ဇူလိုင် ၂၅ ၊ တာလေ
ရှမ်းပြည်အရှေ့ပိုင်း တာလေမြို့နယ်ခွဲနဲ့ မဲခေါင်မြစ်ကြားမှာရှိတဲ့ လွိုင်ခမ်းတောင်ကုန်းမှာ ကုမ္ပဏီတွေရဲ့ ရွှေတူးဖော်မှုတွေကြောင့် သစ်တာ ၊ လယ်ယာမြေပျက်စီးမှု ၊ရေထုညစ်ညမ်းမှုတွေကို ဒေသခံတွေခံစားနေရတယ်လို့ဆိုပါတယ်။
လွိုင်ခမ်းပတ်ဝန်းကျင်အနီးက ဒေသခံ ၃၅၀ နီးပါးက လယ်ယာမြေလုပ်ကိုင်နေကြပြီး သူတို့တွေရဲ့ လယ်ယာမြေပျက်စီးမှုကြုံတွေ့နေရတယ်လို့ ရှမ်းလူ့အခွင့်အရေးမဏ္ဍိုင်အဖွဲ့က ဇူလိုင်လ ၂၄ ရက်နေ့မှာ ပြောဆိုပါတယ်။
ဒီလိုပျက်စီးနေမှုတွေကြောင့် ဒီရွှေတူးဖော်မှု စီမံကိန်းကို ခြွင်းချက်မရှိလုံးဝရပ်ဆိုင်းဖို့ ၊ပျက်စီးသွားတဲ့ မြေတွေကို ပြင်လည်ပြုပြင်ပေးဖို့ နဲ့ လျော်ကြေးအပြည့်အဝပေးဖို့ ဒေသခံတွေက တောင်းဆိုနေကြတာလည်းဖြစ်ပါတယ်။
လွိုင်ခမ်းတောင်ကနေ ချောင်းဖျားခံလာတဲ့ နမ့်ခမ်းချောင်းနဲ့ နမ့်လင်းချောင်းကို အားထားရတဲ့ ရွာသား ၁၅၀၀ ကလည်း ရွှေတူးဖော်မှုတွေ ထပ်ချဲ့လာမှာကို စိုးရိမ်နေကြတယ်လို့ဆိုပါတယ်။
ဒေသခံတွေ ချက်ပြုတ်စားသောက်ရေးအတွက် မှီခိုနေရတဲ့ ဒီချောင်းတွေ တိမ်ကောလာပြီး ရွံ့နွံတွေကြောင့်လည်း ညစ်ညမ်းနေကာ အသုံးပြုလို့မရနိုင်တော့ဘူးလို့ ဆိုပါတယ်။
ရွှေတူးဖော်မှုတွေက လွန်ခဲ့တဲ့ ဆယ်စုနှစ်တစ်ခုကျော်ကတည်းက လုပ်ဆောင်လာခဲ့ကြပြီး ဒေသခံတွေက ပျက်စီးသွားတဲ့ လယ်ယာမြေ ၊ စိုက်ပျိုးသီးနှံတွေအတွက် လျှော်ကြေးငွေအနည်းငယ်သာရရှခဲ့တယ်လို့လည်းဆိုပါတယ်။