နိုဝင်ဘာ ၅ ၊ မိုးကုတ်
TNLA က တပ်ပြန်ဆုတ်မယ့် မိုးကုတ်မြို့မှာ စစ်ဘေးတိမ်းရှောင်ဖို့အတွက်ကားလက်မှတ်ခတွေဟာ တစ်ဦးကို ကျပ် ရှစ်သိန်းအထိဒီနေ့မှာ မြင့်တက်လာခဲ့တယ်လို့ ဒေသခံတွေက ပြောပါတယ်။
မိုးကုတ်မြို့ကို TNLA က တပ်ပြန်ဆုတ်မှာဖြစ်ပေမယ့် PDF များက ဆက်လက်ကာကွယ်သွားမယ်လို့ ကြေညာထားပြီး တိုက်ပွဲတွေပြင်းထန်လာမှာကို ဒေသခံတွေက စိုးရိမ်ကြတဲ့အတွက် စစ်ဘေးတိမ်းရှောင်ကြတာဖြစ်တယ်လို့ သိရပါတယ်။
ကားခတွေ စျေးမြင့်တက်နေပမယ့်လည်း တစ်ရက်ကို ကားအစီးရေ ၂၀ ကျော် မိုးကုတ်ကနေ ထွက်ခွာနေကြတယ်လို့ ဒေသခံတွေကဆိုပါတယ်။
“ အခု ဒီနေ့ကားလက်မှတ်ခပေါက်စျေးက တစ်ယောက်ကို ရှစ်သိန်းရှိတယ်။ ပိုက်ဆံရှိတဲ့သူတွေပဲ စစ်ရှောင်လို့ရတာ၊ မရှိရင်မလွယ်ဘူး။ တစ်ရက်ကို အခုကြည့်နေတာ ကားအစီး ၂၀ ကျော်လောက် ထွက်နေတယ်။ ဂိတ်ဖွင့်တဲ့အချိန်ကစလို့ သူတို့က အစောကြီးထွက်ကြတာ” လို့ ယာဉ်လိုင်းတွေနဲ့ နီးစပ်သူ တစ်ဦးကပြောပါတယ်။
မိုးကုတ်-မိုးမိတ်လမ်းပိုင်း အဲ့ဒီကနေတဆင့် တကောင်း၊ကြာညှပ်မှတဆင့် ရွှေဘို-မြစ်ကြီးနားဗျူဟာလမ်းကနေ မန္တလေးကို စစ်ဘေးရှောင်ကြတာပါ။
မိုးကုတ်မှာ တိုက်ပွဲကြီးမားလာနိုင်တဲ့ စိုးရိမ်မှုတွေကြောင့် ဒေသခံစစ်ရှောင်တွေအပြင် ဒေသခံလုပ်ငန်းတချို့ပိတ်သိမ်းပြီး ထွက်ခွာမှုတွေလည်းရှိနေတယ်လို့ သိရပါတယ်။
မိုးကုတ်မြို့သိမ်းတိုက်ပွဲကို TNLA နဲ့အတူ ပါဝင်ခဲ့တဲ့ မိုးကုတ်ဗျူဟာအပါအဝင် PDF တပ်တွေဟာ အင်အားတိုးချဲ့ထားပြီး TNLA က မြို့ထဲကတပ်ဆုတ်မယ့်အခြေအနေကို စောင့်ကြည့်နေကြတယ်လို့ PDF တပ်နဲ့ နီးစပ်သူတွေဆီကနေ သိရပါတယ်။
“ အခုကတော့ ကလေးတွေ (PDF) တွေလည်းအင်အားတွေအများကြီးဖြည့်ထားတယ်။ တိုက်ပွဲကတော့ ကြီးကြီးမားမားဖြစ်မယ့်ပုံပဲ။ ပလောင်(TNLA) ကတော့ မဆုတ်သေးဘူး။ အေးအေးဆေးဆေးလေးရှိသေးတယ်” လို့ ဒေသခံတစ်ဦးက ပြောပါတယ်။
မိုးကုတ်မြို့ကနေ စစ်ဘေးမတိမ်းရှောင်သူတချို့ကလည်း TNLA က တပ်ပြန်ဆုတ်မယ့် အခြေအနေကို စောင့်ကြည့်နေကြဆဲဖြစ်ပြီး တိုက်ပွဲဖြစ်ပွားလာမယ့်အခြေအနေမှသာ တိမ်းရှောင်ကြမယ်လို့ သိရှိရပါတယ်။
မိုးကုတ်မြို့ကို ဝင်ရောက်မယ့် လမ်းပိုင်းတွေထဲက မိုးကုတ်-မန္တလေးလမ်းပိုင်းက ဖော့တောလမ်းဆုံ ၊ မိုးကုတ်-ပြင်ဦးလွင် လမ်းပိုင်းက ဒိုးပင်ကျေးရွာ နဲ့ မိုးကုတ်-ကျောက်မဲလမ်းပိုင်းက မိုင်းတင်းကျေးရွာတွေကို စစ်တပ်က ပြန်လည်ထိန်းချုပ်ထားပြီလည်းဖြစ်ပါတယ်။