ဇူလိုင်၉၊ဗန်းမောက်
စစ်ကိုင်းတိုင်းဒေသကြီး အထက်ပိုင်း ဗန်းမောက်မြို့နယ်က ထိန်ဆုံ ၊အလယ်ကန် စတဲ့ ကျေးရွာအနီးမှာ PDF တွေနဲ့ စစ်ကောင်စီတပ်တို့ ထိတွေ့တိုက်ပွဲဖြစ်ပွားနေတယ်လို့ ဒေသခံတွေက ပြောဆိုကြပါတယ်။
ဇူလိုင်လ ၈ ရက် နေ့လည်ပိုင်းကစ ထိန်ဆုံကျေးရွာနဲ့ အလယ်ကန်ကျေးရွာကြားမှာ ပစ်ခတ်သံတွေကြားနေရတယ်လို့ အဲ့ဒီအနီးပတ်ဝန်းကျင်ကျေးရွာက ဒေသခံတွေက ဆက်သွယ်ပြောဆိုပါတယ်။
“ ထိန်ဆုံနဲ့ အလယ်ကန် အဲ့ကြားနားမှာ လက်နက်ကြီးသံတွေ အုံ ၊ အုံ နဲ့ပဲ ၊ အခုညနေပိုင်းတော့ အသံမကြားရပြန်တော့ဘူး” လို့ ဒေသခံတစ်ဦးကပြောပြပါတယ်။
ဇူလိုင်လ ၉ ရက်နေ့ နေ့လည်အထိလည်း ပစ်ခတ်သံတွေကြားနေရတယ်လို့ ဒေသခံတွေက ဆိုပါတယ်။
ထိန်ဆုံ ၊ အလယ်ကန် ကျေးရွာသားတွေကတော့ ဗန်းမောက်မြို့နဲ့နီးတဲ့ ကျေးရွာတွေဖြစ်တဲ့ ဒယူး ၊ ရွှေကျောင်း စတဲ့ကျေးရွာနဲ့မြို့ပေါ်က ဆွေမျိုးတွေဆီ ထွက်ပြေးတိမ်းရှောင်လာခဲ့တယ်လို့လည်း သိရပါတယ်။
ထွက်ပြေးတိမ်းရှောင်လာသူတွေရဲ့ စာရင်းအတိအကျကိုတော့မသိရှိရေသေးပါဘူး။
ဗန်းမောက်မြို့နယ်မှ ဇွန်လကုန်ပိုင်းကစလို့ PDF တွေနဲ့ စစ်ကောင်စီတပ်တို့ ထိတွေ့တိုက်ပွဲတွေက မကြာခဏဖြစ်ပွားနေတာလည်းဖြစ်ပါတယ်။