ဇွန်၇၊ဖားကန့်
ဖားကန့်မြို့နှင့် မြို့အနီးတစ်ဝိုက် ကျောက်မှော်တွေမှာ ယခုရက်ပိုင်း လုယက်ဓားပြမှုတွေက ရက်ဆက်ဖြစ်ပွားနေမှုကြောင့် တရုတ်ကျောက်လောပန်း(သူဌေး)များ မြို့ကနေ ရှောင်ထွက်နေကြောင်း စုံစမ်းသိရပါတယ်။
ဒီလိုရှောင်ထွက်နေမှုများကြောင့် ကျောက်စိမ်းအရောင်းအဝယ်စျေးကွက်အေးနေတယ်လို့ ဒေသခံ ကျောက်ပွဲစားများက ပြောဆိုနေပါတယ်။
“ နဲနဲတော့ပျောက်တော့ပျောက်သွားတယ်။ ခါတိုင်းက သုံးဦးလောက်ရှိတယ်ဆို တစ်ဦးလောက်ပဲကျန်တော့တယ် အေ့လိုဖြစ်သွားတယ် ။ အကုန်လုံးတော့မဟုတ်ပါဘူး ညဘက်ကျောက်ဝိုင်းတွေမှာဆို အသွားအလာကျဲသွားတာပေါ့” ဟု လုယက်မှုတွေကို စိုးရိမ်ကြောက်လန့်မှုကြောင့် တရုတ်ကျောက်လောပန်းများ ရှောင်ထွက်နေမှုနှင့်ပတ်သက်ပြီး ဆိပ်မူကျေးရွာသားတစ်ဦးက အခုလိုပြောပြသွားတာပါ။
လုံးခင်းကျေးရွာမှာလည်း ကျေးရွာတွင်း သွားလာလှုပ်ရှားမှု မရှိသလောက်နည်းသွားကြပြီး တရုတ်ကျောက်လောပန်းများသာမက ကျောက်ရောင်းဝယ်ရေးလုပ်ကိုင်သူများ၊ လက်လုပ်လက်စား ၊ ရေမဆေးကျောက်ရှာဖွေသူများ အတော်ပင်နည်းပါးသွားသည်ဟု ဒေသခံများက ဆိုကြပါတယ်။
တရုတ် ကျောက်လောပန်းများ နည်းပါးသွားခြင်းကြောင့် ကျောက်အရောင်းအဝယ်များမှာ စျေးကွက်အေးနေပြီး ဝယ်လက်ရှားပါးမှုများ ဖြစ်ပေါ်နေကြောင်း သိရပါတယ်။
“ ကျောက်အရောင်းအဝယ်က အေးပြီဆိုလို့ရှိရင် စျေးကွက်ကလည်းအေးတယ် ဒီမှာလည်းအဲ့လိုဆိုတဲ့အခါကျတော့ မစည်တော့တဲ့အခါကျ အကုန်လုံးဆက်နွယ်နေတာပေါ့ ကျောက်စျေးကွက်တင်မဟုတ်ဘူး အသံပလံတွေနဲ့ဆိုတော့ လုပ်စားကိုင်စားတွေအကုန်ကြောက်ကုန်ကြတာပေါ့ ” ဟု လုံးခင်းကျေးရွာသားတစ်ဦးက ရှမ်းနီအသံကို ပြောပြပါတယ်။
ကျေးရွာတွေတွင် နေ့လည်နေ့ခင်းအချိန်မှာပင် စည်ကားမှုမရှိတော့သလို ညပိုင်းအချိန်တွေမှာတော့ အကြောင်းတစ်စုံတစ်ရာမရှိပါက နေအိမ်အပြင်သို့ထွက်သွားလာခြင်းမရှိကြပဲ နေအိမ်အတွင်းတိတ်ဆိတ်စွာနေထိုင်နေကြရသည်ဟု ဆိုကြပါတယ်။
“ အကြောက်ဆုံးက ဓားပြမှုပဲ အခုဟာက မင်း. တောမီးလောင် တောကြောင်လက်ခမောင်းခတ်ပဲလေ။ ဘယ်သူမှန်းမသိ ဘယ်ဝါမှန်းမသိ အဲ့လိုဖြစ်နေကုန်ပြီ ” ဟု ခြိမ်းခြောက်ဓားပြမှုများ ဖြစ်ပေါ်နေမှုကို ဆိပ်မူဒေသခံတစ်ဦးက ဆိုတာပါ။
ဖားကန့်မြို့နယ် အခုရက်သတ္တတစ်ပတ်အတွင်း တရုတ်သူဌေး (၂) ဦး ၊ တည်းခိုခန်းပိုင်ရှင် တစ်ဦး ၊ ကျောက်ရောင်းဝယ်ရေးလုပ်ကိုင်နေသူ (၁) ဦး လုယက်ဓားပြတိုက်ခံရမှုဖြစ်ပွားခဲ့ပါတယ်။
အခုလိုဖြစ်ရပ်တွေဟာ တရားဥပဒေစိုးမိုးမှု ပျောက်ဆုံးနေခြင်းကြောင့် ဖြစ်တယ်လို့ ဖားကန့်ပြည်သူများက ပြောဆိုနေကြပါတယ်။