ဧပြီ ၂၀ ၊ စစ်ကိုင်း
စစ်ကိုင်းတိုင်း ၊ မကွေးတိုင်း နဲ့ ချင်းပြည်နယ်တို့မှာ တိုက်ပွဲတွေကြောင့် စစ်ဘေးတိမ်းရှောင်နေရသူ သုံးသိန်းကျော်အထိမြင့်တက်လာခဲ့ပြီဖြစ်တယ်လို့ ကုလသမဂ္ဂလူသားချင်းစာနာမှုဆိုင်ရာညှိနှိုင်းရေးရုံး က သတင်းထုတ်ပြန်ပါတယ်။
ဧပြီလ ၁၁ ရက်နေ့ထိ UNOCHA က ပြုလုပ်ထားတဲ့ စာရင်းတွေအရ မြန်မာနိုင်ငံမှာ စစ်ဘေးတိမ်းရှောင်နေရသူ စုစုပေါင်းလည်း ၉၁၂၇၀၀ အထိရှိလာခဲ့တယ်လို့ဆိုပါတယ်။
ဒီထဲက ငါးသိန်းခွဲကျော်က ၂၀၂၁ ခုနှစ် အာဏာသိမ်းပြီးတဲ့မှ ထွက်ပြေးတိမ်းရှောင်နေရသူတွေလည်းဖြစ်ပါတယ်။
ရံပုံငွေနည်းပါးမှု နဲ့ သွားရောက်အကူအညီပေးရေး စိန်ခေါ်မှုတွေကြားက လူဦးရေ တစ်သန်းခွဲနီးပါးကိုလည်း စားနပ်ရိက္ခာဖူလုံရေး အရေးပေါ်အကူအညီတွေပေးထားပြီးဖြစ်တယ်လို့ဆိုပါတယ်။
ကုလသမဂ္ဂက တောာင်းခံထားတဲ့ လူသားချင်းစာနာမှုတုံ့ပြန်ရေးအစီအစဉ်အရ လိုငွေ ဒေါ်လာ ၈၂၆ သန်းရှိပေမယ့် လက်ရှိအချိန်ထိ လိုအပ်တဲ့ ရံပုံငွေ ၅ ရာခိုင်နှုန်းသာ ရရှိသေးတယ်လို့ ဆိုပါတယ်။
အာဟာရကဏ္ဍမှာတော့ ကြိုတင်ကာကွယ်ရေးနဲ့ ကုသရေးဆိုင်ရာ အာဟာရပစ္စည်း ရရှိဖြည့်ဆည်းရေးဟာ အစောဆုံးဇွန်လမှာတင် အခက်အခဲတွေရှိလာနိုင်ပါတယ်လို့လည်း ပြောဆိုထားပါတယ်။