ဇွန် ၂၇ ၊ ချင်းမိုင်
၂၀၂၄ ခုနှစ်တွင်ပြုလုပ်ခဲ့တဲ့ ပြည်တွင်းပြည်ပ က ရှမ်းလူငယ်များ၊ အရပ်ဘက်အဖွဲ့များ အပါအဝင် အဖွဲ့အစည်း ၂၀ ကျော်က လူငယ်များပါဝင်တက်ရောက်ခဲ့တဲ့ “ တိုင်း လူငယ်ထု ညီလာခံ” ကနေ သျှမ်းလူငယ်ကွန်ကရက် (DYC) ကိုဖွဲ့စည်းကြောင်း ကြေညာလာပါတယ်။
ညီလာခံကျင်းပပြီး တစ်နှစ်ကျော်ကြာတဲ့အချိန်မှာ အချက်ငါးချက်ပါတဲ့ မူဝါဒတွေကို ကိုင်စွဲပြီး သျှမ်းလူငယ်ကွန်ကရက် ကို ဖွဲ့စည်းတာဖြစ်တယ်လို့ ကြေညာချက်အရသိရပါတယ်။
အာဏာရှင်စနစ်ဆန့်ကျင်ရေး၊ ဖက်ဒရယ်ဒီမိုကရေစီပြည်ထောင်စုပေါ်ထွန်းရေး၊ ကိုယ့်ကံကြမ္မာကိုယ်ဖန်တီးခွင့်ရရှိရေး၊ ဖက်ဒရယ်သျှမ်းပြည်ထူထောင်ရေး၊ သျှမ်းလူငယ်ထုမှသည် သျှမ်းတမျိုးသားလုံးစည်းလုံးညီညွှတ်ရေး စတဲ့မူဝါဒတွေနဲ့ ဖွဲ့စည်းကာ သျှမ်းလူငယ်နိုင်ငံရေးလုပ်ငန်းစဉ်တွေကို ဦးဆောင်ပြီး လုပ်ဆောင်သွားမယ်လို့ဆိုပါတယ်။
နိုင်ငံရေး၊ တော်လှန်ရေး စိန်ခေါ်မှုတွေကြီးမားနေတဲ့ သျှမ်းတစ်မျိုးသားလုံးအတွက် စုပေါင်းပြီးလက်တွဲလုပ်ဆောင်ကြဖို့ကိုလည်းဖိတ်ခေါ်သွားမယ်လို့ ကြေညာထားတာဖြစ်ပါတယ်။
၂၀၂၄ ခုနှစ် မေလအတွင်းမှာပြုလုပ်ခဲ့တဲ့ “တိုင်း”လူငယ်ညီလာခံကနေ အချက် (၆)ချက်ကို စုစည်းနိုင်ခဲ့ပြီး လုပ်ငန်းကော်မတီတစ်ရပ်ကိုလည်း ညီလာခံကနေ ဖွဲ့စည်းခဲ့ပါတယ်။
ဒီကော်မတီတစ်ရပ်က စစ်မှန်တဲ့ဖက်ဒရယ်ဒီမိုကရေစီရရှိရေး၊ အာဏာရှင်စနစ်ဆန့်ကျင်ရေး၊ ဖက်ဒရယ်သျှမ်းပြည်ပြန်လည်ထူထောင်ရေး၊ သျှမ်းတစ်မျိုးသားလုံးသွေးစည်းညီညွှတ်ရေး၊ သျှမ်းတစ်မျိုးသားလုံးကို လွှမ်းခြုံနိုင်တဲ့ ပညာရေးစနစ်တစ်ခုပေါ်ပေါက်ရေး၊ နောက်ပြီးလူအခွင့်အရေးနှင့်သဘာဝအရင်းအမြစ်၊ ဒေသခံပြည်သူများအကျိုးစီးပွားကို ကာကွယ်ရေး စတဲ့အချက်တွေကို အကောင်အထည်ဖော်ဆောင်ရွက်သွားမယ်လို့သိရပါတယ်။