ဒီဇင်ဘာ ၂၀ ၊ ကသာ
စစ်ကိုင်းတိုင်းဒေသကြီး ကသာမြို့အတွင်း ဝါဒဖြန့်စာများ လိုက်လံဖြန့်ဝေနေတဲ့ စာရွက်တွေဟာ SNA မှလုပ်ဆောင်ခြင်း မရှိခဲ့ဘူးလို့ စုံစမ်းသိရှိပါတယ်။
ဒီဇင်ဘာလ ၁၉ ရက်နေ့မှာ စတင်ပျံ့နှံ့တဲ့ စာရွက်ကို ကိုးကားပြီး သတင်းမီဒီယာတချို့က ထပ်ဆင့်ဖော်ပြခဲ့ကြသလို စစ်ကောင်စီ ထောက်ခံသူများကလည်း ထပ်ဆင့်မျှဝေမှုများပြုလုပ်ခဲ့ကြပါတယ်။
ကသာမြို့နယ်အတွင်းမှာ SNA အနေဖြင့် လက်ရှိအချိန်ထိ ဝင်ရောက်ခြင်း မရှိသေးဘဲ မြို့နယ်အတွင်းမှာ KIA+PDF ပူးပေါင်းတပ်ဖွဲ့များ နှင့် စစ်ကောင်စီတပ်ဖွဲ့များသာ ရှိနေတာလည်းဖြစ်ကြောင်း ဒေသခံများထံမှ စုံစမ်းသိရပါတယ်။
လက်ရှိ ထွက်ပေါ်လာတဲ့ စာရွက်တွေဟာ SNA နှင့် လူထုကို ရန်တိုက်ပေးတဲ့ လုပ်ရပ်ဖြစ်တယ်လို့ SNA ရဲ့ ပြောရေးဆိုခွင့်ရှိသူက တုန့်ပြန်ပါတယ်။
“ လူထုတွေကို SNA က ဒီမိုကရေစီ မလိုလားဘူးပေါ့ နောက်တစ်ခါ ရှမ်းနီနယ်တွေကို ထိုးစစ်ဆင်ဖို့အတွက် တမင်သက်သက် ရှမ်းနီတွေဟာ စကစ လူဖြစ်တယ် ဒါကြောင့်တိုက်ရပါတယ်ပေါ့ ရှမ်းနီဆိုတာ တိုင်းရင်းသား လူမျိုးတစ်မျိုးဖြစ်တော့ ရိုးရိုးထိုးစစ်ဆင်ရင် KIA တွေက ရှမ်းနီဒေသ တွေကို နယ်ချဲ့ပါတယ်ဆိုတဲ့ သမိုင်း ကျန်ခဲ့မှာလေ။ အခုလိုစာဖြန့်တော့ ရှမ်းနီက အရင်စကစနဲ့ပေါင်းပြီ ရန်စတယ်ပေါ့ အဲ့ပုံစံမျိုးဖြစ်အောင် တမင်ဖန်တီးသာလို့ပဲမြင်တယ် ” လို့ ဝါဒဖြန့်စာနဲ့ ပတ်သက်ပြီး SNA က ပြောရေးဆိုခွင့်ရှိသူက ပြောပါတယ်။
ပြီးခဲ့တဲ့ နိုဝင်ဘာလ ၂၇ ရက်နေ့က ရိုက်ကူးထားပြီး တစ်လနီးပါးအကြာမှာ ပြန့်နှံ့လာတဲ့ ဝါဒဖြန့်စာထဲမှာ SNA က NUG ကို အယုံအကြည်မရှိကြောင်းနဲ့ KIA+PDF တပ်ဖွဲ့ကို မိတ်ဆွေဖွဲ့ရေးစဉ်းစားမှာ မဟုတ်တဲ့အကြောင်း ရှမ်းနီတိုင်းရင်းသားရုပ်ပုံ၊ ပန်းချီ နှင့် SNA တပ်သားပုံတွေနဲ့ ထည့်သွင်းဖော်ပြထားတာဖြစ်ပါတယ်။
ကသာမြို့ဟာ လက်ရှိ KIA+PDF ပူးပေါင်းတပ်ဖွဲ့တွေ မြို့သိမ်းတိုက်ပွဲဆင်နွဲကာ တိုက်ပွဲရပ်တန့်နေတဲ့ အင်းတော်မြို့ နှင့် ထီးချိုင့် မြို့တို့နှင့် မိုင်အနည်းငယ်အကွာမှာ ရှိနေတဲ့ မြို့တစ်ခုလည်းဖြစ်ပါတယ်။