နိုဝင်ဘာ ၃ ၊ အင်းတော်ကြီး
အင်းတော်ကြီးဒေသ ညောင်ပင်ကျေးရွာရှိ ဆန်းလိုက်စက်သုံးဆီဆိုင်သည် နိုဝင်ဘာ ၃ ရက်နေ့ နေ့လည် ၁၂ နာရီခွဲကျော်အချိန်ကတည်းက မီးလောင်ကျွမ်းခဲ့တယ်လို့ သိရပါတယ်။
“ သူတို့ဆီကယ့်ဖို့အတွက်ကို ပေပါပုံးတွေလိမ့်ရင်းက လောင်တာလို့ပြောတာကော၊ မီးထွက်လို့လေ၊ နေကလည်းတအားပူတာလေ၊ သူတို့ ဆိုင်ကကောင်မလေးတွေကတော့ပြောတာ ဆီကယ့်နေတာတဲ့ ပေပါဗုံးတွေလိမ့်နေတာတဲ့ အဲ့ကနေပူတာကနေ လိမ့်ပြီး မီးထွက်တာတဲ့၊ ဓာတ်ဆီပေပါကြောင့်တဲ့ ၊ဒီဇယ်ပေပါဆိုရင်မဖြစ်ဘူးပေါ့” လို့ ညောင်ပင်ရွာသူတစ်ဦးက ပြောပြပါတယ်။
နေ့လည် ၂ နာရီခွဲကျော်အချိန်ထိ မီးလောင်ကျွမ်းနေပြီး ဓာတ်ဆီပေပါများပေါက်ကွဲမှုတွေကြောင့် မီးငြိမ်းသတ်ဖို့ခက်ခဲတယ်လို့ ဒေသခံတွဆီကနေသိရပါတယ်။
“ ဟိုပြေးဒီပြေးနဲ့ ၊ ကလေးတွေကငို ၊ကျောင်းက ဆရာမတွေကလည်း ပြန်မလွတ်ရဲ၊ အမှတ် ၁ ကျောင်းနဲ့တအားနီးထားတာ၊ ၁၂ နာရီ ၄၅ လောက် ၊ တစ်ဆိုင်လုံးနီးပါးပဲလောင်တာ” လို့ မျက်မြင်ဒေသခံတစ်ဦးက ပြောပြပါတယ်။
မီးလောင်ကျွမ်းတဲ့ ဆီဆိုင်အနီးမှာ အခြေခံမူလွန်ကျောင်းက စာသင်နေတဲ့ကလေးတွေကိုခေါ်ထုတ်ထားကာ ကျောင်းကိုပိတ်ထားလိုက်တယ်လို့လည်းသိရပါတယ်။
သိရှိရတဲ့သတင်းတွေအရ ဆိီဆိုင်ပိုင်ရှင်နဲ့ ဝန်ထမ်းများ အသက်အန္တရာယ်ထိခိုက်မှုမရှိပေမယ့် ဝန်ထမ်းတစ်ဦးက မီးလောင်ကျွမ်းပေါက်ကွဲမှုကြောင့် လက်တစ်ဖက်ထိခိုက်ဒဏ်ရာရရှိခဲ့တယ်လို့ဆိုပါတယ်။
အင်းတော်ကြီးဒေသမှာ အခုလိုစက်သုံးဆီဆိုင်မီးလောင်ကျွမ်းမှုက ပထမဆုံးအကြိမ်လည်းဖြစ်ပါတယ်။