ဟုမ္မလင်းမြို့နယ် NLD ပါတီ၏ လွတ်တော်ကိုယ်စားလှယ်လောင်းများကို ဇွန်လ ၁၂ ရက်နေ့ရွေးချယ်မည်

ဟုမ္မလင်းမြို့နယ်  NLD ပါတီ၏ ၂၀၂၀ ရွေးကောက်ပွဲအတွက် လွတ်တော်ကိုယ်စားလှယ်လောင်းများကို မြို့မိမြို့ဖများနှင့် ပါတီ၏ မြို့နယ်အလုပ်အမှုဆောင်အဖွဲ့ အောင်နိုင်ရေးအဖွဲ့များက ဇွန်လ ၁၂ ရက်နေ့တွင် ရွေးချယ်သွားမည်ဖြစ်ကြောင်းသိရသည်။ 

“ လွတ်တော်ကိုယ်စားလှယ် ၁၂ ရက်နေ့ကို ရွေးချယ်မယ် ၁၅ ရက်နေ့ တိုင်းကိုပို့ရမယ် လွတ်တော်ကိုယ်စားလှယ်အရည်အချင်း ရွေးချယ်သတ်မှတ်တဲ့ထဲရှိတယ် ပါတီဝင်မည်သူမဆိုတင်လို့ရတယ် အဲ့ဒီထဲက ကျွန်တော်တို့ရဲ့ ရွေးချယ်ရတဲ့ စံတွေနဲ့ရွေးချယ်သွားမှာပါခင်ဗျ” ဟု လက်ရှိ ဟုမ္မလင်းမြို့နယ် ပြည်သူ့လွတ် တော်ကိုယ်စားလှယ်လည်းဖြစ် ဟုမ္မလင်းမြို့နယ် NLD ပါတီ၏ မြို့နယ် ဒုဉက္ကဌလည်းဖြစ်သည့် ဦးမျိုးညွှန့်က ရှမ်းနီအသံကိုပြောသည်။ 

ဇွန်လ ၁၅ ရက်နေ့တွင် မြို့နယ်မှ ရွေးချယ်ထားသည့် ကိုယ်စားလှယ်လောင်းစာရင်းများကို တိုင်းဒေသကြီးအလုပ်အမှုဆောင်အဖွဲ့သို့တင်ပြရမည်ဖြစ်ပြီး ဗဟိုသို့ဆက်လက်တင်ပြပြီး ဗဟိုက ရွေးချယ်မှသာ အတည်ပြုမည်ဖြစ်သည်။ 

ကိုယ်စားလှယ်လောင်းများအတွက် လျှောက်လွှာများကိုလည်း ပါတီဝင်မည်သူမဆို လျှောက်ထားနိုင် ကြောင်း ၎င်းကဆိုသည်။ 

ထိုရွေးချယ်နိင်ရေးအတွက် ဟုမ္မလင်းမြို့နယ် မြို့မိမြို့ဖ (၅) ဦးကိုလည်း ဇွန်လ (၆) ရက်နေ့က ရွေးချယ်ခဲ့သည်။ 

“ ရပ်မိရပ်ဖတွေကို သူ့စည်းကမ်းနဲ့ ရပ်ကျေးကရွေးချယ်ကြတယ် ၊ ရပ်ဖိရပ်ဖတွေကတော့ ပါတီဝင်ထဲကတော့မဟုတ်ဘူး ပါတီကိုအစဉ်တစိုက်ဝန်းရံအားပေးခဲ့သူတွေပေါ့ဗျ” ဟု ဦးမျိုးညွှန့်ကဆိုသည်။ 

NLD ပါတီသည် ကိုယ်စားလှယ်လောင်းများရွေးချယ်ရာတွင် ယခင်က အောင်နိုင်ရေးအဖွဲ့နှင့် မြို့နယ်အလုပ်အမှုဆောင်များကသာ ရွေးချယ်ခဲ့သော်လည်း ယခုရွေးကောက်ပွဲအတွက် မြို့မိမြို့ဖများကိုပါ ရွေးချယ် ရေးအဖွဲ့ တွင် ပါဝင်စေခဲ့ခြင်းဖြစ်သည်။ 

၂ဝ၂ဝ ရွေးကောက်ပွဲလည်း လာမည့် နိုဝင်ဘာလတွင် ပြုလုပ်မည်ဟု ပြည်ထောင်စုရွေးကောက်ပွဲ ကော်မရှင်က ပြောကြားထားသည်။