အင်းတော်ကြီးဒေသ မိုင်းနောင်ကျေးရွာနှင့် မမုန်ကိုင်ကျေးရွာကို ဖြတ်သန်းစီးဆင်းနေသည့် ခေါင်းတုံးချောင်းသည် ရွှေမျှောများကြောင့် တိမ်ကောခဲ့ရပြီးနောက် ပြန်လည်တူးဖော်မှုများကို စတင်ဆောင်ရွက်နေကြောင်းသိရသည်။
“ ဘာကြောင့်ကောလဲဆိုတော့ ရွှေလုပ်မှုနဲ့ပတ်သက်ပြီးတော့ပေါ့လေ အဲ့တာကြောင့် တိမ်ကောခြင်းဖြစ်တယ်။ “ဟု မမုန်ကိုင်အုပ်စု အုပ်ချုပ်ရေးမှူး ဦးစိုးမြင့်က ရှမ်းနီအသံကိုပြောသည်။
အင်းတော်ကြီးဒေသ မမုန်ကိုင်ကျေးရွာအုပ်စုတွင် လွန်ခဲ့သည့် နှစ်ပေါင်းများစွာကတည်းက မိရိုးဖလာရွှေတူးဖော်မှုများလုပ်ကိုင်ခဲ့ကြသည်။
သက္ကရာဇ် ၂ဝဝဝ ခုနှစ်နောက်ပိုင်းမှ စတင်ပြီး ရွှေတူးဖော်မှုများကို စက်ယန္တရားကြီးများဖြင့် တူးဖော်ခဲ့မှုကြောင့် ခေါင်းတုံးချောင်းတိမ်ကောခဲ့ခြင်းဖြစ်ကြောင်း ဒေသခံများထံမှသိရသည်။
‘ရွှေလုပ်ငန်း တွေလည်းပြောင်းကြ၊နားကြ။ရပ်ကြဖို့လိုပါပြီ။ဘယ်အချိန်ရောက်မှငါတို့ ထိန်းသိမ်းရေး
သမားတွေရဲ့ စကားကိုလက်ခံကြမည်နည်း။အသုံးပြုလိုက်တာက နည်းနည်းလေးအသုံးပြုခြင်းခံလိုက်ရတာက
အများကြီးပါဗျာ၊နားလည်၊လက်ခံကြပါတော့ဗျာ။” ဟု မမုန်ကိုင်ဒေသခံ ကိုနေမျိုးထွန်းက ၎င်း၏လူမှုကွန်ရက်စာမျက်နှာတွင် ရေးသားထားသည်။
တိမ်ကောနေသည့် ချောင်းကိုပြန်လည်တူးဖော်ရန်အတွက် ကချင်ပြည်နယ် သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၏ ညွှန်ကြားချက်ဖြင့် တူးဖော်ခြင်းဖြစ်သည်ဟု ၎င်းအုပ်ချုပ်ရေးမှူးက ဆိုသည်။
“ ကျွန်တော်တို့ပြည်နယ် ညွှန်မှူးဦးစောယု လာစစ်ဆေးတဲ့အခါမှာ အိမ်ထဲမှာ ဘတ်ဟိုးသိမ်းထားတဲ့ဟာ မိတယ်။ မိတဲ့ (၁၂) စီးနဲ့ ပြည်နယ်အစိုးရကနေပြီး ညွှန်ကြားချက်အရ သူတို့တွေကို ပြန်ဖော်ထုတ်ခိုင်းတာ” ဟု မမုန်ကိုင်အုပ်စု အုပ်ချုပ်ရေးမှူး ဦးစိုးမြင့်က ရှမ်းနီအသံကိုပြောသည်။
လက်ရှိတူးဖော်နေမှုသည် မိုင်းနောင် ကျောက်ဆင်ရုပ်မှ အင်းတော်ကြီးကန် ထိ အရှည် ၄ မိုင် နှင့် အကျယ် ပေ ၈ဝ နှင့် အနက် (၇) ပေ ကို မေလ (၂) ရက်နေ့မှ စတင်တူးဖော်လျက်ရှိနေသည်။
ထိုချောင်းကို ၂၀၁၇ ခုနှစ်က တောင်သူလယ်သမားများ၏ တောင်းဆိုမှုအရ ရွှေတူးဖော်နေသူများက တစ်ကြိမ်တူးဖော်ပေးခဲ့ကြောင်းသိရသည်။