ဇန်နဝါရီ ၂၄ ၊ ပင်လည်ဘူး
စစ်ကိုင်းတိုင်းဒေသကြီး ပင်လည်ဘူးမြို့ပေါ်မှာ ဒေသခံကာကွယ်ရေးတပ် နဲ့ စစ်ကောင်စီတပ်တို့ကြား ဇန်နဝါရီလ (၁၈) ရက်နေ့က တိုက်ပွဲဖြစ်ပွားခဲ့ပြီး နှစ်ဖက် အကျအဆုံးများခဲ့တယ်လို့ဆိုပါတယ်။
ဇန်နဝါရီလ (၁၈) ရက်နေ့ မနက် ၃ နာရီကနေ (၈) နာရီအထိ ဖြစ်ပွားတဲ့ မြို့ပြတိုက်ပွဲမှာ စစ်ကောင်စီဘက်က အရာရှိအပါအဝင် တပ်သားအများအပြား သေဆုံးခဲ့သလို ဒေသခံကာကွယ်ရေးတပ်တွေဘက်ကလည်း အကျအဆုံးများခဲ့ကြောင်း စုံစမ်းသိရှိရပါတယ်။
ဒီတိုက်ပွဲပြီးတဲ့ ရက်အနည်းငယ်အကြာမှာပဲ မြို့ပေါ်ရဲ့ အများစု နီးစပ်ရာ ဒေသတွေဖြစ်တဲ့ ဗန်းမောက်မြို့နယ် နဲ့ မြို့နဲ့ဝေးတဲ့ ကျေးရွာဆီကို ထွက်ပြေးတိမ်းရှောင်နေရတယ်လို့ ဆိုပါတယ်။
“ပင်လည်ဘူးအခြေအနေကတော့ နှစ်အိမ်မှာတစ်ယောက် တစ်အိမ်တစ်ယောက်တောင်မကျန်တော့ဘူးမောင်၊ သူတို့ကတော့အဲ့မှာတိုက်ပွဲဖြစ်တယ်လို့ပြောတာမောင်၊ ရွာတွေမှာသွားနေတယ် ၊ ဗန်းမောက်ဘက်ကို ကားကြီးကားငယ်တွေနဲ့ အဲ့လိုရွေ့ပြောင်းပြီးနေကြတာပါ” ဟု စစ်ဘေးရှောင်တွေကိုတွေ့မြင်ခဲ့ရသူတစ်ဦးက ရှမ်းနီအသံကို ပြောပါတယ်။
ပင်လည်ဘူးမြို့လက်ရှိအချိန်မှာ အိမ်အားလုံးက တံခါးပိတ်ထားပြီး စျေးဆိုင်နှစ်ဆိုင်လောက်သာ ဖွင့်လှစ်တယ်လို့ မနေ့က ပင်ဘည်ဘူးမြို့ကိုရောက်ရှိခဲ့သူတွေက ဆိုပါတယ်။
စစ်ဘေးရှောင်တွေက ပင်လည်ဘူးမြို့နဲ့ ဝေးတဲ့ ကျေးရွာမှာရှိတဲ့ ဘုန်းတော်ကြီးကျောင်းတွေမှာ သွားရောက်ခိုလှုံကြတာဖြစ်တယ်လို့ဆိုပါတယ်။
ဗန်းမောက်မြို့နယ်ထဲက တချို့ကျေးရွာတွေမှာလည်း စစ်ဘေးလာရောက်ရှောင်နေကြသူတွေရှိနေပြီဖြစ်သော်လည်း စာရင်းအသိအကျကိုတော့ ကောက်ခံနိုင်ခြင်းမရှိသေးပါဘူး။
ပင်လည်ဘူးမြို့နယ်မှာ မြို့ပေါ်နေတဲ့ လူဦးရေ နှစ်ထောင်ဝန်းကျင်ရှိတဲ့ မြို့တစ်ခုလည်းဖြစ်ပါတယ်။
ပင်လည်ဘူးမြို့နယ်ကို စစ်ကောင်စီက ဖုန်းလိုင်းနဲ့ အင်တာနက်လိုင်းတွေကိုဖြတ်တောက်ထားပြီး ဒေသခံကာကွယ်ရေးတပ်တွေကို တိုက်ခိုက်တာ လနဲ့ချီကြာမြင့်နေပြီဖြစ်ပြီး လက်ရှိအချိန်ထိ ဖုန်းလိုင်းနဲ့ အင်တာနက်လိုင်းတွေက ပြတ်တောက်နေဆဲဖြစ်ပါတယ်။