ဇွန် ၁၈ ၊ ဟုမ္မလင်း
ဟုမ္မလင်းမြို့နယ် နောင်ပိုအောင်ကျေးရွာအုပ်စု လွှစင်ကုန်းကျေးရွာ နှင့် မြောက်ရွာကြားရှိ နောင်မယ်မိုက်( မုဆိုးမအင်း) မြေနေရာတွင် တရားမဝင်ရွှေတူးဖော်မှုများ လာရောက်ပြုလုပ်နေကြောင်း ဒေသခံများထံမှ သိရသည်။
“ အခုတော့ မျှောစင်လာမချသေးဘူး ပိတ်တန်းအရင်ကာနှင့်ကြတာပါ့၊ စာသွားတင်တဲ့နေ့က သူတို့ဖုန်းနဲ့လှမ်းတားတယ်။ ဒါပေမယ့် အခုထိမရပ်သေးဘူး” ဟု ဒေသခံတစ်ဦးက ရှမ်းနီအသံကိုပြောသည်။ တရားမဝင်ရွှေမျှောတူးဖော်သူများက ထိုအင်းကို ဘတ်ဟိုးများဖြင့် မြေရှင်းလင်းမှုများ ပြုလုပ်နေသည်မှာ တစ်ပတ်ခန့်ရှိနေပြီဖြစ်သည်။
တရားမဝင်ရွှေလာရောက်တူးဖော်မည့်သူများမှာ မည်သူဖြစ်သည်ကို အတိအကျမသိသေးသော်လည်း မြောက်ရွာ ဒေသခံတစ်ဦးက အမည်ခံလုပ်ပေးသည်ဟု သိရသည်။
ထိုရွှေမျှောလုပ်ကိုင်မှုကြောင့် အင်းအနီးနားရှိ လယ်မြေဧက နှစ်ရာကျော် ထိခိုက်ပျက်ဆီးနိုင်သောကြောင့် ဒေသခံများက ဟုမ္မလင်းမြို့နယ် စီမံအုပ်ချုပ်ရေးအဖွဲ့ကို ဇွန်လ (၁၅) ရက်နေ့က တားဆီးပေးနိုင်ရန် တိုင်တန်းအကြောင်းကြားခဲ့သည်။
သို့သော်လည်း လက်ရှိအချိန်ထိ လာရောက်တားဆီးပေးခြင်းမရှိသလို ရွှေမျှောလုပ်ကိုင်သူများကလည်း ဆက်လက်လုပ်ကိုင်လျှက်ရှိနေသည်ဟု ဒေသခံတစ်ဦးက ပြောဆိုသည်။
စစ်ကောင်စီက အာဏာသိမ်းပြီးနောက်ပိုင်းတွင် ဟုမ္မလင်းမြို့နယ်အတွင်းတွင် တရားမဝင်ရွှေမျှောလုပ်ကိုင်သူ ယခင်ထက်ပိုများလာခဲ့ကြောင်း စုံစမ်းသိရှိရသည်။