အောက်တိုဘာ ၁၄ ၊ မိုးကုတ်
မိုးကုတ်-မန္တလေး လမ်းပိုင်းရှိ ဖော့တောလမ်းဆုံအနီးမှာ မန္တလေး PDF နဲ့ စစ်တပ်တို့အကြား တိုက်ပွဲပြင်းထန်နေပြီး လမ်းပိုင်းပိတ်ထားရတာကြောင့် ကုန်စည် စီးဆင်းမှုတွေမရှိတော့ဘူးလို့ ဒေသခံတွေကပြောဆိုကြပါတယ်။
“ စက်သုံးဆီကတော့ပြတ်သွားပြီ၊ မရောင်းပေးကြတော့ဘူး၊လုံးဝမရှိတာတော့မဟုတ်ဘူး၊ စီးပွားရေးသမားတွေက လမ်းပိတ်တယ်ဆိုတော့ သူတို့လည်းလိုက်ပိတ်လိုက်တာ၊ တိုက်ပွဲကလည်း နီးလာနေပြီ မကြာတော့ဘူးထင်တယ်မိုးကုတ်ကိုကတော့” လို့ မိုးကုတ်မြို့ပေါ်က ဒေသခံတစ်ဦးက ပြောပါတယ်။
မိုးကုတ်မြို့ကို ဝင်ရောက်မယ့်လမ်းပိုင်းတွေဖြစ်တဲ့ မန္တလေး-မိုးကုတ်လမ်းပိုင်း ၊ ကျောက်မဲ-မိုင်းလုံ-မိုးကုတ်လမ်းပိုင်း ၊ ပြင်ဦးလွင်-မိုးကုတ်လမ်းပိုင်းတွေမှာ စစ်တပ်နဲ့ တအာင်း(ပလောင်)တပ် TNLA ၊ PDF တို့ ရဲ့တိုက်ပွဲကြောင့် လမ်းပိုင်းတွေပိတ်ထားတာဖြစ်ပါတယ်။
လက်ရှိမှာ မိုးကုတ်မြို့ထဲကို ကုန်စည်များဝင်ရောက်နိုင်မှုအနည်းငယ်သာရှိတော့ပြီး ပြတ်လပ်မှုတွေဖြစ်ပေါ်လာနေတယ်လို့ဆိုကြပါတယ်။
PDF နဲ့ စစ်တပ်တို့ကြားဖြစ်ပွားနေတဲ့ တိုက်ပွဲတွေဟာ မိုးကုတ်မြို့နဲ့ မိုင် ၄၀ ဝန်းကျင်မှာသာရှိနေသေးပေမယ့် လမ်းပန်းဆက်သွယ်ရေး အားလုံးနီးပါးက ပြတ်တောက်နေပြီလည်းဖြစ်ပါတယ်။
ဒေသခံ သက်ကြီးရွယ်အိုတွေနဲ့ အမျိုးသမီးတချို့တွေက လေကြောင်းကနေ ဗုံးဆက်တိုက်ကျဲချမှုတွေပြုလုပ်တဲ့ စက်တင်ဘာလကစလို့ စစ်ဘေးတိမ်းရှောင်ထားကြတာလည်းဖြစ်ပါတယ်။
“ အခုကတော့ ထွက်လမ်းကတော့ တစ်ပေါက်ပဲကျန်တော့တယ်။ ဆီကလည်းရှားလာတော့ ကြိုတင်စုထားရတာ။ ဖော့တောပြီးရင်ဘာမှမရှိတော့ဘူးဆိုတော့ တဖြည်းဖြည်းနီးလာနေတာ ။ စောင့်ကြည့်နေရတာ အခြေအနေဘယ်လိုဖြစ်လာမလဲဆိုတာပဲ” လို့ စစ်ဘေးတိမ်းရှောင်ဖို့ပြင်ဆင်နေသူ ဒေသခံတစ်ဦးကပြောပါတယ်။
စစ်တပ်က TNLA သိမ်းပိုက်ထားတဲ့ မြို့နယ်တွေကို ပြန်လည်သိမ်းပိုက်ဖို့ တန်ပြန်ထိုးစစ်ဆင်နေပြီး လက်ရှိမှာ သီပေါမြို့အနီးသို့ စစ်တပ်ရဲ့ စစ်ကြောင်းတွေရောက်ရှိနေတာလည်းဖြစ်ပါတယ်။