အောက်တိုဘာ ၁၅ ၊ နေပြည်တော်
တစ်နိုင်ငံလုံးပစ်ခတ်ရပ်စဲရေးသဘောတူစာချုပ် NCA ကို လက်မှတ်ရေးထိုးခဲ့တာဟာ ၁၀ ပြည့်မြောက်ခဲ့ပြီဖြစ်ပြီး နေပြည်တော်မှာ အခမ်းအနားတစ်ရပ်အနေနဲ့ကျင်းပနေတာတွေကိုတွေ့မြင်ရပါတယ်။
ဒီနေ့အခမ်းအနားမှာတော့ NCA လက်မှတ်ရေးထိုးခဲ့တဲ့ တိုင်းရင်းသားလက်နက်ကိုင် တပ်ဖွဲ့တချို့ နဲ့ခေါင်းဆောင်တချို့တက်ရောက်ခဲ့တာကိုတွေ့ရပါတယ်။
NCA လက်မှတ်ရေးထိုးခဲ့တဲ့ KNU က ဥက္ကဌဟောင်း မူတူးစေးဖိုး ကိုယ်တိုင်တက်ရောက်လာပြီး မိန့်ခွန်းတစ်ရပ်ကိုလည်းပြောခဲ့ပါတယ်။
“ ငြိမ်းချမ်းရေးဆိုတာစာချုပ်ပေါ်မှာ လက်မှတ်ထိုးရုံသက်သက်နဲ့ ဖြစ်ပေါ်လာနိုင်တဲ့ အရာမဟုတ်ပါ။ စစ်မှန်တဲ့ စိတ်ဓာတ်နဲ့ဆန္ဒတူညီမှုနဲ့သာပေါ်ပေါက်လာနိုင်ပါတယ်။ အဲ့တာကြောင့် အနာဂတ်အတွက် အန်စီအေကိုအခြေခံ ညှိနှိုင်းဆွေးနွေးမှုတွေပြန်လည်စတင်ဖို့ အပြန်အလည် ယုံကြည်တည်ဆောက်ဖို့ ပြည်သူအတွက်ငြိမ်းချမ်းရေးကို အားထုတ်ဖို့လိုပါတယ်” လို့ သူကပြောပါတယ်။
KNU ဘက်ကတော့ ဥက္ကဌဟောင်း မူတူးစေးဖိုးတက်ရောက်မှုဟာ အဖွဲ့အစည်းနဲ့ သက်ဆိုင်မှုမရှိဘဲ ပုဂ္ဂလိက သဘောဆန္ဒသာဖြစ်တယ်လို့ ဆိုထားပါတယ်။
NCA လက်မှတ်ရေးထိုးထားတဲ့ KNU ၊ CNF ၊ ABSDF ၊ PNLO တို့ကတော့ ဒီအခမ်းအနားကိုတက်ရောက်လာခြင်းကိုမတွေ့ရပေ။
ဒီအခမ်းအနားကို NCA လက်မှတ်ရေးထိုးနိုင်ရေးအတွက်ဆောင်ရွက်ခဲ့တဲ့ ငြိမ်းချမ်းရေးအကျိုးဆောင်အဖွဲ့တွေ၊ နိုင်ငံရေးပါတီ ၆၀ နီးပါး နဲ့ နိုင်ငံတကာအသိသက်သေများ ၊ တရုတ်အထူးကိုယ်စားလှယ်၊ အိန္ဒိယ ၊ ရုရှားကိုယ်စားလှယ်များက တက်ရောက်ထားပါတယ်။
NCA ၁၀ နှစ်ပြည့်လာချိန်အထိ စာချုပ်ပါအတိုင်းအကောင်အထည်ဖော်ဖို့ အချိန်နောက်ကျနေတယ်လို့ ဗိုလ်ချုပ်မှူးကြီးမင်းအောင်လှိုင်က သူ့မိန့်ခွန်းထဲ ထည့်သွင်းပြောဆိုထားပါတယ်။
