စက်တင်ဘာ ၂ ၊ မိုးကုတ်
ပြီးခဲ့တဲ့ သြဂုတ်လတစ်လအတွင်းမှာ စစ်ကော်မရှင်ရဲ့လေကြောင်းဗုံးကြဲတိုက်ခိုက်တာ၊ လက်နက်ကြီးများနဲ့ပစ်ခတ်ခြင်းတို့တွေကြောင့် မိုးကုတ်မြို့နယ်၊ ကျောက်မဲမြို့နယ်၊မိုင်းငေါ့မြို့နယ်နဲ့ မိုင်းလုံမြို့နယ်တို့တွင် ဒေသခံ(၄၆)ဦး သေဆုံးခဲ့တယ်လို့ သိရပါတယ်။
တအာင်းတပ်(TNLA)က မနေ့က စက်တင်ဘာ(၁)ရက်နေ့မှာ စာရင်းထုတ်ပြန်ခဲ့တာဖြစ်ပြီး သေဆုံးတာအပြင် ထိခိုက်ဒဏ်ရာရရှိခဲ့သူတွေလည်းရှိခဲ့ပါတယ်။
ထိခိုက်ခံရမှုတွေထဲမှာ သီပေါမြို့နယ်လည်းပါဝင်ခဲ့သလို စုစုပေါင်းဒဏ်ရာရရှိသူ (၅၅)ဦးရှိခဲ့ကြောင်း ဆိုပါတယ်။
အများဆုံးသေဆုံးခဲ့တဲ့ မိုးကုတ်မြို့အတွင်းမှာ (၄၁)ဦးထိရှိခဲ့တာဖြစ်ပါတယ်။
“ အခုကတော့ ငြိမ်နေတာ သုံးလေးရက်ရှိနေပြီ၊ဘာအသံမှကိုမကြားတော့ဘူး” လို့ မိုးကုတ်မြို့ခံတစ်ဦးက ဆိုပါတယ်။
သေဆုံးမှုတွေထဲမှာ မိုးကုတ်မြို့အပြင် ကျောက်မဲမြို့နယ်မှာ (၂)ဦး၊ မိုင်းလုံမြို့နယ်မှာ(၂)ဦး၊ မိုင်းငေါ့မြို့မှာ (၁)ဦးတို့ သေဆုံးခဲ့ကာ ထိခိုက်သူများအနေဖြင့် မိုးကုတ်(၂၅)ဦး၊သီပေါ(၄)ဦး၊မိုင်းလုံ(၆)ဦး၊ ကျောက်မဲ(၁၃)ဦးနဲ့ မိုင်းငေါ့မှာ(၇)ဦး ဒဏ်ရာရရှိခဲ့ပါတယ်။
ဒီလိုသေဆုံးမှုတွေထဲ သံဃာတော် (၃)ပါး၊သီလရှင်(၁)ပါး၊ ကလေးငယ်( ၅) ဦး၊အမျိုးသမီး( ၁၈ )ဦး ၊အမျိုးသား ( ၁၉ ) ဦး ပါဝင်ခဲ့ပြီး ဒဏ်ရာရရှိမှုမှာတော့ သံဃာတော်(၆)ပါး၊သာမဏေ(၆)ပါး ၊ အမျိုးသမီး(၁၂)ဦး၊ အမျိုးသား(၃၁)ဦးတို့ ပါဝင်ပါတယ်။
အဆောက်အဦးပျက်စီးမှုက (၁၃၃)ခုပျက်စီးခဲ့ပြီး နေအိမ်(၁၀၈)လုံး၊ဘုန်းကြီးကျောင်း(၁၂)ကျောင်း၊ စာသင်ကျောင်းတစ်ကျောင်း၊အဆောက်အဦး(၂)ခု၊ ကျောင်းဆောင်(၉)ဆောင်နဲ့ ဓမ္မာရုံ(၁)ရုံတို့ ပါဝင်ခဲ့တာပါ။
TNLA ထိန်းချုပ်နယ်မြေဖြစ်တဲ့ ဒီဒေသတွေကို ပြန်လည်ရရှိနိုင်ရေးအတွက် စစ်ကော်မရှင်က ပြင်းထန်ထိုးစစ်ကိုဖော်ဆောင်နေတာဖြစ်ပြီး ဝေဟင်ကင်းထောက်လေယာဉ်များကို နေ့စဉ်လိုပျံသန်းမှုတွေရှိနေကြောင်း ဒေသခံများထံမှ သိရပါတယ်။
စစ်ကော်မရှင်နဲ့ တအာင်း(ပလောင်)တပ်တို့ဟာ တရုတ်နိုင်ငံ ယူနန််ပြည်နယ်မှာ တွေ့ဆုံဆွေးနွေးခဲ့ကြပေမယ့် သဘောတူညီမှုမရှိခဲ့ပေမယ့် သဘောတူညီမှု မရရှိခဲ့ကြပါဘူး။