(သို့) စိုင်းဆိုင်မောဝ်
ဇူလိုင် ၁၈ ၊ ရန်ကုန်
“ စိုင်းဆိုင်မောဝ် လောကကြီးကို မျက်လုံးမိတ်ပြီး ထွက်ခွာသွားပြီ” လို့ သူ့ရဲ့ ဆွေမျိုးတစ်ဦးက ဇူလိုင်လ ၁၇ ရက်နေ့ ညဦးပိုင်းမှာ လူမှုကွန်ရက်ကနေ အသိပေးလိုက်ပါတယ်။
လူမှုကွန်ရက်သုံးစွဲသူတွေဟာ အလျှင်စလို ဖြန့်ဝေမှုတွေ၊ ဝမ်းနည်းကြောင်းတွေ ပြသလာကြပါတယ်။ စိုင်းဆိုင်မောဝ် ဟာ သာမာန်အဆိုတော် ၊ နာမည်ကြီးအဆိုတော်တစ်ဦးပဲ မဟုတ်ပါဘူး။ သူဟာ ရှမ်းတေးသီချင်းတွေကို သမိုင်းတစ်ခေတ်ရောက်အောင် ၊ ခေတ်သစ်ရှမ်းသီချင်းတွေကို ဖန်တီးခဲ့သူတစ်ဦးဖြစ်ပါတယ်။ ၁၉၄၈ ခုနှစ် ဖေဖော်ဝါရီလ ၁၈ ရက်နေ့မှာ မူဆယ်မြို့မှာ မွေးဖွားခဲ့သူတစ်ဦးဖြစ်ပါတယ်။ ဆယ်ကျော်သက်အရွယ်ကတည်းက သီချင်းကို ရေးသားသီဆိုတတ်နေသူတစ်ဦးလည်းဖြစ်ပါတယ်။ ဆယ်ကျော်သက်အရွယ်မှာ ရှမ်းသီချင်း ၊ ဗမာသီချင်းတွေကို ရေးစပ်သီဆိုသူဖြစ်ခဲ့သလို ရှမ်းအဆိုတော် စိုင်းထီးဆိုင် နဲ့ စိုင်းဆိုင်မောဝ် တို့ဟာ ကလောမြို့မှာ ပထမဆုံး စင်ပေါ်တက်ပြီး မြန်မာသီချင်းသီဆိုခဲ့ကြပါတယ်။ စိုင်းဆိုင်မောဝ်ရဲ့ အမည်ရင်းက စိုင်းညွှန့်မောင် ဖြစ်ပြီး ခေတ်သစ်ရှမ်းသီချင်းတွေ တေးသံသွင်းတဲ့နေရာမှာ ဗမာနာမည်ဖြစ်နေတာကြောင့် အခက်တွေ့နေတဲ့ သူ့ကို ထိုင်းဆန်ဆန် စိုင်းဆွမ်ယုတ် ဆိုတဲ့နာမည်မှည့်ပေးလိုက်ပါတယ်။ ရှမ်းခေတ်သစ်တေးသီချင်းအစမှာတော့ ( နမ့်ခုန်း ၊ ခုန်ဆမ်လော ၊ ကော့ထုတ်တာပီ ) စတဲ့တေးသီချင်းတွေကို ထိုင်းနိုင်ငံ ကျိုင်းဟိုင်းမှာ သွားသွင်းခဲ့ပါတယ်။ သူ့ရဲ့ ခေတ်သစ်ရှမ်းတေးသိီချင်းတွေကို ကျိုင်းဟိုင်း ရေဒီယိုက ထုတ်လွင့်ပေးပြီး လူငယ်တွေကြား စိတ်ဝင်းစားမှုမြင့်တက်ပေမယ့်လူကြီးတွေကြား ဝေဖန်မှုတွေက ၊ မကြိုက်ကြတဲ့တွေကလည်း ရှိသား။ သို့ပေမယ့်သူဟာ ရှမ်းခေတ်သစ်တေးသီချင်းတွေကို လူကြီး၊ လူငယ်တွေ လက်ခံလာအောင် တစိုက်မတ်မတ်နဲ့ အချိန်ကာလအတန်ကြာအောင် လုပ်ဆောင်ခဲ့ရသူတွေထဲက တစ်ဦးဖြစ်ပါတယ်။ နမ့်မောဝ်မြစ်ကမ်းဘေးကမှာ မွေးဖွားကြီးပြင်းလာသူတစ်ဦးဖြစ်တာကြောင့် စိုင်းဆွမ်ယုတ် နာမည်ကနေ ဒုတိယအကြိမ်တေးစီးရီးမှာ စိုင်းဆိုင်မောဝ် ဆိုပြီးနာမည်ပြောင်းလဲခဲ့ပါတယ်။ စိုင်းဆိုင်မောဝ်ရဲ့ တေးသီချင်းသံတွေဟာ ရှမ်းပြည်တနှံတလျားကို ပျံ့လွင့်လာပါတော့တယ်။ ရှမ်းတေးသံရှင်ဘဝနဲ့ ဧရိယာစတုရန်းမိုင် ခြောက်သောင်း