စက်တင်ဘာ ၂၅ ၊ မြစ်ကြီးနား
ကချင်ပြည်နယ်အတွင်းနေထိုင်နေတဲ့ တိုင်းလုံ(ရှမ်းကြီး)၊တိုင်းလျန်(ရှမ်းနီ)၊တိုင်းလေ၊ တိုင်းဆာနဲ့တိုင်းခန္တီး စတဲ့ရှမ်းတိုင်းရင်းသား(၅)မျိုးတို့ လက်ရှိကြုံတွေ့နေရသောအခက်အခဲများအားဖြေရှင်းနိုင်ဖို့ ရှမ်းအဖွဲ့အစည်းများက တွေ့ဆုံဆွေးနွေးသွားမည်ဟု သိရပါတယ်။
ဆွေးနွေးပွဲကို မြစ်ကြီးနားမြို့၊ ခေမာသီရိရပ်ကွက်ရှိ ရှမ်းမျိုးနွယ်စုများဓမ္မာရုံမှာ မနက်ဖြန် စက်တင်ဘာ(၂၆)နဲ့(၂၇) နှစ်ရက်တာအတွင်း ရှမ်းတိုင်းရင်းသားများချိတ်ဆက်ညှိနှိုင်းဆောင်ရွက်ရေးအဖွဲ့ကဦးဆောင်ကာ ဆွေးနွေးသွားမှာဖြစ်ပါတယ်။
“ ရည်ရွယ်ချက်ကတော့ ကချင်ပြည်နယ်အတွင်းမှာ လတ်တလောဖြစ်ပျက်နေတဲ့ ရှမ်းလူမျိုးတွေရဲ့အခက်အခဲများကို ပထမဦးဆုံးအကြိမ်တွေ့ဆုံညှိနှိုင်းပြီး အဖြေရှာကြဖို့ပေါ့လေ အခက်အခဲတွေကို တင်ပြကြမယ် ဆွေးနွေးကြမယ် ဆွေးနွေးပြီးရင် ဖြစ်နိုင်တာတွေ ဖြစ်သင့်တဲ့အရာတွေကို ဖြေရှင်းအကူအညီတောင်းကြမယ် ဌာနဆိုင်ရာတွေရယ် လက်နက်ကိုင်အဖွဲ့အစည်းတွေကိုပါ ဖြေလျှော့ပေးဖို့တွေပေါ့” ဟု ညှိနှိုင်းဆောင်ရွက်ရေးအဖွဲ့ရဲ့တာဝန်ရှိသူတစ်ဦး ကပြောပြပါတယ်။
ရှမ်းအဖွဲ့အစည်းအသီးသီးမှ ကိုယ်စားလှယ် (၁၀၀)ကျော်တို့ တက်ရောက်ဆွေးနွေးကြဖို့ ကနဦးစာရင်းရရှိထားကြောင်းလည်း ၎င်းထံမှသိရပါတယ်။
တက်ရောက်တဲ့ရှမ်းအဖွဲ့အစည်းတွေထဲမှာ ကချင်ပြည်နယ်မြို့နယ်အသီးသီးရှိ စာပေယဉ်ကျေးမှုအဖွဲ့များ၊ CSO/ CBO နဲ့ အရပ်ဘက်အဖွဲ့အစည်းအားလုံးပါဝင်မှာဖြစ်ကြောင်း ဆိုပါတယ်။
ကချင်ပြည်နယ်အတွင်းရှိ ဗန်းမော်နဲ့ ဖားကန့်မြို့နယ်တွေမှာ လက်နက်ကိုင်တပ်ဖွဲ့များရဲ့ တိုက်ပွဲများဖြစ်ပွားနေမှုတွေကြောင့် ရှမ်းတိုင်းရင်းသားအများစုဟာ မြစ်ကြီးနားမြို့နဲ့ မိုးညှင်းမြို့တို့မှာ စစ်ဘေးတိမ်းရှောင်နေရကာ စားဝတ်နေရေးအခက်အခဲများစွာကြုံတွေ့နေရတာလည်း ဖြစ်ပါတယ်။
မြစ်ကြီးနား နဲ့ မိုးညှင်းမြို့ပေါ်ကို ရှမ်းတိုင်းရင်းသား စစ်ဘေးရှောင်တွေ အများအပြားလာရောက် တိမ်းရှောင်နေရပြီး သူတို့တွေရဲ့ အကြပ်အတည်းတွေဟာလည်း စိန်ခေါ်မှု ကြီးတစ်ရပ်အဖြစ်ရှိနေကြောင်း သိရပါတယ်။