မေ ၆ ၊ ခန္တီး
ရှမ်းနီအမျိုးသားတပ်မတော် SNA နှင့် စစ်ကောင်စီတပ်တို့ မေလ ၅ ရက်နေ့ နံနက် ၈ နာရီအချိန်က ခန္တီးမြို့နှင့် မိုင် ၃ဝ အကွာရှိ ကောင်းဟိန်ကျေးရွာအနီး နမ့်မိုင်းတောင်းချောင်းတွင် တိုက်ပွဲဖြစ်ပွား ခဲ့ကြောင်း ဒေသခံများထံမှ သိရသည်။
“ မနေ့က မနက် ၈ နာရီ ၁၅ လောက်မှာ ခန္တီးနဲ့ မိုင် ၃၀ အကွာမှာရှိတဲ့ ကောင်းဟိန်ရွာနားမှာဖြစ်တာ” ဟု ဒေသခံတစ်ဦးက ပြောဆိုသည်။
ထိုတိုက်ပွဲဖြစ်ပွားမှုကို SNA ကလည်း အတည်ပြုပြောကြားထားပြီး ခန္တီးမြို့နယ် အခြေစိုက် ခလရ ၅၂ နှင့် ဟုမ္မလင်းအခြေစိုက်တပ် ၂၂၂ ပူးပေါင်းတပ်နှင့် စစ်ကောင်စီမှ ၅ ဦးသေဆုံးပြီး SNA မှ တစ်ဦး ဒဏ်ရာရကြောင်း မြောက်ပိုင်းအသံ သတင်းအေဂျင်စီတွင် ရေးသားဖော်ပြထားသည်။
ဧပြီလ ၁၄ ရက်နေ့ကလည်း ဟုမ္မလင်းမြို့နယ် စေတီဆိပ်ကျေးရွာအနီးတွင် SNA နှင့် စစ်ကောင်စီတပ်တို့ ထိတွေ့တိုက်ပွဲဖြစ်ပွားခဲ့သည်။