မတီကို ဩဂုတ် ၁၅ ရက်နေ့ နောက်ဆုံးထားပြီးတော့ တင်ပြဖို့ပေါ့ ၊ အချက်အလက်တွေကလည်း ရှာဖွေဖို့မခက်ခဲလောက်ဘူးဆိုပြီးတော့ ဩဂုတ်လ ၁၅ ရက်နေ့ နောက်ဆုံးထားပြီးပေးပို့ဖို့ဆုံးဖြတ်လိုက်တယ်”လို့ အစည်းအဝေးမှာ ပါဝင်ခဲ့တဲ့ ရှမ်းနီလူငယ်များအဖွဲ့ချုပ် အတွင်းရေးမှူး ဆေကောင်းဖှက ပြောပြပါတယ်။
ဒီကော်မတီဖွဲ့စည်းတဲ့ အစည်းအဝေးပွဲမှာ ကချင်ပြည်နယ်မှာရှိတဲ့ ရှမ်းနီစာပေနှင့်ယဉ်ကျေးမှုကော်မတီ အသီးသီးများ ၊ အရပ်ဘက်အဖွဲ့အစည်းများ နဲ့ တသီးပုဂ္ဂလ ရှမ်းနီသမိုင်းသုတေသီတွေလည်း ပါဝင်ခဲ့ကြပါတယ်။
ရှမ်းနီတိုင်းရင်းသားတွေက ကချင်ပြည်နယ်အပြင် စစ်ကိုင်းတိုင်းအထက်ပိုင်းမှာလဲ နေထိုင်တာကြောင့်ဒီကော်မတီမှာပါဝင်ဖို့ စစ်ကိုင်းတိုင်းက ရှမ်းနီစာယဉ် ၊ အရပ်ဘက်အဖွဲ့အစည်းတွေကို ကမ်းလှမ်းမှုတွေ ပြုလုပ်သွားမယ်လို့ ဆိုပါတယ်။
ဒီကော်မတီမှာ နယ်မြေဒေသမရွေးက အရပ်ဘက်အဖွဲ့အစည်းတွေနဲ့ လူပုဂ္ဂိုလ်တွေပါဝင်လို့ရတယ်လို့ ဆိုပါတယ်။
စစ်ကိုင်းတိုင်းထဲမှာနေထိုင်ကြတဲ့ တိုင်းရင်းသားလူမျိုးစုတွေရဲ့ အမျိုးသားနေ့တွေကို သတ်မှတ်ဖို့အတွက် အကြောင်းကြားတာမျိုးမရှိသေးဘူးလို့လည်း စစ်ကိုင်းတိုင်းအတွင်းက ရှမ်းနီစာပေနှင့်ယဉ်ကျေးမှု အဖွဲ့တွေဆီကသိရပါတယ်။
ရှမ်းနီလူငယ်များအဖွဲ့ချုပ်နဲ့ ရှမ်းနီအရပ်ဘက်အဖွဲ့တချို့ ၊ စာပေယဉ်ကျေးမှုအဖွဲ့တချို့ပူးပေါင်းပြီး မတ်လ ၁၃ ရက်နေ့ကို ရှမ်းနီအမျိုးသားနေ့အဖြစ်သတ်မှတ်ပြီး နှစ်စဉ်ပြုလုပ်နေမှုတွေလည်းရှိပါတယ်။