အောက်တိုဘာ ၇ ၊ ရှမ်းနီအသံ
စစ်ကိုင်းတိုင်းဒေသကြီးအထက်ပိုင်း ကသာမြို့အနီး ပြည်သာယာကျေးရွာမှာ သန်းခေါင်စာရင်းကောက်ယူနေချိန် စစ်ကောင်စီ ရဲ့ တပ်ဖွဲ့ဝင်တွေ နဲ့ ကသာ ဒေသကာကွယ်ရေးတပ်ဖွဲ့ PDF တို့ကြား ထိတွေ့တိုက်ပွဲဖြစ်ပွားခဲ့တယ်လို့ ဒေသခံတွေဆီကနေ သိရပါတယ်။
အောက်တိုဘာလ ၆ ရက်နေ့မနက်ပိုင်းမှာ ကသာမြို့နှင့် ခလရ(ခြေလျင်တပ်ရင်း) ၃၀၉ တပ်ရင်း ကြားရှိ ပြည်သာယာတံတား အနီးတဝိုက်မှာ သန်းခေါင်စာရင်းကောက်ယူမှုကို တာဝန်ယူတဲ့ လုံခြုံရေးတပ်ဖွဲ့တွေနဲ့ PDF တို့ တစ်နာရီကြာ ပစ်ခတ်မှုတွေဖြစ်ပွားခဲ့တာဖြစ်ပါတယ်။
“ မနေ့တုန်းက ပြည်သာယာကို သန်းခေါင်စရင်းကောက်တဲ့အခါကို သူတို့လုံခြုံရေးယူတဲ့အဖွဲ့တွေရှိတယ်လေ။ အဲဒီအဖွဲ့တွေနဲ့ PDF တွေက အမှတ် ၂ တံတား ( ပြည်သာယာတံတား) လမ်းပိုင်းကိုဖြတ်လာတာတွေလို့ ပစ်ခတ်မှုဖြစ်တာ။ အင်အားတော့မများပါဘူး။ ဟိုဘက်က (PDF) လေးငါးယောက်လောက်တက်လာတာပါ ၊ နောက်ထပ်တော့ဘာမှမဖြစ်တော့ပါဘူး။ မနေ့ကအဲ့ဒါလေးပါပဲ တိုက်ပွဲက ခဏလေးဖြစ်သွားတာပါ လက်နက်ငယ်နဲ့ ခဏလေး ပစ်ကြခတ်ကြတာလေးပါပဲ ကြီးကြီးမားမား မဟုတ်ပါဘူး” လို့ ဖြစ်စဉ်ကိုသိတဲ့ ကသာမြို့ခံတစ်ဦးက ပြောပါတယ်။
အဲ့ဒီပစ်ခတ်မှုတွေဖြစ်ပွားပြီးနောက်ပိုင်းမှာလည်း သန်းခေါင်စာရင်းကောက်ယူမှုတွေကို ဆက်လုပ်ခဲ့တယ်လို့ သိရပါတယ်။
စစ်ကောင်စီက အောက်တိုဘာလ ၅ ရက်နေ့ကတည်းက ကသာမြို့နယ်မှာ သန်းခေါင်စာရင်းကောက်ယူမှုတွေကို စတင်လုပ်ဆောင်ခဲ့တာဖြစ်ပြီး ရပ်ကွက် ၄ နဲ့ ရပ်ကွက် ၈ တို့မှာ ကောက်ယူမှုတွေပြုလုပ်ခဲ့တယ်လို့သိရပါတယ်။
ကသာမြို့နယ်အတွင်းက ကျေးရွာတွေကိုတော့ စစ်ကောင်စီအနေနဲ့ ကောက်ယူနိုင်ခြင်းမရှိသေးပဲ မြို့ နှင့် မြို့အနီးရှိကျေးရွာတွေမှသာ ကောက်ယူမှုကို စတင်နိုင်သေးကြောင်း ဒေသခံတွေကပြောဆိုကြပါတယ်။
ကသာမြို့ဟာ ခရိုင်မြို့တစ်ခုဖြစ်ပြီး ကသာမြို့နယ် ၊ အင်းတော်မြို့နယ် ၊ ထီးချိုင့်နယ် ၊ ဗန်းမောက်မြို့နယ် တွေ ပါဝင်ပြီး လတ်တလောမှာ ကသာမြို့နယ်တစ်ခုတည်းသာ သန်းခေါင်စာရင်းကောက်ယူမှုတွေကို ပြုလုပ်နိုင်သေးတာဖြစ်တယ်လို့ သိရပါတယ်။
၂၀၂၄ ခုနှစ် သန်းခေါင်စာရင်းကောက်ယူတဲ့နေရာမှာ စစ်ကိုင်းတိုင်းဒေသကြီးအတွင်းက မြို့နယ် ၂၇ မြို့နယ်မှာ လူအင်အား (၁၀၂၆) ဦးနဲ့ ကောက်ယူမှုတွေကိုပြုလုပ်နေတယ်လို့စစ်ကောင်စီက ထုတ်ပြန်ထားပါတယ်။