ကျယ်ပြန့်တဲ့ ရှမ်းပြည် တစ််ခွင်မှာ စိုင်းဆိုင်မောဝ်ရဲ့ ရှမ်းတေးသံတွေဟာ လွင့်ပျံ့နေပါတော့တယ်။၁၉၇၇-၇၈ ခုနှစ်မှာ ရန်ကုန်ကိုသွားပြီး ပထမဆုံး မြန်မာတေးသီချင်းဖြစ်တဲ့ “ ချစ်သောနန်းနဲ့ ရှမ်းမောမြေ” တေးစီးရီးသွင်းခဲ့ပါတယ်။ မြေပြန့်သားတွေဟာ စိုင်းဆိုင်မောဝ်ရဲ့ ဒီတေးစီးရီးမှာပဲ ရှမ်းတိုင်းရင်းသားတစ်ယောက်ရဲ့ မြန်မာလက်ရာတေးသီချင်းကို ခံစားမိလာကြပါတယ်။ ချစ်ဇနီးလေးအေး နဲ့ ညောင်ညိုရိပ်အောက်က ချစ်စကား ဆိုတဲ့ တေးနှစ်ပုဒ်ဟာ လူတွေအကြိုက်တေးသီချင်းဖြစ်လာခဲ့ပြီးတစ်နိုင်ငံလုံးမှာ စိုင်းဆိုင်မောဝ်ကို သိလာခဲ့တယ်လို့ စိုင်းဆိုင်မောဝ်ကိုယ်တိုင်ပြောဆိုထားပါတယ်။ နောက်ပိုင်းမှာ ကားသမားဘဝနဲ့ ရှမ်းမြောက်တခွင် အကြောင်းကိုလည်း “မူဆယ်နမ့်ခမ်းလမ်း” ဟာ ခေတ်အဆက်ဆက်က လူငယ်တွေကြား နာမည်ကြီးနေတဲ့တေးသီချင်းဖြစ်နေဆဲပါတယ်။ အချစ်သီချင်း ၊အလွမ်းသီချင်း ၊ ရှမ်းပြည်ရဲ့အလှတရားသီချင်းတွေကို ရှမ်း၊ မြန်မာ နှစ်ဘာသာနဲ့ ဆယ်စုနှစ်ငါးခုတိုင်ရေးသား သီဆိုခဲ့ပါတယ်။ ရှမ်းတေးစီရီးခွေ ပေါင်း (၄၀)ကျော်၊ ဗမာသီချင်းခွေပေါင်း (၃၀)ကျော်ထွက်ခဲ့ပြီး ရေးသားထားတဲ့ ရှမ်းသီချင်း ပုဒ်ရေ (၂၀၀)ကျော်၊ ဗမာသီချင်း ပုဒ်ရေ (၁၀၀)ကျော်ဝန်းကျင်ကျော်ရှိတယ်လို့ သိရပါတယ်။ ဒီတေးသီချင်းပေါင်းများစွာထဲမှာ “ ရှမ်းပဲပုတ်လေးကျွန်တော်” ဟာ ရောက်ရာအရပ်က ရှမ်းတိုင်းရင်းသားတွေအဖို့ ဂုဏ်ယူနေရတဲ့တေးသီချင်းဖြစ်လာခဲ့ပါတယ်။ “ ဆိုင်မောဝ်လို အသံနောက်ထပ်တစ်ယောက်မရှိတော့ဘူး” လို့ စိုင်းဆိုင်မောဝ် တေးသီချင်းကို နှစ်ပေါင်း ၃၀ ကျော်ကြာ အားပေးလာဆင်လာတဲ့ ပရိတ်သတ်တစ်ဦးက မှတ်ချက်ပြုပါတယ်။ စိုင်းဆိုင်မောဝ် ရဲ့ သီချင်းတွေဟာ တောင်ပေါ်မြေရဲ့အလှ၊ တောင်ပေါ်သားတွေရဲ့ ဘဝ တွေထဲ အချစ် ၊ အလွမ်းလေးထည့်ပြီး ဖော်ကြူးထားမှုတွေက များပါတယ်။ “ ချယ်ရီသက်သေမောင့်မျက်ရည်” တေးသီချင်းဟာလည်း လူကြိုက်များတဲ့ သီချင်းဖြစ်သလို စိုင်းဆိုင်မောဝ်ရဲ့ ဂန္တဝင်မြောက်တဲ့ တေးတစ်ပုဒ်လည်းဖြစ်ပါတယ်။ အခုတော့ ချယ်ရီတွေကို သူကိုယ်တိုင် ငိုစေခဲ့ကာ ၂၀၂၄ ခုနှစ် ဇူလိုင်လ ၁၇ ရက်နေ့မှာ သူချစ်တဲ့ ချယ်ရီမြေကို နှုတ်ဆက်ထွက်ခွာသွားခဲ့ပြီ။ ယမ်းငွေ့တွေဝေတဲ့ ချယ်ရီမြေအတွက် သူတေးသီချင်းတွေထားပြီး အပြီးတိုင်နှုတ်ဆက်သွားခဲ့ပြီလည်းဖြစ်ပါတယ်။