“ အခုကျွန်တော်တို့ ငြိမ်းချမ်းရေး ၁၀ နှစ်ပြည့်လုပ်တယ်။ အမှန်မှာတော့ ဒီစနစ်ကိုအကောင်အထည်ဖော်နိုင်ဖို့ကျွန်တော်တို့တွေနောက်ကျနေပါတယ်။ ၁၀ နှစ်အတွင်းမှာလည်း ပထမ ၅ နှစ် ဒုတိယ ၅ နှစ်၊ ပထမ ၅ နှစ်မှာလည်း ငြိမ်းချမ်းရေးညီလာခံလုပ်ပြီးတော့မှ ဒီဟာကို ဆက်လက်အကောင်အထည်ဖော်နိုင်ဖို့အတွက် အကြောင်းအမျိုးမျိုးနဲ့ကျွန်တော်တို့တွေကျန်ခဲ့တယ်။ နောက်ကျွန်တော်တို့တာဝန်ယူတဲ့ကာလကျတော့လည်း တပ်မတော်အနေနဲ့မလုပ်နိုင်ဘူးဆိုပြီးလည်းပြောကြတယ်။ တပ်မတော််ကလည်း ဒီထဲမှာ လက်မှတ်ရေးထိုးထားတယ်။ ကျွန်တော်ကိုယ်တိုင်လက်မှတ်ထိုးထားတယ်။ကျွန်တော်တို့ကိုယ်တိုင်လုပ်ထားတဲ့ကတိတွေကိုမဖျက်ပါဘူး။ ဒါ့ကြောင့် ကျွန်တော်တို့ စောစောစီးစီး ဆွေးနွေးညှိနှိုင်းခဲ့နိုင်ရင် အကောင်အထည်ဖော်နေပြီဖြစ်ပါတယ်။”
တိုင်းရင်းသားတွေအနေနဲ့လည်း ဖြစ်နိုင်တဲ့အခြေအနေတွေကိုပဲတောင်းဆိုကြဖို့အတွက် မိန့်ခွန်းပြောပြီးနောက် ထပ် ၁၀ မိနစ်သီးသန့်ပြောဆိုမှုမှာထည့်သွင်းပြောဆိုခဲ့ပါသေးတယ်။
“ တိုင်းရင်းသားနဲ့ သက်ဆိုင်ရာပုဂ္ဂိုလ်များကလည်း ဖြစ်နိုင်တာကိုပဲပြောကြဖို့ လုပ်ဖို့လိုပါတယ်လို့ ပြောချင်ပါတယ်။ မဖြစ်နိုင်တာကိုပဲ ပြောပြီး လုပ်နေလို့မရပါဘူး။ ဒါ့ကြောင့်ကျွန်တော်တို့ ဦးတည်ချက်မှန်ကန်စွာလုပ်ဖို့လိုပါတယ်။”
(၁၀)နှစ်ပြည့် အခမ်းအနားကို အာဆီယံနဲ့ နိုင်ငံတကာက မတက်ရောက်ကြဖို့ တိုင်းရင်းသားလက်နက်ကိုင် ၆ ဖွဲ့ က အောက်တိုဘာလ ၁၀ ရက်နေ့မှာ ထုတ်ပြန်တောင်းဆိုလိုက်တယ်လို့ သိရပါတယ်။
တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) အခမ်းအနားကို ကရင်အမျိုးသားအစည်းအရုံး KNU ၊ ချင်းအမျိုးသားတပ်ဦး CNF ၊ မွန်ပြည်သစ်ပါတီ NMSP (AD) ၊ လားဟူဒီမိုကရက်တစ် အစည်းအရုံး LDU ၊ ပအိုဝ့်အမျိုးသားလွတ်မြောက်ရေးအဖွဲ့ချုပ် (PNLO) နဲ့ ကျောင်းသားတပ် ABSDF တို့က ကန့်ကွက်ကြတာဖြစ်ပါတယ်။