ဧပြီ ၃၀ ၊ သီပေါ
ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) နှင့် ကိုးကန့်တပ်မတော် MNDAA တို့ကြား ပြီးခဲ့တဲ့ နှစ်ရက်အတွင်း စစ်ရေးထိတွေ့မှု ရှစ်ကြိမ်အထိရှိထားတယ်လို့ SSPP/SSA က သတင်းထုတ်ပြန်လာပါတယ်။
နှစ်ဖက် ပစ်ခတ်တိုက်ခိုက်မှုများသည် သီပေါမြို့နယ် တင်းဟိုင်းကျေးရွာ၊ ဟူးမီကျေးရွာ ၊ လားရှိူးမြို့နယ် နမ္မကျေးရွာ ၊ မိုင်းကျက်၊ မိုင်းယော် ၊ ဟိုဟွေး စတဲ့ကျေးရွာတွေမှာရှိတဲ့ SSPP/SSA ရဲ့ တပ်စခန်းတွေကို MNDAA က ဝင်ရောက်ခဲ့ပြီး ထိတွေ့တိုက်ခိုက်မှုဖြစ်ခဲ့တာလို့ ဆိုပါတယ်။
ဒါ့အပြင် SSA ရဲ့ဌာနချုပ်ဟောင်း စိန်ကျော့တပ်စခန်းကိုလည်း MNDAA တွေကို မနေ့က ဧပြီလ ၂၉ ရက်နေ့မှာ ဝင်ရောက်ထိန်းချုပ်မှုတွေရှိခဲ့တယ်လို့ ဆိုပါတယ်။
“ မနေ့က ပြန်လာတော့ ကိုးကန့်တပ်တွေက ကုန်းနု၊ ကုန်းပေါင်း အဲ့ကနေထွက်ခဲ့ကြတာ တစ်လမ်းလုံးပဲ၊ သူတို့ရဲ့ ပြောင်းအကြီးကြီး(RPG)တွေထမ်းပြီး၊ တစ်လမ်းလုံးကို စိမ်းသွားတာပဲ၊ ညနေကို စိန်ကျော့နားတိုက်ပွဲဖြစ်သေးတယ်” လို့ မနေ့က မိုင်းရယ်မှ သီပေါသို့ ပြန်လာသူ ဒေသခံတစ်ဦးက ဆိုပါတယ်။
ထိုလမ်းပိုင်းများသည် SSPP/SSA က နှစ်ပေါင်းများစွာကြာထိန်းချုပ်ထားသည့် ဒေသတစ်ခုဖြစ်ပြီး ကျောက်မီးသွေး၊ စိုက်ပျိုးရေးနှင့် ကုန်သွယ်ရေးပွဲရုံများစွာရှိသည့် ဒေသများလည်းဖြစ်ပါတယ်။
လက်ရှိအချိန်မှာ MNDAA က ထိန်းချုပ်ထားကြောင်း ဆိုသော်လည်း SSPP/SSA က ပြန်လည်ထိန်းချုပ်ထားနိုင်ပြီဖြစ်ကြောင်း ထုတ်ပြန်ကြေညာထားပါတယ်။
SSPP/SSA က ဗဟိုအဆင့်ခြင်း တွေ့ဆုံညှိနှိုင်းသွားမည်လို့ ဒီနေ့ ဧပြီလ ၃၀ ရက်နေ့ ညနေပိုင်းမှာပဲ ထုတ်ပြန်ထားပါတယ်။