ဩဂုတ် ၈ ၊ ဟုမ္မလင်း
စစ်ကိုင်းတိုင်းဒေသကြီးရဲ့ တိုင်းရင်းသားရေးရာဝန်ကြီး ဦးစိုင်းနိုင်နိုင်ကျော် နေရာမှာ ရှမ်းနီ(တိုင်းလျန်) သွေးစည်းညီညွတ်ရေးပါတီမှ ဦးစိုင်းလှိုင်ငြိမ်းကို ပြောင်းလဲခန့်အပ်လိုက်တယ်လို့ ဩဂုတ်လ ၇ ရက်နေ့မှာ ထုတ်ပြန်လာပါတယ်။
ဩဂုတ်လ ၇ ရက်နေ့မှာ အမျိုးသားကာကွယ်ရေးနဲ့ လုံခြုံရေးကောင်စီက ပြည်နယ် သုံးခုနဲ့ တိုင်းဒေသကြီး ၂ ခုက အစိုးရအဖွဲ့ဝင် ဝန်ကြီးတွေကို အပ်ခန့်ကြောင်း ထုတ်ပြန်ခဲ့တာဖြစ်ပါတယ်။
တိုင်းရင်းသားရေးရာဝန်ကြီးဟောင်းဖြစ်တဲ့ ဦးစိုင်းနိုင်နိုင်ကျော်ဟာ ၂၀၂၁ ခုနှစ် စစ်ကောင်စီက ဖွဲ့စည်းတဲ့ အိမ်စောင့်အစိုးရအဖွဲ့ရဲ့ စစ်ကိုင်းတိုင်း တိုင်းရင်းသားရေးရာဝန်ကြီးအဖြစ် ၄ နှစ် တာဝန်ယူခဲ့တာလည်းဖြစ်ပါတယ်။
သူဟာလက်ရှိ SSP ပါတီရဲ့ ဒုဥက္ကဌ အဖြစ် တာဝန်ယူထားသူတစ်ဦးလည်းဖြစ်ပြီး ရွေးကောက်ပွဲ ပြုလုပ်မယ့်အချိန်နဲ့ ဝန်ကြီးခန့်အပ်ထားချိန်ဟာ နီးကပ်နေတာလည်းဖြစ်ပါတယ်။
ဦးစိုင်းလှိုင်ငြိမ်းဟာ ၂၀၂၀ ရွေးကောက်ပွဲမှာ SSP ပါတီကနေ စစ်ကိုင်းတိုင်း ရှမ်းတိုင်းရင်းသားရေးရာကိုယ်စားအဖြစ် ဝင်ရောက်ယှဉ်ပြိုင်ခဲ့ဖူးသူတစ်ဦးလည်းဖြစ်ပါတယ်။
ဒါ့အပြင် သူဟာ စစ်ကိုင်းတိုင်းဒေသကြီး လူငယ်ရေးရာ ကိစ္စရပ်တွေနဲ့ ရှမ်းနီတိုင်းရင်းသား စာပေ၊ လူငယ် စတဲ့အဖွဲ့အစည်းအသီးသီးမှာလည်း ပါဝင်လှုပ်ရှားခဲ့သူလည်းဖြစ်ပါတယ်။