ရှမ်းနီပါတီများ ပူးပေါင်းရေးအဖြစ် မတ်လကုန်တွင် စတင်ဆွေးနွေးကြမည်ဟု ရှမ်းနီနှစ်ပါတီ က သဘောတူညီမှုရရှိခဲ့သည်။
ထိုသဘောတူညီမှုသည် ဖေဖော်ဝါရီလ ၂၃ ရက်နေ့တွင် ပြုလုပ်သည့် ရှမ်းနီသံဃာတော်များ၏ အထူးအစည်းအဝေးတွင် ရှမ်းနီသံဃာတော် များ၏ စေ့စပ်ညှိနှိုင်းမှုဖြင့် သဘောတူညီခဲ့ခြင်းဖြစ်သည်။
“ အခုပေါင်းမယ်ဆိုလို့ရင်တောင်မှ ရွေးကောက်ပွဲကော်မရှင်က သူတို့သတ်မှတ်ထားတဲ့ကာလရှိ တယ်။ ပါတီတွေမှတ်ပုံတင်ခြင်းနဲ့ အမည်ပြောင်းတာတွေ ၊ ပူးပေါင်းပြီးတော့အမည်ပြောင်းတာတွေ သိရသလောက်တော့ အဲ့ကာလက လွန်သွားပြီ” ဟု ရှမ်းနီအမျိုးသားဖွံ့ဖြိုးတိုးတက်ရေးအကျိုးဆောင်အဖွဲ့ နာယက ဦးစံပြည့်က ရှမ်းနီအသံကိုပြောသည်။
ပါတီနှစ်ခုပူးပေါင်းရေးကို မည်သို့ပူးပေါင်းမည်ဆိုသည်ကို နှစ်ပါတီလုံးက ထိုအစည်းအဝေးတွင် ပြောဆိုထားခြင်းမရှိပေ။
ပါတီနှစ်ခုပူးပေါင်းနိုင်ရေးအတွက် တစ်ပါတီလျှင်ငါးဦးပါဝင်သည့် ကော်မတီနှင့် ကြားနေစေ့စပ် ညှိနှိုင်းပေးမည့်သူအဖြစ် ပါတီနှစ်ခုက ယုံကြည်ရသူ ငါးဦးစီပါဝင်ဆွေးနွေးကြမည်ဖြစ်သည်။
ရှမ်းနီနှစ်ပါတီပူးပေါင်းရေးဆွေးနွေးမှု ပထမဆုံးအကြိမ်ကို မန္တလေးမြို့တွင် ပြုလုပ်မည်ဖြစ်သည်။
၂၀၁၉ခုနှစ် ဩဂုတ်လတွင် ရှမ်းနီနှစ်ပါတီပူးပေါင်းနိုင်ရေးအတွက် ရှမ်းနီသံဃာတော်များ ၏ စေ့စပ်ညှိနှိုင်းမှုများဖြင့် ဆွေးနွေးခဲ့ကြသော်လည်း မူအားဖြင့်သဘောတူညီမှုသာ ရရှိခဲ့ပြီးနောက် ပူးပေါင်းရေးလုပ်ငန်းစဉ်များ ရပ်တန့်နေခဲ့ခြင်းဖြစ်သည်။
ရှမ်းနီအမျိုးသားများဖွံ့ဖြိုးတိုးတက်ရေးပါတီ က ၎င်းတို့၏ ဗဟိုကော်မတီအစည်းအဝေးတွင် ပါတီပူးပေါင်းရေးကော်မတီကိုဖွဲ့စည်းခဲ့ပြီး လာရောက်ဆွေးနွေးနိုင်ရန် လမ်းဖွင့်ထားကြောင်း ထိုကော် မတီဥက္ကဌ ဦးလှသိန်းကပြောဆိုထားသည်။
ရှမ်းနီ(တိုင်းလျှန်)အမျိုးသားများသွေးစည်းညီညွတ်ရေးပါတီသည် ၂၀၂၀ ရွေးကောက်ပွဲနှင့် ပါတီနှစ်ခုပူးပေါင်းရေးကို ဆက်လက်ဆွေးနွေးသွားရမည်ဟု ၎င်းပါတီမှ အထွေထွေအတွင်းရေးမှူးဦး စောဝင်းထွန်းကပြောကြားသည်။
ရှမ်းနီပြည်သူများနှင့် အရပ်ဘက်အဖွဲ့အစည်းများက မဲဆန္ဒနယ်တစ်ခုတည်းတွင် ရှမ်းနီနှစ်ပါတီ ဝင်ရောက်ယှဉ်ပြိုင်ခြင်းကို မလိုလားကြောင်း ပြောဆိုထားကြသည်။