ဇန်နဝါရီ ၂၇ ၊ မိုးညှင်း
ကချင်ပြည်နယ် ရှမ်းတိုင်းရင်းသားရေးရာလွှတ်တော်နေရာမှာ ကျားနီပါတီ(TNDP) မှ ကိုယ်စားလှယ်လောင်း ဦးစိုင်းတင်အောင် အနိုင်ရရှိဖို့ မဲရှေ့ပြေးနေတယ်လို့ သိရပါတယ်။
“ ငါတို့ ( ကျားနီပါတီ) က ရှမ်းတိုင်းရင်းသားရေးရာမှာ မဲသုံးထောင်ကျော်လောက် ကွာထားတယ်။ အခုရွှေကူတို့ ၊ ဗန်းမော်တို့ တက်လာလည်း မဲကအဲ့လောက်များတော့ဘူးဆိုတော့ သူက သေချာသလောက်ပါ”လို့ ကျားနီပါတီနဲ့ နီးစပ်သူတစ်ဦးက ပြောပြပါတယ်။
ဦးစိုင်းတင်အောင် ဟာ ပြီးခဲ့တဲ့ ၂၀၂၀ ရွေးကောက်ပွဲမှာလည်း ရှမ်းတိုင်းရင်းသားရေးရာလွှတ်တော်နေရာကနေ ဝင်ရောက်ယှဉ်ပြိုင်ခဲ့သူဖြစ်ပြီး အနိုင်မရရှိခဲ့ပေ။
ရွေးကောက်ပွဲပြီးစီးသွားပေမယ့် ကချင်ပြည်နယ်ထဲက မဲရလဒ်တွေအားလုံးတော့မထွက်ရှိသေးပါဘူး။
မဲရလဒ်တွေကတော့ ရွေးကောက်ပွဲဝင်ပြိုင်တဲ့ ပါတီအသီးသီးက သိရှိထားကြပြီလည်းဖြစ်တယ်လို့ ဆိုပါတယ်။
TNDP က ရှမ်းတိုင်းရင်းသားရေးရာလွှတ်တော် နေရာတစ်နေရာအပြင် PR စနစ် ရွေးကောက်မှုကနေ အမျိုးသားလွတ်တော် (၁)ဦး နဲ့ ပြည်နယ်လွှတ်တော် (၂) ဦး ကိုယ်စားလှယ်တွေရရှိမှာဖြစ်တယ်လို့ ကနဦးသတင်းအရ သိရပါတယ်။
ရွေးကောက်ပွဲ အပိုင်း(၃) ကျင်းပဖို့ ၂ ရက်အလိုမှ ကချင်ပြည်နယ်ထဲက KIA+PDF ပူးပေါင်းတပ်တို့ထိန်းချုပ်ထားတဲ့ မံစီမြို့နဲ့ မိုးမောက်မြို့တို့ကို ရွေးကောက်ပွဲမကျင်းပတော့ကြောင်း ကြေညာခဲ့ပါတယ်။
၂၀၂၅ ခုနှစ် ရွေးကောက်ပွဲမှာ ကြံ့ခိုင်ရေးနဲ့ဖွံ့ဖြိုးရေးပါတီက လွတ်တော်နေရာအများဆုံးအနိုင်ရရှိထားပြီး တိုင်းရင်းသားပါတီတွေက အနည်းအကျဉ်းသာ အနိုင်ရရှိထားတာလည်းဖြစ်ပါတယ်။