__________
ရှမ်းပြည်တော်လှန်ရေးထဲမှာပါဝင်ခဲ့တဲ့ ရှမ်းနီတိုင်းရင်းသားအများအပြားရှိခဲ့ဖူးပါတယ်။ အဲ့ဒီထဲက စဝ်အောင်မောင်းဟာ တစ်ဦးအပါအဝင်ဖြစ်ပါတယ်။
၁၉၆၄ ခုနှစ် မြန်မာပြည်မြောက်ပိုင်းက မိုးကောင်းမြို့မှာ စဝ်အောင်မောင်း မွေးဖွားခဲ့ပြီး ရှမ်းနီလူမျိုးအသိုင်းအဝိုင်းတွေကြားမှာပဲ ကြီးပြင်းလာခဲ့သူပါ။ စဝ်အောင်မောင်း ဆိုပြီး နာမည်မခေါ်ခင် သူ့ငယ်အမည်က “ စိုင်းအောင်ကြီး” ပါ။ ပညာရေးအရာမှာလည်း ထူးချွန်ပြီး မန္တလေးတက္ကသိုလ်မှာ Psychology စိတ်ပညာဘာသာရပ်အထူးပြု သင်ယူခဲ့ပါတယ်။ ဒီပညာရပ်ကို နောင်တစ်ချိန်မှာ ရှမ်းနီလူငယ်တွေ၊ ဒေသခံတွေကြားမှာ ယုံကြည်မှုတည်ဆောက်ရေးလုပ်ငန်းတွေမှာပြန်လည်အသုံးချသွားခဲ့ပါတယ်။ ၈၈၈၈ အရေးတော်ပုံထဲမှာ ကျောင်းသားခေါင်းဆောင်ပိုင်းက ပါဝင်ပြီးတော့ ကျောင်းသားတပ် ABSDF (မြောက်ပိုင်း) ဗဟိုကော်မတီဝင် အနေနဲ့ ပါဝင်ခဲ့သူတစ်ဦးဖြစ်ပါတယ်။ ၁၉၈၈ စက်တင်ဘာလမှာ တောခိုပြီးတော့ ABSDF(NB) ဝင်ရောက်ပြီး လက်နက်စွဲကိုင်တော်လှန်ရေးလမ်းစဉ်ထဲကို ခုန်ဝင်လာခဲ့ပါတယ်။ ၁၀ နှစ်တာ ကျောင်းသားတပ်မှာ ပါဝင်ခဲ့ပြီးနောက် အခြေအနေအမျိုးမျိုးကြောင့် ရှမ်းပြည်ဘက်ကို ရွေ့ပြောင်းလာခဲ့ပြီး ရှမ်းတပ်အသီးသီးမှာ ပါဝင်လာခဲ့ပါတယ်။ KIA က ၁၉၉၆ ခုနှစ် အပစ်ခတ်ရပ်စဲရေးနဲ့ ငြိမ်းချမ်းရေးရယူလိုက်တာကြောင့် ABSDF(NB)ထဲက ရှမ်းနီကျာင်းသားတွေဟာ နေရာရွေ့ပြောင်းကြရပါတယ်။ ဒီထဲမှာ စဝ်အောင်မောင်းက ရှမ်းပြည်ဘက်ကို ရှမ်းပြည်အမျိုးသားတပ်မတော် SSNA ရဲ့အကူအညီကိုရယူပြီး ရှမ်းပြည်တောင်ပိုင်းဘက်ကိုရောက်ရှိခဲ့ပါတယ်။ ၁၉၉၈ ခုနှစ် ရောက်ရှိပူးပေါင်းမှုကို “ သျှမ်းအမျိုးသားတော်လှန်ရေးတပ်တွေအတွက် စည်းလုံးညီညွတ်ရေးစံပြ” အဖြစ် ရှမ်းတော်လှန်ရေးမှတ်တမ်းရေးသားသူတွေက ရေးသားဖော်ပြကြပါတယ်။
ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် RCSS/SSA နဲ့ပူးပေါင်းပြီးတဲ့နောက် တိုက်ပွဲအလီလီမှာ ပုံစံအမျိုးမျိုးနဲ့ ပါဝင်တိုက်ပွဲဝင်ခဲ့သူပါ။ ၁၉၉၀ ခုနှစ်က “ဆိုင်းနမ့်”တိုက်ပွဲ ၊ ၁၉၉၁ ခုနှစ် “ကြယ်ပျံ”စစ်ဆင်ရေးတိုက်ပွဲတွေမှာ ပါဝင်တိုက်ခိုက်ခဲ့သူပါ။ ၁၉၉၈ ခုနှစ်စကပြီး ၂၀၀၈ ခုနှစ်အထိ RCSS/SSA မှာ ဗိုလ်မှူးရာထူးနဲ့ တပ်မဟာ ၂၄၁ ဒုတပ်မဟာမှူးတာဝန်ကိုထမ်းဆောင်ခဲ့ပါတယ်။ ၂၀၀၃ ခုနှစ်မှာ တိုင်းရင်းသားညီနောင်စစ်ရေးမဟာမိတ်တပ်များအရာရှိသင်တန်းကျောင်း ဆရာ၊ ၂၀၀၅ -၂၀၁၁ ခုနှစ်အထိ Shan State Development Foundation (SSDF/RCSS) သင်တန်းကျောင်းရဲ့ နည်းပြ၊ မြေပုံဘာသာရပ်မှာ နည်းပြတွေအပြင် စစ်ရေးမဟာဗျူဟာလေ့လာရေးအပိုင်းတွေနဲ့ အထူးတပ်သားတွေရဲ့ သင်တန်းနည်းပြအဖြစ်ပါ တာဝန်ယူခဲ့ပါတယ်။ အဲ့ဒီနောက်ပိုင်းမှာတော့ ၂၀၁၁ ခုနှစ်ကစလို့ RCSS/SSA ရဲ့ ငြိမ်းချမ်းရေးဖော်ဆောင်ရေးကော်မတီဝင်တစ်ဦးအဖြစ်ပါဝင်ခဲ့ပြီး ငြိမ်းချမ်းရေးဆွေးနွေးပွဲတွေမှာ ပါဝင်ခဲ့ပါတယ်။ ငြိမ်းချမ်းရေးဆွေးနွေးပွဲမှာလည်း ၂၀၁၁ ခုနှစ် နိုဝင်ဘာကစလို့ ၂၀၁၃ ခုနှစ်အထိ အပစ်ခတ်ရပ်စဲရေးဆွေးနွေးပွဲတိုင်းမှာပါဝင်ခဲ့ပါတယ်။ RCSS/SSAရဲ့ ဆက်ဆံရေးရုံးမှာလည်း တာဝန်ခံအဖြစ်တာဝန်ယူခဲ့ပါတယ်။
သူနဲ့နီးစပ်သူတွေရဲ့ အဆိုအရ၊ စဝ်အောင်မောင်းဟာ ရှမ်းနီလူမျိုးအဖြစ် ဂုဏ်ယူစိတ်ရှိပြီး၊ ဇွဲ၊ သည်းခံစိတ်၊ ပွင့်လင်းစွာ ဆွေးနွေးတတ်တဲ့ သဘောထားနဲ့ ရှမ်းအင်အားစုအားလုံးရဲ့ ယုံကြည်မှုကို ရရှိခဲ့သူပါ။ “လူမှန်နေရာမှန်” ဆိုတဲ့ စကားအတိုင်း၊ ရှမ်းနီအမျိုးသားရေးနှင့် ရှမ်းစည်းလုံးရေးနှစ်ခုစလုံးမှာ တစ်ချိန်တည်း အကျိုးရှိစွာ ပါဝင်နိုင်ခဲ့သူလို့ ဆိုကြပါတယ်။
ရှမ်းနီဒေသနဲ့ဝေးသွားခဲ့တဲ့ စဝ်အောင်မောင်းဟာ ရှမ်းနီဒေသတွေကို ၂၀၁၄ -၂၀၁၅ ခုနှစ်မှာမှ ပြန်လည်ရောက်ရှိလာခဲ့ပါတယ်။ သို့ပေမယ့်လည်း အချိန်ကောင်းကို ကျန်းမာရေးက အနှောက်အယှက်ပြုနေပြီလည်းဖြစ်ပါတယ်။ နေရပ်မိုးကောင်း အပါအဝင် ရှမ်းနီဒေသအနှံ့အပြားတွေကို ခရီးဆန့်ပြီး မြေပြင်ရှမ်းနီတိုင်းရင်းသားတွေရဲ့အခြေအနေကို လေ့လာခဲ့ပါတယ်။ အဲ့ဒီနောက်မှာတော့ အသည်းရောဂါကြောင့် ထိုင်းနိုင်ငံမှာ ဩဂုတ်လ ၁၉ ရက်နေ့မှာ ဆေးကုသနေရင်း ကွယ်လွန်အနိစ္စရောက်ရှိခဲ့ပါတယ်။ “ အမျိုးသားရေးအတွက် လိုအပ်တဲ့ကွက်လပ်တွေမှာ ငါတို့အမြဲရှိကြမယ်” ဆိုတဲ့ စကားကိုထားရင်း သူဟာ ရှမ်းနီဒေသနဲ့ ရှမ်းပြည်အရေးတွေကို နှုတ်ဆက်သွားတာ ၁၁ နှစ်မြောက်ခဲ့ပြီလည်းဖြစ်ပါတယ်။ ရှမ်းနီတိုင်းရင်းသားတွေအတွက် ကြီးမားတဲ့ဆုံးရှုံးမှုတွေထဲက တစ်ခုလို့လည်း ရှမ်းနီတော်လှန်ရေးတပ်သားတွေက အမြဲပြောဆိုနေကြတာလည်းဖြစ်ပါတယ်။
Ref:RCSS/SSA Data