ဇန်နဝါရီ ၁၇ ၊ အင်းတော်ကြီး
အင်းတော်ကြီးဒေသက တုံပင်၊ မိုင်းပုတ်ကျေးရွာများမှ ဒေသခံများကို KIA က စစ်သားစုဆောင်းရေးဆွဲနေလို့ အခက်အခဲကြုံနေကြရတယ်လို့ ဒေသခံတွေက ရှမ်းနီအသံကို ပြောဆိုပါတယ်။
“ အခု ရွာသူ ရွာသား တွေ ကို ခရီးထွက်ခွင့် မပေးဘူး။ ကျောက်ဖျာ တောင်ခြေ နားမှာ စခန်း ချပြီး မှတ်ပုံ တင် စစ်တယ်၊ တုံပင် မိုင်းပုတ် သားဆိုရင် သူတို့ သတ်မှတ်တဲ့ အသက်အရွယ် အစားဆိုရင် တစ်ခါတည်းဆွဲသွားတယ်” လို့ အဝေးရောက်နေတဲ့ မိုင်းပုတ်ကျေးရွာသားတစ်ဦးက ပြောပြပါတယ်။
ဇန်နဝါရီလ (၁၇) ရက်နေ့မှာ တုံပင်၊ မိုင်းပုတ်ကျေးရွာကို စပါးသွားဝယ်သူ (၇) ဦးနှင့် အသက် (၂၀) အရွယ် မိုင်းပုတ်ကျေးရွာသူ တစ်ဦး စုဆောင်းရေးဆွဲခံခဲ့ရတာဖြစ်တယ်လို့ အင်းတော်ကြီးဒေသခံတွေက ပြောဆိုကြပါတယ်။
KIA တပ်ရင်း ၂၆ က တုံပင်နှင့် မိုင်းပုတ်ကျေးရွာမှ လူသစ် တစ်ရွာ ၂၀ ဦးတောင်းခံထားတာဖြစ်ကြောင်း ရွာသားများထံမှ သိရပါတယ်။
တုံပင်၊မိုင်းပုတ်အပြင် အင်းတော်ကြီးအနောက်ကမ်းရှိ ကျေးရွာတချို့ကိုလည်း KIA က စစ်သားစုဆောင်းရေးအတွက် လူတောင်းခံထားကြောင်း အုပ်ချုပ်ရေးမှူးများထံကနေ သိရှိရပါတယ်။
“ မိုင်းပုတ်ရွာကို ရွာသား ၁ဝ ဦး၊ တုံပင် ရွာကို ရွာသား ၂ဝ ဦး တောင်း ပါတယ်။ ရွာသား တွေက မပေးလို့ ဝင်ဖမ်းတာ” လို့ နောက်ထပ် ဒေသခံသတင်းအရင်းအမြစ်တစ်ဦးက ပြောပါတယ်။
အင်းတော်ကြီး တုံပင်၊ မိုင်းပုတ်ကျေးရွာအနီးဝန်းကျင်မှာ KIA တပ်ရင်း ၂၆ နှင့် ဒေသကာကွယ်ရေးတပ် တချို့လှုပ်ရှားတဲ့ နယ်မြေလည်းဖြစ်ပါတယ်။