ဒီဇင်ဘာ ၂၀ ၊ ဗန်းမောက်
စစ်ကိုင်းတိုင်းဒေသကြီး ဗန်းမောက်မြို့နယ်အတွင်းရှိ Non-CDM ဝန်ထမ်းတွေအနေနဲ့ လာမယ့် ၂၀၂၅ ခုနှစ် ဇန်နဝါရီလ ၁ ရက်နေ့စပြီး CDM ပြုလုပ်ဖို့ NUG ရဲ့ ဗန်းမောက်မြို့နယ် (ပအဖ) က ဒီဇင်ဘာလ ၁၆ ရက်နေ့ရက်စွဲနဲ့ ကြေညာခဲ့တယ်လို့ ဒေသခံတွေဆီက သိရပါတယ်။
လာမယ့် ၂၀၂၅ ခုနှစ် နှစ်စမှာ CDM မပြုလုပ်တဲ့ ဝန်ထမ်းတွေကို ထိထိရောက်ရောက်အရေးယူအပြစ်ပေးသွားမယ်လို့ ကြေညာထားပါတယ်။
“ သူတို့ (PDF) မနေ့က လာဖြန့်တာဟုတ်တယ်ခင်ဗျာ့။ မြို့ပေါ်ဝန်ထမ်းတွေလည်းရှိပါသေးတယ်။ ပြေးတဲ့သူတွေလည်းပြေးတာပါပဲ“ လို့ ဗန်းမောက်ဒေသခံတစ်ဦးက ပြောပါတယ်။
CDM မပြုလုပ်တဲ့သူတွေကို တည်ဆဲဥပဒေအရ အပြစ်ပေးအရေးယူသွားမှာဖြစ်ပြီး ဘယ်ပုဒ်မနဲ့ အရေးယူမယ်ဆိုတာကို ဖော်ပြထားတာမရှိပါဘူး။
CDM ပြုလုပ်လာရင်လည်း ဌာနဆိုင်ရာ စာရွက်စာတမ်းတွေ ၊ ပြည်သူ့ပိုင်ပစ္စည်းတွေ နဲ့တကွ NUG ထံကို ဝင်ရောက်လာဖို့ ကြေညာထားပါတယ်။
အစိုးရဌာနဆိုင်ရာ ၊ ဒေသဆိုင်ရာ ပိုင်ဆိုင်ထားတဲ့ ဒါ့မှမဟုတ် လွှဲအပ်ထားတဲ့ပစ္စည်း၊ သိုလှောင်ထားတဲ့ ပစ္စည်း ၊ အသုံးပြုဖို့ လွှဲအပ်ထားတဲ့ ၊ တခြားပစ္စည်းတွေကိုလည်း ပအဖထံကို စနစ်တကျအပ်နှံရမယ်လို့ ဆိုပါတယ်။
ဗန်းမောက်မြို့နယ်အတွင်းမှာ အထွေထွေအုပ်ချုပ်ရေးဌာန ၊ ကျန်းမာရေး နှင့် ပညာရေး ဝန်ထမ်းအနည်းငယ်ခန့်သာ ကျန်ရှိနေတာဖြစ်တယ်လို့ ဒေသခံတွေဆီကနေ သိရပါတယ်။
ဗန်းမောက်မြို့နယ်အတွင်းမှာ စစ်ကောင်စီရဲ့ အုပ်ချုပ်ရေး ယန္တရားတွေဟာ မြို့ပေါ်မှသာရှိနေပြီး မြို့နယ်အတွင်းမှာ တိုင်းရင်းသားလက်နက်ကိုင်များနှင့် KIA+PDF တပ်တွေက ထိန်းချုပ်ထားစိုးမိုးထားတာလည်းဖြစ်ပါတယ်။